Tleirawl te nena rawngbawlna (Youth Ministry) Part II

Thupuiah hian tleirawl te zinga rawngbawlna tia dah âwm tak kan lo ti maithei. Mahse, chhan neiin heti hian ka dah a nih hi! A chhan chu kan sawifiah chho ang.

Tleirawl/rawlthar te hi mihring kum bithliah hrang hrang, naupang, puitling, tar zingah hian a laklawh, a lai lâi tak an ni âwm e. Naupan kalsan tawh si, puitlin la pha chiah si lo, naupan leh puitlin inkar vela awm an ni a. Rin viau dawn a, rintlak pumhlum chiah si lo, rin loh dawna rintlak fu lawi si, mahnia ngaihdan nei ve tan, ngaihdan puitling tak tak ni pha chiah si lo an ni a. Nun kawngah hrim hrim pawh kawng pengthuama an din lai, an hawi lam tur leh an dam chhunga an kalna lam tura kal tura kawtchhuah pawimawha an din lai tak a ni.

Chuvangin, tleirawl te hi ka tehkhin ber thin chu lui chunga lei dawh, a lehlam lehlam thlunzawmtu lei (bridge) te hi an ni. Panlai khawvel leh puitling khawvel inkar dawhzawmtu te an ni a. Lei tha leh nghet tak dawh tur chuan a dawhtute an pawimawh angin, tleirawl ten rawllai nun an hman laia uluk taka kaihhruai chuan an nun, rilru, thinlung leh ngaihtuahna te a nghet a, lei tha lo chu sik leh sa ten kum tam tak (a then phei chu kum tam pawh a ngai lo) a han nuai hnu chuan tuiekin, a lo mawih a, a lo chim ta thin ang hian, tleirawl te hi rawllai nuna an thinlung kan sawhnghet lo a nih chuan, puitling khawvelah an tlusawp leh fo thin. Chutiang bawkin, lei tha tak chungah chuan motor rit pui pui pawh tlan se, zo takin lei chuan a lo dawl thin a, ral lehlam a kaipui thin. Tleirawl laia an nun sawhngheha awm te chu eng anga harsatna, buaina leh hrehawmna rit pawhin delh thin mahse, zo takin an phur a, puitling khawvelah tha takin, kawng dik zawhin an buaina leh harsatna te an kaipui thin.

Chutianga kan tleirawl te thlarau lam leh hringnuna mi puitlinga chher chhuak tur chuan 'Tleirawl te nena rawngbawlna' hi chhungkua, kohhran leh khawtlang hian kan ngaih pawimawh lehzual a tul hle. Naupang  te hi ram, khawtlang leh chhungkaw tana kan hma hun (future) a ni kan tih chuan, tleirawl te hi chu naktuk maia kan hma hun (future) te an ni. Chuvangin, ngaihsak leh ngaih pawimawhna hun hi kan ngah lo. Tin, tleirawl te hi kan sawi tawh ang khan naupang chung, puitling hnuai si an ni a, rilru put hmang (psychology) hran nei an ni. Helai tak hi mi tam takin kan hriat thelh lai chu niin ka hria. Naupang hi puitling cheibawla cheibawl awmzia a awm lo leh puitlingin naupang chhawnchhaiha chhaih kual kan duh lo ang bawkin, tleirawl te hian naupang chhia anga en an duh lova, chei puitlin viau pawh an duh chuang lo. An phak chin tawk zela ring ngamtu, hautu ni lova fuihtu, thu petu ni lova tihpuitu, hnuai entu ni lova tlukpui ena entu, an dai pelh palh pawha diriamtu ni lova dawmkangtu a ni an mamawh. Chuvangin, tleirawl te 'zingah' rawng bawl lovin, tleirawl te 'nen' rawng kan bawlho a pawimawh. An hotu ni lova hruaitu te hi tleirawl te hian an ngaisang a, thununtu ringawt ni lova an thian ni tel hruaitu te thlazar hnuaia awm hi nuam an ti thin. Mi thenkhat chuan tleirawl pawl kaihhruai leh tleirawl te nena rawngbawlna kalpui dan kan thiam lo hi an ti leh ngawt thin. Tleirawl te kaihruai tur hian psychologist nih kher a ngai hran lo. An thianah insiamin, kan duh dan leh tuipui mil ni lo, an duh dan leh an milpui tur hian puitling zawk te hian kan rilru put hmang hi siamrem zawk ila, kaihhruai chungin an rualin kal ila, tleirawl te tluka kaihhruai nuam leh thuawih hi an lo awm lo tih hi a tak ngeiin ka tawng a, ka hre ve tawh tlat a ni.

Chuvangin, tleirawl te nena rawngbawlna (youth ministry) hi kan chhungkua, khawtlang leh kohhran hmakhua atan hian i ngai pawimawh thar leh teh ang u.