Engnge I Thawh Chhan?

Vawiin chu kan thawhpui, kan senior, kum 33 zet college zirtirtu hna lo thawk tawh Pu RL Chhuanawma, superannuation pensiona chhuak tur thlahna hun kan hmang a. Kan hnah hlui te an til ta pheuh pheuh a, kum tin kan inthlah chho zut tan ta, a khawharthlakin, an hmun ruak a zau dawn hle mai.

Vawiina kan thlah tak, Pu RL Chhuanawma hian a thuchah hnuhnung chu hnukulh teuhin a sawi a, ka rilruah thu a sawi nasa viau mai.

Thenkhat hi chu taksa bawrhsawmna leh rokhawlhna sawi tur em em nei chuang si lo, service laia pension (pension si lo, hnathawk chuang si lo!) hi kan awm thinin ka hria! Hetiang mi hi pension hreh ber leh hlawh thlahlel ber ber an ni duh zêk lehnghal a. Vawiina kan thlah tâk Pu RLa hnukulhna ki erawh a dang hle. Ani chu kum 33 a thawh chhungin a hna hi a ning ngai lo a ni mai lo, a dah pawimawh ber reng a. Tin, a thawhna hmun hi a in pahnihna a ni tih a chiang a, zirtirtu a nih ang leh a eizawnna a nih anga a mawhphurhna a hlen piahlamah, college hmasawnna leh thatna tur nia a hriatah chuan theihtawp chhuah thin, thih thâ pawha college tan ngam, a in leh lo a hmangaih tluk zeta a hmangaih, a duat leh ngaihsak hmun chhuahsan tur a nih avangin a mittui tla kha awle mittui awzawng a ni lo tih hrechiangtu chu a thawhpui te kan ni. Khatiang taka a eizawnna hmun chhuahsan hreh leh a chhuahsan tur te pawhin kan ui, Pu RLa ang kha sawrkar hnathawk zingah hian engzah tak awm ang maw?!

Thenkhat hi chuan sawrkar hna kan thawh chhan hi a hnaa kan tui vang emaw, kan thiam vang emaw ni lovin,  'hlawh' a that/tam vang te hi a ni thin. Hna nghet a nih avang leh sawrkar hna a vân avanga an tuina ber pawh ni lem lo hna thawk ta hi an awm nual! Han chhût neuh neuh hian, kan officer zinga hna thawk tha lo, eiruk hmang, zelthel leh thatchhia te hi an hnaa tuina nei lo, thla hlawh bi nghet neih duh vang chauh va bansan phal tawh si lo te hi an lo ni châwk. Chutiang mi te chuan eng anga hna sang pawh chelh se, an eizawnna chu zirtirtu, engineer, doctor etc ni lovin eiruk, pu te tlawn, duham etc a ni. A chhan chu miten an sawi leh hriat dan atang hian a lang mai- eiruk hmang, duham,pamham, phakar....an thawh hlawh ni lovin an eiruk hlawh te, an phakar hlawh te an la tlat alawm! Pu RLa erawh chu chutiang a ni ve hauh lo. A chianna em em chu a chhuahsan tur departmenta zirtirtu indaih lohzia a hriatin a note neihsa pawh zirlai ten min la mamawh tâkin tiin a la dah tha a, puih an tul phawt chuan engtik lai pawha a pension hnuah pawh puih a inhuam reng thu a sawi tlat! A hna a thawh chhanah a chiang a, hlawh nei lo pawhin a hna duh leh tui em em chu thawh zel a pawi ti lo. Chu chu a ni 'zirtirtu hna thawk' dik tak chu!

Martin Luther King Jr khan he thu ropui tak mai hi a lo sawi a..."Hmun phiattu chuan Michel Angeloa'n uluk taka mawi taka lem a ziak ang leh Beethovena'n rimawi mawi leh ril tak phuah chhuak tura a theihna zawng zawng a sâwr thin angin fai takin phiat sela, vana mi thianghlim leh vantirhkoh ten a hnathawh an rawn hmuh pawha helaiah hian hmun hmun phiattu, a hnaa rinawm leh a mawhphurhna zo taka hlen thin a awm a ni maw," an tih ngeina tur khawpin phiat rawh se a ti. Eng hna nge ka thawh a, engnge ka thawh chhan tih hi nitin kan inzawh nawn fo hi a tul a ni.