Hnam Huaisen?

Keini hnam hi thianza ho zinga a dawih ber, thian te zara eng emaw hleka lo pâwr ve viau, a saseh leh a tak ram a lo thlena thian te chhanchhuah leh ngai ziah te hi kan ang deuh rohin ka hria!

UPSC results a han chhuak a, Mizo hming reng reng hmuh tur a awm lova. Chu tih laiin kan tlem pui, hnam dang thenkhata mite hming a lo lang a, kan helh leh viau lawi a! An taimak avangin anni chu an lang a, kan taimak tâwk loh (?) avangin kan lang ve lo a ni mai a, lo thik viau emaw, lo helh ve viau ringawt hian awmzia a nei thui lo angreng viauin ka hria. A saseh tak tak, a inelna mual tak taka hnehna chang hleithei mang si lo hian a kotlang atang hi chuan kan lo pâwr ve liau lawi a. Mahni ram chhung, tam ber kan nihna hmunah kan inhrosa a, hnam aiawhtu reng reng kan neih lohna leh kan mamawh ngawih ngawihna mual, UPSC mualah te, hnam dang nena inelna mualah te erawh thang kan chhuah leh hleithei der si lo. 

Silchar vai an thinrim ruala kan rama thil man a to nghal zel zia te hi thangkhat mai pawh ni lo, thang hnih thang thum chuang a ni hial tawh ang chu...hnam pumpui anga intodelh tumna kan la nei chuanh reng reng lo! Hnam thuthlung, ram leh hnam hmangaihna chuti kha ti kan ti a, harsatna tak tak a lo thlen meuh chuan mahni pawha in chhan chhuak zo lovin 'central' lama kan thian te min chhan turin kan au leh chung zel si! Muang leiah kan pâwr em em a, raltit hun a lo thlenin kan hnuaichhiah hnam dang te aia hma leh nasa in kan chiai leh lawi a. Hnam pumpui pum puarna khawp pawh la thar chhuak hleithei lo leh central sum tel lova la intodelh thei lo hnam hian 'independence' te hi kan la sawi ta dah a! Khawi ram mah hi mahni intodelh sa in an indang (independent) ngai hauh lo. Chu tih rualin, chung ram te chuan an ram leilung hausakna hman tangkai tur tal an la nei a. Anih loh vêk pawhin hruaitu tha leh huaisen, engmah lo atang pawha ram leh hnam ropui din thei te an zingah an la awm tal a. Keini erawh chu a enga mah mah hi kan la nei lo ve ve in a lang tlat mai si! Riltam a huaisen theih loh tih .nai miau a. Chu vangin, kei zawng, in-di-pen-den hi chu ka la zuam ve lo a ni!

Hnam huaisen, sa leh ral laka zam ngai lo kan ni kan ti thin. Hmanlaia kan pi leh pu, an mamawh engkim hnam dang puih ngai lova intodelh leh thawk chhuak te kha chu an zam lo reng ang chu...an neih ei miau hek lo! Keini ho hi he hla do chham thei dinhmunah hian kan la ding em? Chham ve ngam tur hi kan la ni meuh maw? 

Ram leh hnam kan hmangaih dan te hi kan zing leh vela hnam dang te ngaithei lo leh nêk chép zawng ni lo, kan vel leh kianga an awm reng chung pawha keimahni leh keimahni inchawi sang tawn zawnga kalpui te hi a hun tawh zawk lo maw?