Tawngkam

          Naupang kum 2/3 vel hian eng pawh sawi se, tawngkam dengkhawng leh inhauhna tawngkam na tak pawh sawi se puitlingin kan haw ngai lo. Huat ahnekin kan lawm zawk a, sawi nawn tir leh phet kan tum thin. Eng vang nge? A sawi tu kha naupang a nih vang a ni thei a, chu ai mah chuan a sawitu thinlung, engnge a thil sawi kha a awmzia pawh hre lo leh mi thinlung leh rilru tihnat tumna reng reng nei lo, 'lawmnaa khat rilru thianghlim' naupangin a sawi kha a ni tlat a, puitling lungfingin kan sawi a, dam chhung daih inhmelmakna tling thei tawngkam kha lawmna siamtu a lo chang ta daih thin.

           Hetiang chiah hi hmangaihtu leh hma ngaitu tawngkam chhuakin mi a den dan chu a ni. Hei vang hi ni maw, kan Lal Isua pawhin, ' Heng naupang tê in vanram a lawm anga lawm lo apiang chu a chhungah an lut tawp lovang," tia a lo sawi ni?
Thenkhat hi chuan hmangaih âwm tak leh hma ngai âwm tak hian eng eng emaw tiin, thu tha tak tak te kan sawi thin. Mahse, 'lawmnaa khat rilru thianghlim' atanga rawn chhuak a nih loh avang hian a thawh tur angin midangte-ah a thawk lo fo thin. India rama misual leh pawikhawihtute hremna atana kan rin ber, Indian Penal Code (IPC) ah pawh hian tih hlum tuma mi khawih (intent to kill/murder) te hremna dan pawh kan neiin ka hria.

          Kan thusawi leh thiltih te hi midang nêk ran leh tâi ran ni lo, midang te hmangaih leh hma ngai tak tak chunga kan sawi a, kan tih a nih chuan a lo dawngsawngtu tan hian eng anga nâ pawh nise a na ngai reng reng lo! Chumi lehling chiah, thinlung khâ leh kâwi atanga chhuak thu leh thiltih erawh chu thu ho tê leh thil ho te pawh nise, chhun anga nâ in midang te a vit thei lawi si thin a lo ni! He lawmnaa khat rilru thianghlim hi kan tunlai hun tawn harsa leh khirh takah hian thil dang zawng aia kan mamawh ber chu niin a lang e