Youth Ministry: Tleirawlte nena Rawngbawlna

                  

Tleirawl te khawvel hi khawvel hriatthiam har tak chu a ni hrim mai. Panlai khawvel ata an rawn pen chhuak chhiah a, puitlinna kawngka-ah lut si lovin an rawn dak lawi bawk si a. He lai hun, mihring nuna sap hoten adolescence an lo tih tak mai hi mihring nuna hun pawimawh ber a nih loh vek pawhin, a pawimawh zual pathum zingah chuan kan chhiar hmaih thei hauh lovang. Tleirawl te hian naupan leh puitlin inkar khawvel hranah ngaihdan hra, rilru puthmang hran, a tawi zawngin rilru hran an nei ve tlat mai a. Chutih rualin, naupang, chhia leh tha hre hrang lo, nu leh pa te enkawl leh kaihhruainaa innghat ang kha i tawh lovin, ngaihtuahna mumal angreng tak an rawn pu thiam ve tawh a. Mahse, puitling zawk te kaihhruaina tel lo chuan an nun tawnhriat leh an ngaihtuahna-in thil dik leh dik lo a la thliar fuh tak tak thei chuang si lova. Chu vang tak chuan chhung tin te hian tleirawl enkawl hi hautak kan tiin, harsa kan ti em em theuh lo thei lo thin a nih hi.

Mihring hi humsual dai leh sual lam kawng a ni emaw, a tha lam kawng emaw a kal tur kan inthliar tanna pawh hi tleirawl lai hi a ni duh khawp mai. Telirawl/rawlthar sual hi tuna thalai tam zawk te pawh hian kan lo paltlang theuh tawhin a rinawm. Mahse, a tlangpuiin, a tam zawk chu puitlinna khawvel kan dailuh chinah kan insiamrem leh mai thin a. Thenkhat erawh chu an damchhunga an penkawina kawng pengthuamah an tleirawl nun chu a lo chang ta thin. Chu tak chu tleirawl te ngaih pawimawh leh ngaihven an tul em emna pakhat chu a ni. Naupang te hi nakin, hun lo kal tura kan hma hun tur te an ni kan tih chuan kan tleirawl te hi chu naktuka kan hma hun tur te an ni. Chuvangin, kan ngaihthat thiang lova, hnam leh ram innghahna reilote-a la rawn ni mai tur an nih avangin kaihhruai hi kan mawhphurhna mai pawh ni lovin, kan bat a ni.

Kohhran, khawtlang leh puitling zawk te pawhin tleirawl te ngaih pawimawh nachang kan hre chho zel a, a lawmawm hle. A bikin tleirawlte nena rawngbawlna (youth ministry) lamah hian Kohhran hian a thawhhlawk khawp mai a. Khawpui zawkah te phei chuan an pualin hun te siamsakin,  nasa takin Kohhran ten hma an la a. Chutih lai erawh chuan thingtlang lamah erawh a tlangpuiin youth ministry hian ngaih pawimawh leh dah pawimawh a la hlawh lutuk lo niin a lang a, hei hi tan kan lakna tur pawimawh tak a ni awm e.

Youth Ministry-ah hian kan Kohhran (BCM New Serchhip) leh Pathian zarah kum li tha erh awrh chu tawnhriat kan lo nei ve ta a. Helam kawngah hian mithiam bik kan ni hauh lo na in, tleirawl te nen (tleirawl te zingah ni lovin) a kan rawngbawlhonaa kan tawnhriat te hi tangkaipui kan lo awm mial takin han sawi chhuah ve hrim hrim ka duh a. Chuvangin, he article-ah hian mithiam te kuthnu a lang dawn lova, helama mithiam bik te zirchianna behchhan pawh ka nei dawn lem hran lo. Kan tawnhriat atangin youth ministry-a kan hlawkpui leh kan kalpui dan te ka han sawi mai dawn a ni.

