Khaw Hrana Lehkha Zir

HSSLC Result a chhuak a, kum dang leh hun pangngai chu nise, zirna sang zawk chhunzawm turin zirlai ten hmun hrang hrang an pan leh sang sang tawh ang a, an zirna leh an nun kawnga bung thar pawimawh tak an rap tan leh mek tawh ngei ang.  Mahse, chung zawng zawng chu kan hri pui leng mek hian a rawn ti thuanawp zova, engkim a chawl thuap ta mai zawng a nih hi.

Chu tih rualin, hla phuahtu in 'muanga chawl hman kan ni lo' a tih ang deuhin, hri pui karah pawh kan ei tur kan thawh chhuah tho a ngai si a, hri pui leng avanga nunphung buai tak karah pawh nunphung pangngaia nun hram hram a tuma kan tum a ngai si. Chutiangin sikul zirlai zir zova college rap tan tur te pawhin a theih ang angin college admission an buaipui chho mek a ni.

Keini college, Govt. Serchhip College pawhin zirlai eng emaw zat rawn lut tur te pualin admission drive te kan han nei ve a. Chu kan titihonaa kan thu khel pakhat chu Aizawl khaw pawn (Aizawl khaw pawn khua te hi zokhua emaw, thingtlang khua emaw an ni vek kher lo a nia!) atanga Aizawl collegea zirlai luh tum kan tam lutuk thin avanga kum tina kan buai thin chungchang hi a ni a.

Sawihona atanga zawhna ka rilrua lo lang ta chu, eng vangin nge Aizawl khaw pawn zirlai tam zawk te hian mahni khua a, mahni in lum atanga zir ve theih reng, Aizawl emaw, phai lam emaw hi kan tinzawn fo thin tih hi a ni.

Result tha tak nei, chhungkaw dinhmunin a tlin bawk si leh Aizawl khawpui emaw, phaiah pawh kal se college tha ber bera lut thei tur te hi chuan mahni khaw college leh sikul te en kân in, khawpui zawka zirna in tha zawk te lo pan chu nise ka hrethiam. Aizawl khaw pawna mi ten Aizawla zir hram kan tum a, Aizawla miten phaia zir hram kan tum a, phai vai rama mite pawhin ram pawna zirna in tha zawka zir hram an tum ve tho (a tling leh ti thei te chuan). Chu chu khawvel kalphung a ni. Tin, khawpui zawkah chuan zirna boruak hrim hrim pawh khawpui lo zawk te ai chuan a lo dang a, rualelna te a lo sangin, kawng hrang hrangin hlawkna tam tak chhar chhuah tur chu a awm ngei e.

Chu tih rualin, zirna sang zawk bei tura mahni khaw zirna in en kân a khawpui zawka nei leh nei lo, tlin leh tlin lova kal tam tak, eng teh ual mah zir chhuak mumal leh chuang si lo han hmuh hian thâ hi a lo na ve deuh thin.

Hmasawn tum tak tak leh thiam leh zirna kawnga tuihalna tak tak nena hmun hla zawk pan te hi a tawpa hlawhtlinga rawn haw leh te an ni tlangpui a. Chu tih laia zirna kawnga tuihal vang pawh ni lo, thian te an kal bo vek avanga chhuah tum ve satliah ringawt te, mahni eng ual ni chuang si lo, changkanna chi khata ngaia kal chhuak ve ngawt te hi khawpuiah pawh zirna in tha chang lo, haw leh zak tawh si, mahni khaw zirna in aia tha vak lem lova zu tâm tál a, eng ruai ni lova rawn haw leh ta mai te hi an ni duh khawp mai.

Chuvangin, zirlai te u, hei hi ka chah duh che u. Hlawhtlin tumna leh hmasawn duhna tak tak nei a, engkim huama pen chhuak tur i nih chuan si loh chuan, khawpui zawk, phai leh ram pawnah pawh awm la, i hlawhchhamna hmun a hla thlawn ting ringawt ang a, i hlawhchhamna man a sang thlawn mai mai ang. A tling leh thei te chu kal rawh se. Tling lo leh thei lo chung chuan kal chhuah tum ting lo mai rawh. Tin, in khuaa zirna in te kha khawpui lian zawka zirna in tam tak te aiin an nep bik lo asin. I awm chak em emna khawpui lian leh phai ram zirna in lian atanga zir chhuak zirtirtu thiam tak tak te an thawk a. I buaina ber chu zirtirna that loh vang leh zirtirtu te thiam loh vang lam ni lovin, 'khawpui lian zawka zirna in a nih leh nih loh' lam zawk a ni! I hringnunah mi ten khawi khawpui liana zir nge i nih tih leh, khawi khawpui zirna ina zir nge i nih tih atangin an teh dawn lo che a. Khawi hmunah pawh zirin, khawpui liana zirna in rap miah lo pawh ni la, i intodelh leh intodelh loh atang te, hringnuna mi hlawhtling leh puitling i nih leh nih loh kha a ni an teh zawkna tur che chu!

In khuaa zirna in leh zirtirtu te sit tur khawp khan engnge i nih tih lo inzawt hmasa phawt teh!