Pûr Chaw Hnam

Silchar thlang lama bungraw phurtu te, petrol leh diesel phurtu te...a tâwi zâwngin, nitin mamawh phurtu te an tihtauh ruala engkim tlachham nghal, hlauthawnga thil lei (panic buying) nghal chûk chûk hnam leh ram kan nih chhung hi chuan mahni tapchhak zâwlah inhrosa in, lo hâhum ve chiam chiam thin mah ila, kan hâhum ri hi a ring tak tak thei lo zawng chu a ni e!

Covid 19 in khawvel pum a han nuai a, dân pangngaiin (ngaiah kan nei tawh ni hialin ka hria!) fur puiin kan kawng te a han sawp chhe leh tak tak chu kan buaina ngai bawkah kan buai leh a, kumtina khêl lova kan lo tawh ziah thin a ni tih hre reng chung hian enghelh berah kan la nei lêm hlawm chuang lova!

Harsatna han tawh chiah hian keini hnam hi kan lo intodelh loh chikim zia hi a lo lang leh thin. Nawhalh fung khat takngial pawh siam chhuak lo, kan mamawh engkim state pawn atanga chaw lut ta chu hnam borual pawh han vaw alh ve viau thin mah ila, a mit leh rang thin teh e maw! A tel lova mi tam zawk kan awm theih loh, vawksa pawh vai hovin ei ngai hek lo le...Myanmar lam atangin kan châwk luh leh kan ngai ta zel tho!

Heti zawng hian ngaihtuahna i seng teh ang...nitin mamawha kan intodelh thei rih lo a nih pawhin intodelh theihna pakhat kan nei. Chu chu mihring chher chhuah (Human Resource Development) ah hian a ni. Helama tan an lak avang hian alawm ram te tak tê leh mihring pawh khawvel pum huap chuan ui hùm zah lek awmna Israel, Singapore, Japan etc te pawh khawvel ram ropui leh hmasawna an in hlankai daih chhan chu!

Zirna a ni emaw, sumdawnna a ni emaw, kut hnathawh a ni emaw...kawng engkimah hian ram pum huap ngaihtuah hmasa kher lovin, mimal leh chhungkua hi intodelh hmasa ila, ram intodelh kan ni mai dawn a ni. Civil Serviceah chauh hian Mizo kan mamawh a ni lo...mistiri, mutia, sumdawng, ran talhtu, hlawhfa thleng hian Mizo hian Mizo kan mamawh. Hnam chim ralna te hi heng thil ho tê, ngaimawh en pawha kan en loh atang hian a lo la chhuak dawn...i âwih loh chuan ni khat thilthua hnam dang Mizorama kawng hrang hranga eizawng ten an khaw lama Mizoram sum leh pai min thawn liamsak zat hi chhût mai rawh. Vai lapaw chini zuar takngial pawh hian a sum thawh chhuah hmun thuma thena hmun hnih hi chu Mizoram pawna a nupui fanaute hnenah a thawn thin (in ka ring!). Ram pawna kan thawn chhuak lo a nih pawhin kan ram chhunga mi tal hum tur hi chuan theihna, thiamna leh thluak tha kan nei a ni lawm ni? Chumi piaha kan la mamawh belh chu taimak leh teirei peih chiah a ni. 

Hawh teh u...kan changkan hma hian intodelh turin mihring hi i chher phawt teh ang u. Sangha ni lova lên inpek hmasak atang hian mihring hi i inchherin, i inzirtir thar leh teh ang u