Covid-19 Zirlai II

             Vietnam indonaa US armya a theihna zawng zawng sengraltu, indona nghawng avanga a hnu lama rilru lama harsatna (post-war traumatic stress disorder) nei a, a tum hauh lova tual that palh mihang Herbert Richardson, kum 1989a mingo hlang awmna jury in thi tura a chungthu an rem avanga electric chaira an tih hlum tak chanchin kha a runthlak ngawt mai.

             Tih hlum a nih hma in darkar 12 amah chauha khung hran a ni a, an tih hlumna tur pindana hruai a nih hmaa a lawyerin a va hmuha a thusawi pakhat chu, "Mihring hian an thih hun tur hre lawk hian darkar 12 hi mahni chauhin hun hmang ta se, engnge an ngaihtuah ve ang le?," tih hi a ni. A lawyer tan chuan chhan a har viau maithei! An pahniha an tawngtai dun hnuah a ngen angin, an tihhlumna tur pindan pana an hruai laiin jaila an aurinnaah chuan 'A saw raltiang tlangah' tih hla chu an lo tiri a, electric chairah thuttirin Herbert Richardson chu tihhlum a ni ta a ni.

            Herbert Richardsona dinhmun ka ngaihtuah hian tunlaia covid 19 avanga thihna kotlanga dâk mek maktaduai tel, khawvel hmun hrang hranga mite hun tawn pawh hi a rapthlak mang e tih ka ngaihtuah a. Chhung te leh thenrual tha te enkawl leh dawmhlum chu sawi loh, an ruang pawh tahtu awm lo leh vuiliamtu awm lovin nitin an liam zawih zawih reng a ni a. Nikhua an la hriat lai khan dam leh beiseina an nei nge an dam chhuak zo dawn lo tih an inhria ang? An nupui fanau, ngaihzawng te an ngaihtuah ang em? Hri an kai dan te ngaihtuah letin chuti chuan ti ta ila, ka kai awm si lova tiin an inchhir ngawih ngawih ang em? Anmahni enkawltu doctor leh nurse te, darkar tina enkawl sen loh damlo enkawl rengtu, hah tawngkhawng tawh te khan duat leh dim takin an enkawl vek hman awm si lova, an hmangaih te enkawl thlahlel ngawih ngawih leh mahni khumlaizawl ngai vawng vawng chungin mual an liam ang em? Ka rilrua zawhna ai hian an rilrua zawhna hi a tam zawk ang em?!

          Good Friday danglam tak chu kan lo hmang zo dawn ta a. Kan Lal Isua, Herbert Richardson leh Covid 19 avanga nunna chân ta te leh nunna in a kalsan mek te hian inannna pakhat an neiin ka hria, 'Mihring hun tawn azawnga rapthlak ber thihna chu mahni chauhin an hmachhawn' a ni. Hetiang dinhmun rapthlaka kan la ding ve lo hi chu lawm ngawih ngawih tur hi chu kan va ni em!