Sakhuana/Rinna leh Ram Rorelna

Let me pose a simple question:

Do the failure of the government becomes a failure of the faith and vice versa?

Iranian reformist cleric Hasan Yousefi Eshkevari, an ram Iran inrelbawl dan (Iran hi sakhaw {Islam} mal behchhana inrelbawl ram {theocracy} a ni) a duh lohna a sawi chhuah avanga kum 5 zet lungin-a tan tir thusawi hian ngaihtuah a ti thui ngawt mai:

"Sakhaw behchhana rorelna hnuaiah chuan intluktlanna leh hmasawnna a awm ang kan ti a, sakhaw puanzar hnuaiah chuan kan intodelh ang kan ti a. Mahse, chung thil chu a lo thlen leh si loh chuan sakhaw behchhan sawrkar leh ram chu a hlawhchham tihna a ni a, sakhaw behchhan sawrkar a hlawhchham chuan sakhua a hlawhchham tihna a ni. Chuvangin, sawrkar hlawhchhamna chu kan rinna (faith) hlawhchhamna a ni"

India leh Mizoram hi sakhaw tih bik nei lo (secular) ram leh state bakah mipui rorelna (democracy) tundinna ram a ni nâ in, sakhuana hian ram rorelna leh mipui rilru sukthlekah nghawng thui tak a nei a. Mizoramah pawh hian sakhaw thil nena inkaihhnawihna nei miah lovah pawh sakhaw thil hi a serh zinga a mei ang maiin hmaih a ni ngai lo (tawngtai, Pathian thu sawi/lam, Pathian hming lam leh Bible chang sawi rik etc). Chuti khawpa kan sakhua leh rinna la thutak leh ngai pawimawh hnam chu kan ni.

Chu tih rualin, politician atanga zu hmun thlenga Pathian hming kan lamna (sakhaw hruaitu leh helama inhmang te chu sawi loha lum an ni) ramah hian ram rorelna a fel tâwk lova, rethei leh hausa inkar a zau va, hmasawnna a thuanawp a, intodelh phei chu kan la hlat viau mai. Pathian hming kan lam a, sakhaw serh leh sang kan ngai pawimawhin kan la urhsun viau a. Mahse, kan sakhaw mi na te leh kan rinna (faith) chuan kan eizawnna dawhkan a thleng pha lova, kan inthenawm khawvenna a nghawng pha lova, kan sum bawm enkawl danah kawngro a su hek lo (an rinna avanga mi dik tak tak an awm tih erawh hre tel ila). Pathian hmingin thu kan sawi a, Pathian hmingin thil kan tiin ro kan rel a. Mahse, kan rilru, thiltih leh rorel dan phung erawh a pathian thu leh viau lem thin si lo.

Heng kan kalphung, rilru put hmang leh rorel phung dik lo leh fel lo hian ram hmasawnna leh hmelhmang te hi a nih tur ang a nih phak tir lo tih chu a chiang reng mai. Chumi piahah chuan, kan sakhuana leh rinna thleng hian hmuhsitawmah a chan tir ta em ni tih hi ngaihtuah tham tak a awmin ka hria. Pathian ringtu leh Pathian hminga ram roreltute hlawhchhamna hian kan sakhua leh rinna lungphum hi sawinghingin, rinna awmze nei lo leh sakhaw zirtirna hlawhchhamah a chhuah ta em ni? Chutiang bawkin, kan rinna leh sakhua ten kan nun leh thiltihah a nih tur ang an nih/thawh loh avang hian ram rorelna leh ram kalsiam thlengin a tuar ta em ni?