Hosanna

                             -John Piper(Translated & edited)

                                                (Johana 12:13)

            Tumkau Pathianni a lo thlen apiang hian naupangte chuan khawlai dungte fangin ‘Hosanna’ tia au rualin Pathian an chawimawi thin a. Tin Kohhran inkhawmah pawh zaipawlte leh mipuite pawhin Isua chawimawina lam hlate sain hemi nia kan thu lamrik zin ber leh uar ber chu ‘Hosanna’ tih hi a ni. He thumal ‘Hosanna’ tih hi thuthlung Thar bu-a hman a nihna hmun thum- Matthaia 21:9,15-Davida fapa hnenah Hosanna!... tihte, Marka 11:9-Hosanna! Lalpa hminga lo kal chu fakin awm rawh se tih leh Johana 12:13-Hosanna! Lalpa hminga Israel lal lo kal chu fakin awm rawh se tih atang te hian enge a awmzia diktak lo ni tih i han chhui dawn teh ang.

            Kan hriat theuh angin Thuthlung thar hi Grik tawnga ziah leh Thuthlung Hlui hi Hebrai tawnga ziah a ni a. Hosanna tih thumal io Grik tawng/thumal a ni a.English-a an lehlinnaah pawh he thumal hi a nihna ngai ngaia hmanzui a ni a, tin Mizote pawhin he thumal tho hi kan hmang a ni. Hei mai hi a la ni lova, Hosanna tih thumal hi Grik thumal dik tak(original) a la ni lo leh ta zel a. English-a letlingtu ten an tih ang tho hian Grik tawnga Thuthlung Thar ziaktu te hian Hebrai tawnga hoshiya na  tih chu Grik tawnga lam a awlsam zawk nan ‘Hosanna’ tiin an lo letling a, chuvang chuan Mizoten Tumkau Pathianni apianga kan auhla ‘Hosanna’ tih thumal hi Hebrai atanga Grik atanga English atanga Mizo tawnga kan neih a lo ni ta tihna a nih chu! Thuthlung Hluiah chuan Hosanna tih hman a nihna chu Sam 118:25-ah kan hmu,” Aw Lalpa, khawngaih takin chhandam la”. Hetah hi chuan Pathian hnena tanpui tura auhna hla a ni.

            Mahse, thuthlung hlui huna Pathian tanpuina dilna auhla atana hman thin hoshiya na chu a hmanna a lo dang ta hret hret zel a. Sam 118-ah vêk, chang 26 naah chuan “ Lalpa hminga lo kal chu a eng a thawl e,” tiin kan hmu lehnghal a. Pathian tanpuina dila hoshiya na  tia au Sam ziaktu kâ atang vêk chuan chawimawina tawngkam kan hmu leh ta a. Chutiang chuan he thumal hi Judate zingah pawh tanpui dilna auhla satliah mai ni tawh lovin beiseina leh hlimna, fakna tawngkam atan hman a lo ni chho tan ta a. A tobul lama, “Min chhan rawh,” tia auna hla chu kum zabi engemaw zat hnuah chuan, “Chhandamna/Chhandamtu a lo thleng ta,” tia fakna leh chawimawina ri-ah a lo chang ta zawk a ni.

            Tichuan ‘Hosanna’ tih awmzia chu , “Chhandamna rawn thlentu Lalpa chu fakin awm rawh se, a lo kal e, a lo thleng ta, chhandamna chu kan hnenah a awm ta,” tihna a lo ni ta a. Chutiang a nih takah chuan  Mathaia 21:9-a kan hmuh ,”Davida fapa hnenah Hosanna,” tih awmzia chu ,” Davida fapa ngei hi kan chhandamtu chu a ni. Amah chawimawiin i au ang u, Chhandamtu Lalpa chu,” tihna a lo ni ta a ni. Chutiang bawkin “Chungnung berah khian Hosanna” tih chu “ Van angelte zawng zawng leh van mipuite pawh khian chawimawina sang ber hlan rawh se” tihna a lo ni ta a nih chu.

Hosanna chi hnih

            Tv-ah te Football kan en thin a. Stadium lian tak chhunga khelmual zau tak leh hring dup maiah an inkhel a. Chu an inkhelhna chhungah chuan anmahni tantu leh entu mipui sing tel an thu tlim hmur mai bawk a. Chung mipui tam tak maite awrawl tawpa an han au tak tak chuan khelmuala awmte tan pawh tawng inhriat pawh hleihtheih pawh a ni thin lo. Chung mipuite chu hlawm hnihah an inthen phawk a, an auhla pawh hlawm hnihte chu a inang lo. Hlawm khat chuan lehlam pawl an tan a, hlawm khat dangin chumi te tumpui/lehlam pawl chu an tan a. An pawlten  ball an chan a, pet goal ngei tuma an han khalh phei chuan anmahni tantu te chuan an lo auphurin pet goal ngei turin an lo fuih sauh sauh a, an lo au thin a. Chu chu Hosanna hlui zawk, tanpui dilna, an duh ang ngeia pet goal ngei tura players’ te tanpui an dilna auhla chu a ni. Tichuan, an pawlte chuan an pet goal ta ngei a, mipuite chu an au leh ta. Mahse tun tum chu fuihna leh pet goal ngei ngei tura auhna lam ni tawh lovin an pet goal tak avang leh, an duhthusam a thlen tak avanga lawmna auhla, fakna leh chawimawina, Hosanna thar/hnuhnung zawk a ni ve thung ta a ni.

            Khai le…. Vawiin Tumkau Pathianni ah hian a lian ber atanga a te ber thlengin Hosanna tiin kan au leh ngei dawn a. He ni hi kan Lal Isua, khawvela kum 40 chuang rawngbawla a vah vel chhunga Lal a nihna ang taka chawimawi leh fak a nih ve na hun leh ni awmchhun a ni. Hosanna tia i au/ka au hian kan thinlung chhungah hian chawimawina leh fakna nge lian zawk a, vuivaina leh tihtauhna? Pathian chunga kan lawmna nge sang zawka a laka kan helna leh duhkhawp lohna le? ‘Hosanna’ tih hi fakna, chawimawina, lawmna auhla leh Pathian min tlanna ropui fakna leh lawmthu sawina tawngkam leh auhla a ni tih hriain kan thinlung chhungril ber atanga Lalpa fak duhna thinlung tak tak leh kan nuna hmun sang ber chanier leh luahtir chungin ‘Hosanna’ i ti theuh ang u.