Michelle Obama hi MIPA a lo ni reng em?!!

 

Tunlaia social media-whatsapp, twitter, facebook, youtube etc vela lar tak pakhat chu US President Barack Obama nupui, US First Lady (US President te nupui sawina) Michelle Obama mipa a nih leh nih loh chungchanga inhnialna hi a ni! Hemi chungchang rawn vawrh lar vak tu hi New York-a cheng fiamthu thiam (comedian) pakhat, Joan Rivers-i a ni a. Rivers-i hi fiamthu thiam lar tak leh kum 1940 chho atang daih tawha a fiamthu hmanga midangte tihlim a, ei lo zawng tawh a ni a. Amah tak phei hi chu July, 2014 khan kum 81 mi niin a boral tawh nghe nghe a. A boral hma lawk hian chanchinbumi pakhatin a kawmnaah Rivers-i hi President Obama te nupa a hmuh dan chungchang a zawt a. Rivers-i, fiamthu duh tak leh milar te fiamthu thawhna atana tawngkam dengkhawng tak tak hmanga sawisak ching tak mai chuan, Barack Obama chu mawngkawhur (gay) leh a nupui Michelle Obama pawh chu mipa leh hmeichhe zahmawh nei kawp (transgender) a ni tiin “tranny” tiin a dan pangngaiin fiamthu thawh nan a hmang a. Chu thu chu a sawitu Rivers-i boral hnuah chuan internet ah “Dr.Eowyn” in ti mi pakhat chuan, President Obama nupui chu hmeichhia ni lovin mipa a ni, a hming pawh Michelle Obama ni lovin Michael laVaughan Robinson a ni, an fate nausen lai thlalak hmuh tur a awm lo tih ang reng, thu belhchian dawl lo pui pui vawrhdarh in leh, thenkhatin a video te youtube-ah dah in, thlalak duhtawka sawisak/khawih danglam theihna hmanrua- photoshop hmanga Michelle Obama thlalak an khawih danglam (edit) chu an thehdarh a, Michelle Obama chu hmeichhia ni lovin, mipa a nih thu an vawrh darh ta chiam mai a. A sawitu ber, Joan Rivers-i, tawngkam na tak tak hmanga Obama te nupa chauh ni lo, Obama’n US President a chuh dawna amah khingtu Sarah Palin-i ngei ngei pawh fiamthu thawh nana hmangtu ber lah chu a boral tawh bawk si a. La dam sela chuan hetianga a fiamthu an lo thutak bawl chiam mai hi a nuih pawh a za ve ngawt ta ve ang!!! Thil pakhat mak angreng deuh mai chu, Dr. Eowyon inti in khitiang thu a post hnuah khian a thusawi chu a dik ngei em? finfiah tura ngenna za tam tak a dawng nghal a. Mahse, chutianga zawttu te chuan chhanna engmah an dawng lo! US mi leh sa tam tak zingah pawh, heng dawt thu leng vak lo awih pawl te hi an awm ve teuh tho va. Mizo ten kan lo hriat ve chinah ngat phei chuan a nihna bak baka belhin, ‘chhiar tlem si, tawng tam si, hre tlem si, vak zau si’ an tih ang deuhin, kan hriat baka kan ngaihruatna leh zeldinna bakah, dawt tlem belhin kan han phuah belh ta tak tak mai a le...keini aia fing zawk leh hrechiang zawk, sap ho te pawhin ngaihtuah chhuah ngaihna pawh an hriat loh- Michelle Obama mipa a lo ni reng tih thu chu sakawlh nen kan han sawizawm ta hlauh pek a! Mahni aia hre lo zawk te hnenah thu belhchian dawl a nih leh nih loh pawh fiah uk lovin kan han fah a, chung te chuan anni aia hre lo zawk te an han hrilh chhawng ve leh a, thu mak pui pui a leng ta nuai nuai mai a ni.

Mipa chu a lo ni chiah em? Michelle Obama mipa a ni titu te tan chhan

            Internet-a Michelle Obama hi mipa a ni tia ziaktu tam zawk leh Youtube-a video an daha Michelle Obama mipa a nihzia finfiah tum tu te tan chhan tlangpui chu:

·         An fanu te pahnih-Malia leh Sasha te birth certificate leh an nausen lai thlalak hmuh tur a awm lo.

Chhanna          : US President apiang leh an nupui fanau te reng reng hi an sahimna (security) atan President office an luah luh leh President chenna in, White House-a an chen chiah atang hian anmahni venhim leh humhim chu US Homeland Security leh Central Intelligence Agency (CIA)  te hna pui ber a ni. Chung mite chuan President kalna leh chetvelna tur zawng zawng, a thusawi tur, a ei in leh a bungraw neih (property) te thlengin an vawngtha in an venghim tlat thin. Chuvangin, an thlalak a ni emaw, an mobile phone pawh nise, a duh duh in internet atang emaw-a awlsam taka hmuh lakchhuah theih loh tura vawnhim vek a ni.

·         Michelle Obama pianphung-a hmel, dar (shoulder), khel bawr (hip), kut, hrawk bawk, san zawng, a tawi zawngin a pianphung hrim hrim hi mipa pianphung a ni.

Chhanna          : Thil dang zawng hi chu mi pangngai tan chuan buaina tur awm lova ngaiin sawi zui lo ta ila. Michelle Obama hi mipa a ni tia tang te tan chhan pakhatah chuan a hrawk bawk hi mipa hrawk bawk ang a ni tih a ni. Doctor te chuan,”Hrawk bawk (adam’s apple) kan tih hi mipa leh hmeichhia-ah a awm ve ve a, mahse mipa te ah hian taksa chak zawk leh tihrawl (muscle) a tam zawk avangin a lang chiang zawk a. Pianphung azirin hmeichhia te ah pawh a lang ve thei tho bawk,” tiin an sawi. Pianphung en ringawt chuan Michelle Obama ai chuan tennis player Serena Williams hi mipa a ni ti se, a awihawm zawk daih mai lo maw?!!

