Khawpui Mi

Greek mi fing, Aristotle khan mihring te hi kan lo pian chhuah hian mihring kan la tling lova, kan rawn pian chhuahna leh seilenna boruak leh a vel, a sap tawng takin, kan environment chuan mihring tlingah min lo siam thin a ti a. Mihring chu khuai angah tehkhin in, khuai te hmun pui, an engkima engkim awmna chu an bu a ni angin, mihring chu khawpuia an awm chiahin mihring puitlingah an lo chawr chhuak thin a ni a ti a. Amah vêk hian khawpui awmzia hu sawifiahin, khawpui chu a chhunga park leh in tha pui pui hi a ni lova, a chhunga chéng te nunzia leh rilru putzia ten a siam a ni a ti a. Mihringin khawpui a din a, khawpuiin mihring a siam a ni tiin a tlip bawk. Aristotle-a thukhawchâng hi ngun taka ngaihtuah pawhin a dik hle in a hriat a. Changkanna engkim awmna hmun khawpui hi a chhungah mihring chéng awm ta miah lo se chuan 'khawpui' a tling pha tlat lo. Ti 'khawpui' tu tur mihring a mamawh tlat a ni.

A ni tak a...khawpui hi 'khaw-pui' a lo nih theihna chhan chu a chhunga chèng mihring an tam vang a ni a. Mihring tam na nâ nà chuan sum léng vak a lo tam a, eizawnna tur kaw hrang hrang a lo tam a. Mamawhtu an tam miau avangin mihringin a mamawh hrang hrang te pawh khawpuiah chuan a kim nge nge thin. Tin, khawpui chu mi tin fuankhawmna hmun a nih avangin, ngaihtuahna thar te, chîn dan thar te, tih dan thar te lo chhuahna...a tâwi zâwngin, ram leh hnamin hma a sâwn theihna tura thil hrang hrang bul rawn intanna chu ram khata an khawpui berah a ni deuh zel. Khawvel ram leh hnam hrang hrang te chanchin han chhiar a, han zir pawhin a dikna kan hmu thei a ni.

Chu tih rualin, Aristotle-a ngaihdan behchhan khian 'khawpuia chêng' leh  'khawpui mi' hi a danglam theih viau dawnin ka hre pek a! Mihring tam hrim hrim hi khua a lo puina kawng khat chu a ni teh meuh mai a. Tin, khaw tê leh mihring tlémna zawk khua te a awm lo hrang hrang awmna a nih leh nih loh pawh hian khua a pui leh pui loh/khawpui a nih leh nih loh a hril thui thei viau bawk ang. Mahse, eng khua pawh, khawpui a nih leh nih loh chu a chhunga chêng te nunzia leh rilru put hmang changkân leh changkân loh hian a hril berin ka hria. 

Chu mi tehkhâwnga hmang chuan heti zâwng hian i han sawi teh ang. Mizorama kan khawpui ber, Aizawl khawpuiah hian mihring nuai ruk chuang an chéng a, khawpui (city) pawh a ni ngei mai. Chu tih rualin, a chhunga chêng tam tak hi chu 'khawpui mi' ni lovin, 'khawpuia chéng' satliah mai an niin ka hria. Khawpuia chén ngawr ngawr hi ropuina ni se chuan, Mumbai khawpuia mi rethei te chenna hmunpui, Dharavi sluma chéng te khu chung en vang vang tur niâwm tak an nih laiin, kan chung en chuang hauh si lo. Chu ti ang bawkin, tam hrim hrim hi changkânna ni se chuan, Vairengte thlang lama hnam dany chénna khaw tam tak, kan Aizawl khawpui lêt eng emaw zata tam te khu keini ram khawpui lêt eng emaw zâta changkang tur âwm tak an nih laiin, an changkâng em em chuang dér si lo! 

Chu vang chuan alawm khawpuia chêng nazawng hi khawpui mi ni lovin, khawpuia chéng satliah mai an lo ni zâwk ka tih chhan chu! (Hetia ka han sawi hian Aizawl khawpuia chêng te ka sawi chhiatna a ni hauh lova, Mizoram chhunga kan khaw lian hova chêng te leh India ram mai pawh ni lo, khawvel ram tin khawpuia chêng te ka sawina zawk a ni). Pu Aristotle-a sawi ang khian, mihring te hian khua chu kan din ngei a, khua ti puitu ber pawh kan ni ngei mai. Chu mi rual chiah chuan, kan khawpui chu khawpui a nih takzet chuan a chhunga chêng te chu mihring puitlingah min chher chhuak tur a ni. Khawpuia chêng ni âwm reng nunzia leh rilru put hmang min neih tir tur a ni tihna a nih ber chu.

Thu fingin, 'Hmasáwn i duh chuan i ram khawpui berah chêng rawh,' a tih te hian a phênah thu ken ril leh pawimawh tak a nei a. Chu chu a chunga kan sawi, khawpui mi nih danglamna leh ram leh hmasâwnna atana a pawimawhzia sawina ni ah ka ngai (khawpuia chêng satliah ni lovin!)

Chu vangin, motor tam dan, mihring tam zâwng, building ropui dan etc te ai mah chuan, kan rilru put hmang, keini aia khaw tê zâwka chêng te kan ngaih dan leh hmuh dan, kan rilru put zia leh chêt phungah te hian kan khua chu khawpui a nih leh nih loh te, khawpui mi nge kan nih khawpuia chêng satliah tih te hi a lo lang fiah ber thin zawkin ka hre ta!