Kum 2018 chhung khan kan Kohhran Committee-in a din, tleirawl te telna tur Junior TKP ah member 50 kan nei a. Kan naute hi chhungkaw rawn chawr chhuahna inang lo tak tak leh mize inang lo tak tak te an ni. Mahse, kum khat chhung kan han tih ho hnuah chuan kan inngaiin, kan inkawmngeih hlawm hle tawh mai a. Activity reng rengah member 35-40 chuang an tel zat zat reng mai. Chutiang anga youth ministry nuam tak leh nung tak kan neihna kawnga kan kalphung hrang hrang te chu tawi te te in han tarlang ta ila:

1.      An zirtirtu ni lova an thian anga awm hmasak:

Tleirawl te hi naupan lai nun kalsan tawh an ni kan tih tawh kha. Chuvangin, naupang anga tih tur leh tih loh tur (do’s and dont’s) hrilh a, thununna hmanga beih nghal chiam chi an ni lo. Chutiang kan hmasak vaih chuan hmun dang leh kawng danga min pensan tur hian hun rei nghah a ngai lo. Chu ai chuan anmahni zawlpuia awm hmasak a, kawm nel a, an tuipui ang tuipui a, an sawi duhzawng sawipui a, an nuih huna nuihpui a, an thian thaa insiam hmasak kan tum tur a ni. Kan naute nen kan inkawmngeih a, kan infiam bawrh bawrh ngam tawh chinah chuan thu tak pawhin han zilh deuh mah ila, hmangaihtu leh duhsaktu awka a ni tih an hriat tlat tawh avangin rilru chhia an pu tawh lo. Tin, kan naute hian an nuna an harsatna tawh ril ber-inngaihzawnna, ruihhlo chungchang leh chhungkaw chungchang thlengin min hrilh a, kan thiam ang tawkin kan titipuiin, kan fuih thin. Chu chuan nasa takin min inpawh zual tir a, thil kan tih hona kawngah min pui hle a ni. A tawi zawngin, tleirawl te ‘zingah’ rawng kan bawl lova, tleirawl te ‘nen’ rawng kan bawl zawk a ni.

2.      An mize mila enkawl thiam:

Mihring hrim hrim hi mize inang thlap kan awm lo ang bawk hian tleirawl te ah pawh mize inang lo tak tak  kan kaihruai thin. A then harhvang em em te, ze zawi em em te, sual lam awn sam em em te, nungchang tha em em te, lerh leh lerh lo te, rilru nah ma em em te....chawhmeh bai phuahchawpa duh duh thlak pawlh nuai ang deuh kan nih chang pawh a tam. A pawimawh ber chu kan naute mize hriat chian a ni. Mihringin sahuat lai kan nei theuh a, tleirawl te hian sahuata deh hi an haw zual tih hria ila. An mize mil ang zelin, luhlul deuh lakah dawhthei takin, rilru na hma te chu dimdawi takin, an zai ngai zelin zawi zawiin fuihin chhawm chho ila, chu chuan an nun kawng a hruai thui thei hle a ni. Chumi tifiahtu pakhat chu, kan naute hi zaipawl rawngbawlnaa la tel ngai lo leh, a then te phei chu zai hrim hrim ngaina lo te pawh an awm. Mahse, a tira tel peih chiah lo te pawh han sawm han sawm leh, hla zir paha an nuam tih zawng (movie nite, jam session, titi ho etc) nen han tih chhoh chuan a hlazir kha nuam ti nghal lo mahse, hlazir paha an nuam tih zawng kan tihpui thin hmang khan zawi zawiin nuam an ti chho va, a tawpah chuan hlazir nuam an lo ti chho mai thin. Tin, an chhungkaw dinhmun kan hriatchianpui vek bawk a. Chumi mil chuan anmahni pawh beisei dan tawk kan neih thiam phahin, kaihhruai dan tur kan hriat phah thin.

