Thawhhona
Tunlai chu Mizoram University Human Resource Development Centre buatsaih Online Orientation Course chhimin nitin dar 11 atanga dar 4 thleng India ram hmun hrang hranga college leh university zirtirtu 800 chuang ten online lecture/class kan nei thin a. Nitin lecture tan dawn apiang hian zawhna pakhat inzawh ngei ngei ngai a awm a. Chu zawhna chu chhan fel a nih hma chuan eng class mah a tan theih loh. Chu zawhna chu 'Am I audible (ka tawng in hre thei em?)' tih hi a ni!
Online hmanga engkim ruahman leh kalpui a ngaih avangin organizer, resource persons leh keini, attendees ho ten kan tawng leh thiltih kan inhriatpawh a kan inhmuh tawn vek a ngai a. Organizer leh resource person te inkar a that mai a tâwk lova, organizer leh attendees leh attendees leh resource persons tr inbiakpawhna leh inhmuhtawn kual vekna kha pawimawh hmasa ber a ni. A tawi zawngin, he orientation course hlawhtlinna atana pawimawh hmasa ber, thil dang zawng zawng hmaa pawimawh chu thawhhona (team work) tha a ni.
Thawhhona hi a mak angreng khawp a. Mi eng emaw zat awm khawm leh thawh inang thawk ringawt hi thawk ho/thawhhona a lo ni hauh lo. Office pakhata thawk theuh theuh, kohhran khata lawi theuh theuh, pawl pakhata hruaitu emaw, member emaw ni ho kumtluan, a then phei chu nitina hmel inhmu kumhlun te pawh hi awm ho leh an hna thawh leh thawhna hmun thlengin thuhmun kumtluan mahse, thawk ho chuang miah lo hi a lo awm theih khawp mai. Pawl tam tak leh sawrkar thleng pawha kalsiam ti thuanawp fotu ni thin chu he thawhhona/thawhhona tha awm lo hi a lo ni leh thin. Chuvangin, thawhhona (team work) dik tak chu inrintawnna, inpuihtawnna, indawhtawnna...a tawi zawngin engkima a tawn tawna (two-way) thiltih hona hi a lo ni. Mahni tanghma hai rân chung leh midang te ngaih pawimawhna nei miah lova hnathawhna (one way work) hmunah chuan mi za tel pawh awm se thawhhona a awm thei ngai lo.
Tin, thawhhona hi pawl emaw, awm khawm leh punkhawm khera neih chi pawh a ni chuang lo. Mimal pawh hian mahni hmunah theuh hian thawhhona tha hi kan lo siamin akn lo nei thei reng mai. Engtin maw? Sâwtna leh sawngsawhlawtna nei miah lo mi rél leh sawichhiat te hi ching lo ila, kan réla te pawi kan sawi lo ang a, an pawi kan sawi loh na na na chuan kan pawi an rawn sawi ngawt bikna chhan tur va awm suh! Inthenawm khawvennaah te hian thenawm te kan pui thei lo a nih pawhin an tan hnawksak thlen lo ila, chutiang zelin, midang tana thil tha kan ti thei lo a nih pawhin an pawi va sawi kher lo ila...pawi insawisak tawn lo leh harsatna insiamsak tawn lo awm khawm na na na te chu eng vang ngawtin nge kan intihbuai ang a, kan inhmelmâk teh ngawt ang! Chutianga kan tih theih phawt chuan midang te nen thawhhona tha kan nei a ni mai! Thawhhona tha kan neih hleihtheih lohna chhan leh kan thawhho theih loh fo thinna chhan hi chu kan thawh dan a tawn (two way) ni lova kal khat (one way) a nih thin vang hi a lo ni duh khawp mai.
Hetia a sawia sawi ngawt hi chuan duhthusam pakhat,a tak ram thleng tak tak ngai lo tur (utopian) a ni pawh kan ti maithei. Mahse, thil nih dan phung chu a ni miau si!
Comments
Post a Comment