Covid-19 Zirlai VII

           Mizo te hi hnam hmasawn leh changkang tak kan nih tawh rual hian hman atanga vawiin thlenga sim theih loh kan neiin ka hria 'finfiah leh chhui chiang hmasa lova thil inhrilh darh chiam' hi!

           Hman deuhah khan chi (salt) a vâng dawn tih kha a darh vak a, dawra chi awm zawng zawng deuhthaw kan lei zo tawh a, a vâng ta lem hlei lova. Natna eng emaw atan chumi khami chu mi chumi khamiin a tha a ti kan ti a, kan in ei hmuh a, a lo tha em em hran leh lova! Hei, tunah covid 19 hri leng chungchangah kutkawr, hmai tuamna leh hand sanitizer kan rama awm zawng zawng deuhthaw kan inchuh zo leh a. Heng thil nei ve lo chu hri kai mai turah kan inchan deuh nge maw ni! Kan damdawi lam thiam ten sahbawn leh tui nena fai taka kut sil chuan kutkawr bun kher a ngai lo, hri kan vei a nih loh chuan hmai tuam kher a tul lem lo an tih pawhin kan intih hmuh laklawh tawh chu kan bansan hleithei tawh lo. Chumi khuaa mi, chumi venga mi chuan covid 19 a vei kan ti a, thuneitu ten an han chhui chiang a, dâwt a lo ni leh a. Dâwt a ni tih an chian hma in kan lo inhrilh darh fel hman deuh vek a! Damdawi chumi khami ei pawlh chu a tha tih thu a darh leh a, damdawi dawra mi zawng zawng kan lei zo leh deuh vek a, mithiam ten lungphu a ti buai thei an rawn ti leh a! Chumi chuan chuti chuan a ti tih ringawt pawh hi ram pum hian kan buaipui leh hluai thin!

           Eng chanchin pawh, eng chungchang pawh nise, kan chiaipui hluai hma hian thu belhchian dawl a ni em tih te kan theih ang angin han chian hmasa phawt ila chu kan nunphunga kan chiaina tam tak hi chu kan pumpelh thei hian ka ring thin. Covid 19 chungchangah pawh hian mi ramin a sing tela an thihpui leh a nuai tela an vei hri hlauhawm hi kan ramah hian kai kan awm ve lo palh ang tih hlau niawm tak hian a lam hawi chanchin social media site hrang hranga kan hmuh te chu chhui chiang hmasa lem lovin kan han thehdarh ta hluai thin hi chu a zia lo lam deuh a ni. Chhui chian a, finfiah hmasak khan kan engmah a heksak der si lo! Kan fiamthu thiam Lalnunsanga fiamthu pakhata sipai tang, ralmuanna hmuna muang em em a, raltitna hmuna ti leh em em kha kan ang berin ka hria. Ralkhelh tul miah lohnaah te kan ralkhel chiam a, a ralmuan tawh loh hle hnuah kan thla a la muang phian leh ang lawi a!

           Mi tak, a kâa thu chhuak reng reng chu thudik leh belhchian dawl nih i tum tlang teh ang u. Mi fimkhur, chik taka chhui leh ngaihtuah thin mi hi han ni theuh hlawm ila chu social media platform kaltlanga kan thu leh hla phuh chhuah thin te pawh hian belhchian a dawl ang a, chat clear pup pup pawh a tul tawh kher nang!