3.      Hauh aia sawipui, zilh aia fuih:

Tleirawl hun hi kan taksa leh rilru pawh a than chak lai ber hun, puitling tura kan taksa pawh a insingsak chhoh hunlai a nih avangin, a hmaa sawi tawh ang khan sahuata inkhawihsak kan huat hunlai ber a ni. Chuvangin, tleirawl te hian dai pelh palh leh tihsual palh tam tak an nei ngei ang. Chutiang hunah chuan hauh aia sawipui a, tawngkam tha hmanga hrilhfiah mai hian an thinlungah thu a lo sawi thui zawk fo. An tihsualah kan zilh a nih pawhin fuihna thu in a tawp khar thin ila, chu chuan anmahni-ah chona a thlen thin. Kan naute zingah inngaihzawnna chungchangah te, nun phung chungchangah te han hrilhfiah leh zilh te pawh kan nei thin. Mahse, fuihna leh titipuina hmanga kan enkawlna chuan nu leh pa te talhfiak leh hauhna awka rum aiin thil a lo ti thei zawk tlat thin. An ngaihzawng nungchang tha lo then phah ta hlauh te, an thian dukdak lo kawm thlah ta te pawh sawi tur kan nei ve tlat.

4.      Anmahni zawlpuia awm thiam/peih:

Tleirawl te hian thian an mamawh a, thian kawm nuam an ti tlangpui bawk. Chuvangin, hotu leh zirtirtu aiin thian, an kawm theih leh an thurualpui theih an mamawh zawk. Tleirawl te nena rawngbawlnaa hruaitu atana ruat i nih chuan i kum leh hi nihna avangin an zahin an hruaitu en dawn tho tho che. Chuvangin, a hranpaa va inlak hotu viau emaw, thununtu (disciplinarian) i nih va lantir tum hranpa kher a ngai lo. Chutiang chu anmahni hnawh tiauna hmanraw tha ber a ni. Chutiang ni lovin, anmahni zawlpuia zu chhukthlak a, an tualzawla zu infiampui a, zu hlimpui a, zu kawmtu nih hmasak zel ila. Chuta tang chuan hruaitu anga tawng a ngaih hunah pawh zirlai angin kan thusawi an ngithla tawh mai thin a ni.

5.      An tui zawng leh chak zawng tak hmanga kaihhruai:

            Tleirawl te hian chhinchhiah leh en bik (noticed) hi an ngaihlu thin viau mai. Tin, tui zawng, thiam thil leh theihna inang lo tak tak an ni kan tih tawh kha. Chung an tuina, thiamna leh theihna te an pholan leh hman chhuah tam theihna tur zawngin kan activity/programme siam thiam a pawimawh hle. Music ngaina tan music, lam (dance) thiam tan lamna, zaimi tan zaina, thuziak mi tan thuziahna, chutiang zelin fiamthu thiam, thusawi thiam leh zaithiam te pawh hmun leh hun pek thiam a pawimawh hle. An tui zawng tak leh an thiam zawng tak hmang tangkaia kan kaihhruai thiam phawt chuan a hruaitu-in kan peih chhung chu tleirawl te hian an peih (chumi piahlam thleng pawhin!) tih kan chiang e! Chutih rual erawh chuan, thiam thil bik nei hranpa lem lo te tan pawh kan zingah hmun pawimawh an luah a, kan ngaihlu a ni tih lantir tura tawngka leh tihtur/chanvo siamsak theihngilh loh a pawimawh hle. A pawimawh berah chuan kan youth ministry chu nung (lively) sela, huapzo bawk sela a tha ber mai.

