Covid-19 Zirlai VI

          Kan thenawm Assam state-ah pawh kan ram depa awm Silcharah Covid 19 vei an awm thu news media hrang hrang ten an rawn puang leh ta un un mai a. Hetiang a nih takah chuan lock down kalpui a nih tan tirh atanga kan sawrkar hotu ten an sawi leh min chah mawlh mawlh 'in renchem' chu a hma zawng aiin a tul zual dawn ta niin ka hria.

           Hetia kan thenawm, Mizoramin kan châk leh mamawh zawng zawng kan lakna luhka leh kalkâ ber Silchara covid 19 hri kai hmuh a nih tak si ah chuan khauh lehzuala lock down an kalpui ve ngei a rinawm a. Mipui vantlang a lova kan awm theih loh mamawh hrang hrang (essential commodities) te chu he lock down hian huam ve lo mahse, keini Mizoram mamawh min phuhruk tur leh an sum hnar pawimawh tak ni bawk hi kan silchar unau te hian hripui laka an sahimna aiin min dah pawimawh hmasa ang em tih hi ngaihtuah tham tak niin a lang. Kan dawr liana kan nitin mamawh an zawrh leh dah khawl (stock) te hi chuan silchar kawng lam atanga kan ei lakna kawng hi chhut chah ni ta se, ni hnih khat bak min daih dawn si lo. Tin, hetia Silchara hri vei an hmuh chhuah tak si ah chuan, silchar paltlanga supply phur motor leh mihring kan rama luh tir reng pawh hi kan tan hian a him ber ang em? Thenawm state dang Manipur, Tripura etc atangin kan la lut thei tho alawm ti ta ila, hri vei châwk luh palh a hlauhawmna hi silchar lam nen a inang reng tho ang em? Ngaihtuah tur a ti tam ta viau mai. Chuti a nih chuan engtin nge keini ho hi kan lo inbuatsaih lawk ve tak ang?

          Hetiang thil thleng palh thei hi chu kan sawrkar hotute hian an lo hmu lawkin an lo thlir lawk diam tawh ang tih chu ka ring. Chutih laiin mipui lam zawk hian kan lo thlir lawkin kan lo inhmakhua lawk ve em le? Khawvelin covid 19 lakah indopui a hmachhawn mek a ni a, chutih laia muang leia kan khawsak dan phung pangngai ang reng leh engkim hnianghnara kan kawtkaia rawn thleng reng tura kan ngaih chuan kan ti fuh lo palh thei.

          Kan theihna zawn theuhah chawhmeh, buhfai, sum leh pai, tui, kawlphetha...a tawi zawngin kan mamawh, a lova kan awm theih loh thil chi hrang hrangah te hi chuan ni khata kan mamawh tawk zel bak hi chu khek leh ren dan i zir teh ang u. Tunah pawh kan thlai chingtute leh lo lama kan hnathawktu te hi kan ei bel leh inhnangfakna an ni tan der tawh a, anni pawhin theihtawpin tan han la zel teh se. Kan sawrkar pawh hian dam te-a nakum lama budget an pharh leh hunah chuan lo leh huan neitu leh kut hnathawktute hi Mizoram mipui tam zawk eizawnna leh buai a lo thlen tak taka kan innghahna ber an ni tih hria in budgetah pawh an pual hian han dah hnem deuh tawh bawk teh se!
Eng pawh nise, kan hma hunah engnge lo thleng dawn tih leh engtia rei nge hetia inkharkhip kan la ngaih dawn kan hre si lova, i lo in renchem em em phawt mai ang u