Covid 19 Zirlai V

             Nimin leh vawiin lamah local cable TV news report siamin TV crew te nen local task force te duty point hrang hrang leh sawrkar dept hotute titipuiin kan chhuak a. Heta ka thil hmuh thenkhat te hian ngaihtuahna pakhat min neih tir a, chu chu 'Kan hlauh ber hi kan chiang em?' tih hi a ni.

A tlangpuiin mipui ten lockdown kalpui mek hi kan zawm tha hle a, khawlaiah tul lova chhuak emaw, dan bawhchhe lui emaw kan awm meuh lo niin a lang. Chutih rualin, task force te pawhin an ngaimawh lem loh nia lang, mahse kan in lockdown chhan leh kan hlauh ber chiang lo, dan zawm tha viau si mipui zingah kan awm niin ka hria.

            Khawlaia chhuak lem lo, thenawm hnaia mite ni awm tak verandah-a mi sawm aia tam mah lo thu khawm hmun hnih thumah ka hmu a. CrPC Sec 144 hmanga mipui pun khawm phal a nih loh chhan leh mahni ina kan inkharkhip thap chhan ber hi hripui, mihring awm khawm atanga inkai chhawn a hlauhawm avang a ni a, a tawi zawngin lockdown avanga pawn chhuak lo ni lovin, hri leng hlauhawm avang zawka pawn chhuak lo tur kan ni zawk a. Thenkhat erawh hi chuan kan hlauh bera hi kan chiang lo deuhin ka hria. Local task force te pawi sawi lo tawk vela thenawm hnai inkawm khawm leh thu khawm tuau te kha chuan he kan hri, covid 19 ni lovin task force te an hlau zawk mah niin a lang a. Task force te atanga khapna an dawn lem loh chuan thut khawm a, titi khawm kha an pawisa lem lo niin a lang. Hri hlauhawm avanga pawn chhuah khapna dan kengkawh kan nih laiin, dan kenkawh a nih chhan hlauh nachang hre si lova, dan kengkawhtute chauh kan hlauh chuan kan in lockdown chhan kan thelh der! Tui tlak chu hlau, mahse tui ngam viau lawi si kan ang berin ka hria, kan hlauh ber tur leh kan hlauh ber kan chiang lo tlat!

            Chutiang bawkin kan hripui dotu ber kan local task force thenkhat te pawh kan hlauh ber hi kan chiang lovin ka hria. Duty point thenkhata fimkhur taka mi tlem te, inkar hlat angreng taka an duty laiin, hmun thenkhatah erawh mi sawm aia tam fe insi dula thu, zuk leh hmuam inban tawm a, in zuk tawm luih luih, kut kawr leh hmai kawr erawh vuah uluk viau lawi si te ka hmu! Kan task force duty thenkhat te pawh hian hmai kawr leh kut kawr kan vuah leh bun chhan ber leh dutya kan chhuah chhan ber hi kan chiang lo deuh em ni aw ka ti. Khatiang tuau tuau te chuan tun huna Mizoram puma chhuak thei awm chhun leh chhuak tam ber, mi hrang hrang tawng leh hmachhawn hnem ber, hri kai thei dinhmuna ding ber leh kai darh nasa thei ber an nih tehlul nen, kan ven ber leh kan hlauh ber hi kan hai a ni mai lo maw? Kan hripui aia mipuiin dan an bawhchhiat hlau zawk task force duty ka hmu nual!

             Chuvangin, engnge kan hlauh ber hi i chiang nawn thar leh teh ang u! Chuti lo zawng, kan hlauh lohna lam khân atang hian kan hlauh ber hian min rawn bei thut palh ang e!