Intodelh loh Rah!

 Ti lehpek teh ang! He covid 19 hri pui hian kan ram leh hnam hi min beng harh se a va duhawm tehreng em! A nihna takah chuan khawvel ram dang leh India state dang te pawh he hri pui leng avanga an buai nuai nuai tawh lai khan, keini ram chu him takin kan la awm a. Kan unau, state pawn atanga lo haw te zingah vanduaithlak taka vei te awm in, han chiai deuh mah ila, eng êm ti lovin kan la him zel a. Chumi hnuah sipai lo lut avangin kan state in covid 19 case kan neih zat pung chho hluaiin, vantlanga inkai darh hlauhawm tak dinhmunah te kan han din zuau zuau hnuah pawh, Pathian zarah anmahni sipai leh sipai bakah chuan vantlangah hri hi a darh lo niin a la lang ta zel a. Chutah le...kan ram kawng chhia, kum tam tak a chhiat ang anga ram hruaitu leh mipui te pawhin ngaia kan lo neih tawh, political ball atana kan hman thiam em em, kan kawngpui te chu an dan pangngaiin an han chhe leh ta a, an dan pangngai bawkin state pawn atanga Mizoram leh Mizo te nitin mamawh phurtu lirthei te an tangkhang leh ta thup mai. Kolasib DC hmangchang hriat vang liau liau vin (chu pawh ni eng emaw zat an tangkhan tawh hnuah) lirthei driver te chu test runpui an han nei a, covid positive an hmu ta nual mai! Chumi hnu lam chanchin chu sawi thui ngai lovin kan hria e.

Tunah chuan kan ramah pawh vantlangah hri a darh tan ta tih chu phat rual a awm lo. Kha leh chen kan thiam leh theih ang anga kan lo invenna te chu covid 19 chuan a rawn pal darh tan ta. Heti hian ka ngaihtuah a...hetia vantlanga kan lo inkai darh tanna hi chhan hrang hrang a awm thei ang a-vanduai vang, fimkhur loh vang, thuawih loh vang, mipui mimira test (community testing) tam tâwk loh vang etc. Mahse, kei chuan puhmawh tur lian tak pakhat a awmin ka hria....KAN INTODELH LOH VANG tih hi! Hriau atanga nitin a tel lova kan awm theih loh ei leh in, a tawi zawngin, engkima kan intodelh lohna hian kan covid hri pui pawh kan kawtkaiah a rawn chhawp ta ni berin ka hria. Hlauhawm a hnaih emaw, harsatna thleng tur âwm anga kan hriat a mamawh in lei khawm chûk chùk (panic buying) hi mi intodelh leh ram intodelh zia a ni ngai lo. Mi intodelh chuan muang leia a mamawh bak a thawh chhuah chu a khâwl a, tám a lo thlen emaw, harsatna a lo thlen changin lungphanna tur a nei lo thin a ni zawk. Keini chu a eng a maha intodelh ve ta lo na fam chu, intodelh tuma kan han in lam khawm ve chiam pawhin kan intodelh loh avanga ram dang atanga kan châwk luh te tho a ni lam khawm tur kan neih chhun chu!

Hei hi eng vang nge? Ram hruaitu thiam loh nge mipui thiam loh? Ka chhanna mâwl te chu hei hi a ni, kan rilru put hmang dik lo hi (hei pawh hian chhan tam tak a nei, kan sawi vek seng lovang). Kut hnathawktu, ei leh bara kan intodelh theihna tura kan innghahna in politician rilru pu a kut hna a thawh tlat a, ram leh mipui intodelhnaa kan fei lu zum ber, ram hruaitu ten contractor rilru pu-a ram an hruai a, ram a intodelhna atana sawrkar kut kê ber, sawrkar hnathawk ten hausak lungkham bera nei chunga hna an thawh a, ram leh khawtlang khalh ngil tur kohhran leh tlawmngai pawl ten Pathian leh ram rawng bawl lova 'pawl' rawng an bawl a, a ram neitu ber mipui ten neitu rilru aia chhiahhlawh rilru pu chunga nitin nun kan hman tlat chuan engtin nge kan intodelh theih tehlul ang ni!