·         Youtube-a video-ah pawh Michelle Obama thlalak hrang hrangah pawh mipa a nihzia chiang takin a lang.

Chhanna          : Heng video-ah te hian Michelle Obama serh(mipa serh) niawm tak tih lan a ni a. Hemi chungchangah hian USA chanchinbu lar leh darh zau ber pakhat Washington Post-a an Joint Editor te zinga pakhat, Dan Balz chuan,”Thlalak khawih danglam theihna hmanrua (software) tha tak tak a tam tawh a. Kei chuan heng thlalak leh video-a kan hmuh te hi khawih danglam (edit) an nih ka ring,” tiin a sawi. Tin, Carl Ray, mi chei thiam (make-up artist), milar tak tak cheitu leh Michelle leh Barack Obama te nupa ngei pawh an zinkualnaa zuia chei thin tu pawhin, “President te nupa hi kum khat chhung hian vawi 1000 aia tam thlalatu ten an thla an laksak a. Chung zingah chuan thawmhnaw lo chuar/tawm deuh chang (wardrobe malfunction) te chu a awm ve bawk ang chu. Lan that leh lan fuh vek theih a ni lo. Ngaihbel tur te chu a tam khawp ang,” tiin huffington post chanchinbu in an kawmnaah Michelle Obama thlalak, mipa a nihna tichiangtu nia an sawi te chungchang a sawi bawk.

Heng bakah hian a kutzungtang atang te leh thil dang dang avanga Michelle Obama mipa a ni tia an sawina awm mahse, duhtawk ta ila. Kan hriat ve mai mai tur chu hetianga Michelle Obama mipa a ni tia thu vawrhdarhtu te hi a pasal Barack Obama-an US President chuh tuma kum 2004 chho-a a beih laia Obama hi US mi leh sa dik tak a ni lova, chuvangin US President a ni thei lo tia nasa taka bei hlawhchhamtu te tho kha an ni!!

Kan fimkhurna tur te

·         Kan thusawi/mi hrilhchhawn tur reng reng hi thu belhchian dawl a ni em kan finfiah hmasak a ngai. A bikin ‘internet’ atanga kan hmuh kan behchhan dawn a nih ngat phei chuan kan fimkhur lehzual a pawimawh. Internet-ah hian mi tupawhin a duh duh engpawh a dah thei. Pathian thusawi tha tak tak video en tur a awm rual hian mipat-hmeichhiatna ngialngan hmang lai video pawh en sen loh internet ah hian hmuh tur a awm. Chuvangin, internet-a awm zawng zawng hi a dik/tha vek lova, thlitfim/finfiah hmasak ngai a ni zawk.

·         Tunlaiah chuan thlalak tam tak hi a khawih danglamna hmanrua (software) hmanga khawih danglam (edit/retouched) theih a ni tawh. Model/filmstar thenkhat te hi film leh an thlalaka kan hmuh thenkhatah te hian an nihna tak aia cher zawk, sang zawk, thau zawk etc in digital editing hmangin an pianphung leh lan dan te hi khawih danglam (edit) an ni thin. Chuvangin, kan mitin a hmuh zawng zawng hi thudik ziktluak a ni kher lo thei a nia!

·         Michelle Obama a ni emaw, Barack Obama pawh nise SAKAWLH nen inzawmna an nei lo! Barack Obama sakawlh nia sawitu te hian hei hi an hrechiang em? US President hi term hnih (kum 10) aia rei tumahin an chelh ngai lo! Barack Obama hian a duh emaw, duh lo emaw, nakumah chuan US President a nihna hi a chawlhsan tawh dawn!

·         Barack Obama naupan lai atanga President a nih thleng chik taka chhuia a chanchin an ziahna lehkhabu, Dreams From My Father leh From Promise to Power tih lehkhabu te hi i chhiar tawh em? Heng lehkhabu ziaktu te hian Barack Obama chanchin hi rawlthar a nih laia cocaine addict a nih lai atanga, mei zu nasa lutuk a nih dan leh a sim tak dan te thlengin kum 10 chuang zirchiangin an ziak asin! A nupui Michelle Obama tleirawl lai leh an intawn dan te thlengin chiang takin an ziak a, hmeichhia chu a ni ngei an ti!

·         US President Car chungchangah: US Presidential Car hi car changkang chungchuang a ni a. A car pianphung lampang chu sawi lo ta hrih ila. Tunlaia thenkhatin an buaipui em em chu US President chuanna motor hming chu “The Beast” an ti a, chu chu “Sakawlh” tihna a ni tih hi a ni. Ni e, an sawi dik! Saptawng thumal ‘Beast’ hi Mizo tawnga ‘Sakawlh’ sawina chu a ni teh meuh mai! Mahse, hetianga sawitu te hian US President car hming tak/kohna tak (official name), ‘ofisial’ taka an kohna chu Cadillac One emaw Limo One tih a nih hi hre hlawm tak maw! The Beast tih hi chu President venghimtu CIA ten an koh duatna kan ti dawn nge? an sawi dan thin mai a ni a, official-a an kohna a ni lo!! Bible-in a sawi sakawlh nena lo sawi zawm phet tum zawng a inchhiarzau loh thlak em mai!!