Suma Lei Theih

Journalist leh Political commentator lâr, Fareed Zakaria hian sum/pawisa hmanga engkim lei theihna hmunah chuan nun phung kawng engkimah intluktlân lohna a awm thin tih thu a sawi a, a dik hle in ka hria.

Tunlai huna kan khawvel dinhmun, lei leh hralha sum leh pai innghahna nasatna hunah hi chuan hun dang zawng aiin sum/pawisa hian thil a ti thei ta em ni aw tih tur a ni. A ti fuh laklawh, a kaw zen fuh vêk vêk ten an hausakpui thûr thúr a, an neih belh ruih ruih laiin, a nei lo leh dinhmun tlawlh laklawh te lah an bet nghet tawlh tawlh thung a. Sum hian nunna chauh lo hi chu lei theih loh a nei ta lo em ni tih tur khawpin sîk tlûk theih loh bar pawh hi a nei ta lo ni hialin a lang. Covid hri pui lén mek lai pawh hian sum ngah leh ngah lo te dinhmun, dam khaw chhuak tura hun tha (chance/opportunity) an neih sân leh sân loh dan hi a inthlau viau thei âwm e...sawi zui duah lo mai ang.

Tunlai khawvela sumin a lei theih lo ni ta, pawi em em si a ka hriat chu mihring chhungril lam thianghlimna leh thatna (inner quality) hi a ni. Rinawmna,dikna,felna,taimakna etc...a tâwi zâwngin, mihring puitling leh rintlâka min siamtu ze tha tam tak te pawh hi sum hian a lo lei theih tlat tawh! Kum 1970/80 chho khan Columbia ram khuan hei hi a takin a lo tawng tawh a. Cocaine leh methamphetamine tawlhru thin drug cartel lian pui pui, sum ngah bawk si te khan an ram hruaitu politician te, dan hre mi te, police leh sipai bakah mipui te thlengin sum hmangin an lei a. Mi sàng chuang thattu leh damdawi tawlhru tu hmingthang, Pablo Escobar pawh an ram rorelna in sâng bera thu turin, mipui ten an aiawhin an thlang tling nawlh a nih kha!

Kan ram, Mizoramah pawh hian mi tam tak chuan kan chhungril dikna, thatna leh thianghlimna te hi kan hralh nasa ta hle in ka hria. Eizawnna a dik leh rintlâka hnathawh kawngah te, politics thianghlim khelh kawngah te, taimakna nena hlawhtlin tum kawngah te...a tâwi zawngin, mihring puitling kan nih theihna tur zawng zawng deuhthaw hi thenkhat hi chuan sum chang thei thilah kan siam a, a dik a dawk thlu lovin tu te hamthatna atan emaw hian kan hralh hreh ta tlat lo. Kan chhungril ze tha ber kan hralh tawh miau chuan pawn lam nunphung leh chêtzia-ah a dikin a thianghlim thut theih tawh si lova, kan ram leh khawtlâng nun chu mi dik leh rinawm te rahbehna, mi pamham leh suma lei theih te dinchanna ram a ni tiin ram leh hnam veitu te an insawh an insawh ta mai a nih hi!

Sap thufingin, 'Miin a nungchang a hloh chuan engkim a hloh a ni,' a lo tih hi a chhan bulpui ber, tha leh dik ni a kan hriat pawh ti thei lo/ngam lova tu te emaw sal beha kan awm tlatna chhan chu kan nun zia siamtu ber, kan chhungril nun thianghlimna, dikna leh thatna sum hmanga kan inlei tir thin hi a ni. 

Mi dik leh rinawm, sum hmanga an chhungril nun lei theih loh hi a dawihzep ngai lova, chu mi ep chiaha awm, sum hmanga an chhungril thatna  dikna, felna leh thianghlimna te hralh thintu mihring chu duh mahse a huaisen thei tawh loh va, ui, a nghâwnga a neitu in a hlin, a duhna lam lama a pawh káwi thin te nen hian angkhat reng an ni.