Lone Strike Christian

            Kristian te tana kan hunpui pawimawh tak pakhat Good Friday urlawkna (?) Tumkau Pathianni chu kan lo hmang liam leh ta a. Kumin tumkau Pathianni kan hman dan hi Mizo chanchinah hian chhinchhiahtlak tak a nih ka ring a, tun tuma kan hman ang hian khawvel awm chhung hian kan hmang leh tawh lo maithei e. Chutiang bawkin Good Friday pawh.

            Shillonga lehkha zira kan awm lai khan TKPa kan President khan mal tlat ngam kristian nih a pawimawh thu sawiin footballa striker/forward pakhat chiah hmanga goal thun tum team nena tehkhinin thu a sawi thin a, kan hun tawn mek nen a inhmeh hle in ka hria.

            Keini hnam hi a hu hova thil tih nuam ti hnam kan ni a. Eng pawh ti dawn ila, thurualpui leh kawppui neih nuam ti kan ni. Kan khawtlang nunziaah pawh hian chu chu a chiang a. Hnam dang tam zawk ten chhungkua leh mimal thila an dah chhiatni leh thatni pawh khawtlang thila la a inbuaipui thin hnam kan ni. Kohhranah pawh a ni a, khawtlanga kan nunhonaah pawh a ni. Ka tawng tu'n lo haw lo se, kan nun leh rilru pawh hi chik taka chhut chuan mimalin kan ngaihdan leh duh dan ai mah hian khawtlang/kohhran duh dan leh ngaihdan hian min kaihruai nasa mah zawkin ka hria. Kan rinna leh kan tlawmngaihna te pawh hi thenkhat chu hmuh phak chin bak hi a pel hleithei lo! Hmuh loh liamah chuan kan lo dang leh daih fo.

            Eng pawh chu nise, hripui avangin a hmaa a huhova kan tih dial dial thin khawtlang leh kohhran thil tam tak kan ti thei ta lova, thupuia kan dah ang khian mahni/maltlata beih ngauh ngauh kan ngai ta theuh a, kan mal tan ta hlawm a nih ber chu. Huho thiltihtheihna leh chaknaa innghat kan nih chuan kan thahrui chu a bo nghal dawn tihna chu a ni mai a, mahni dinhmun theuh chu mahni bawkin kan chiang ber ang chu. Khawvela mi ropui, an thih hnu kum za tam liam tawh pawha an hming kan sawi bân theih loh te leh dam lai mek te hi pawh hi an nun han chhut chian tak tak chuan mahni chauha lo ti ngar ngar, tumahin an rin loh, beisei loh leh awih loh lai leh kawng laklawha an tawpsan vek hnu pawha ring a, beisei a, mahni chauha zinkawng khawhar lo mal zawh ngat ngat tu hi an lo ni deuh vek nia.

            Kan Lal Isua ngei pawh kha kalvari kawng khawhar zawha bul a tan meuh kha chuan Gethsemani huan atanga kraws ler thleng khan a mal beih ve ngauh ngauh kha mawle! Mal tlat ringtu, mal beih ngam khawtlang hruaitu, lone striker kohhran mi nih hi zirin tum ila, a huhoa kan thiltihna engah pawh a zelthel pawl, a peih lo pawl leh a hnukhâwi pawlah kan tang ngai dawn lo nia