6.      Kan ngaihven a, kan ngaihtuah a ni tih chetzia leh tawngkama lantir:

Tleirawl hun hi nu leh pate aia thiante thu leh hla an ngaih pawimawh hun, a tam zawk phei chuan an harsatna leh lawmna te pawh an nu leh pa te aia an thian te hnena an sawi tam zawk hunlai, a saptawng takin ‘peer group pressure’ in a nuai nat hunlai a ni. An damloh te, harsatna an tawh chang te, eng emaw activity kan neih a an tel theih loh te, an exam lai te, an lawmna leh hlimna, an thil tawn kawng hrang hrangah eng ti thei lo mah ila, kan ngai pawimawh a, kan hre reng a ni tih tawngkam leh cheziaa kan lantir tam a pawimawh. A tlangpuiin tleirawl te hian ngaih pawimawh, ngaihven leh ngaihsak an duh thin. ‘Attention seekers’ an ni kan ti thei awm e. Chuvangin, kan theihnghilh lova, kan hre reng a ni tih lan tir tam a pawimawh hle.

7.      An duh dan zahthiamsak a, an thurawn/ngaihdan ngaihthlaksakthiam:

Puitlin zir mek an nih angin tleirawl te hi kan ruahmannaah a tam thei ang ber tel tir a, an ngaihdan leh duh dan te a tha famkim lo a nih pawh a pawmsak a, phur taka dawnsawn sak thiam a pawimawh hle. Chumi hnuah a tha tura her rem pui leh mai tur a ni. vawilehkhata kan lo hnial fithlak zel chuan an inrintawkna leh phurna kan vaw chhe thei. An rilru puakchhuak hmanga thil kan tihpui thiam poh leh anmahni-ah inrintawkna leh phurna kan pe zel zawk a ni.

8.      An tan theihtawp kan chhuah a ni tih lantir/hriattir:

Tleirawl hun hi tha zat hun lai a nih angin tleirawl te hi an tui zawng leh nuam tih zawngah chuan an phur em em a, kaihhruai pawh an nuam. Chutiang taka kaihruai a, an rilru hneh tur erawh chuan taimak a ngai hle. Hruaitute phur lo deuh leh peih lo deuhva an hmuh chuan hun reilote chhungin an danglam leh vek thei. Chuvangin, tleirawl hruaitu ni tur chuan phurna leh inpekna kawngah anmahni tlankhalh thei nih a pawimawh hle a ni.

9.      An chunga rinna nghah ngam/rin tawk ngam:

Puitlin zir mek, zirlai an nih angin fel tawk lohna tam tak an nei ngei ang. Mahse, tleirawl te hi sawi tawh angin an tha zat lai, an rilru chak lai tak a ni tih hriat reng a pawimawh hle. Fel tawk lo/tha tawk lo deuh pawh nise an kovah mawhphurhna pe ngam ila. A hlenchhuah kawngah duhthu an lo sam lo deuh a nih pawhin hnualsuat mai lovin, an kutah nghat ngamin, ring tawk tlat ila. Chu chuan anmahni-ah nasa takin mawhphurhna lak leh hlen kawngah a zirtirin a kaihruai thei a ni. Kan rin ngam loh va, kan rin tawk loh chuan chu chu an nihna (identity) ah an ngai mai. Chutiang chiah chuan kan rin ngamna chin zelah ke an rawn chhep ve chat chat zel thei thung a ni.

10.  An nu leh pate lamtanga siam:

            Tleirawlte hi nu leh pate thuhnuaia la awm, naupang ai pawha nu leh paten an thunun uluk zawk an ni fo. Chuvangin, tleirawl te nena rawngbawlna (youth ministry) reng rengah nu leh pate thlawpna (support) tel lo chuan rawngbawlna hlawhtling neih a har hle. Nu leh paten an rawngbawlna an thlawp loh chuan anmahni ngei pawhin reilote-ah an tuina leh phurna an hloh mai thin. Chuvangin, hruaituten nu leh pate thurualpui/lamtanga siam a, in lamah nu leh pa, pawn lamah hruaituten, chutianga tan kawp a, lungrual taka rawng bawl ho a nih chuan hlawhchham a har hle thung a ni.

11.  Tleirawl rawngbawlna hmanga Kohhran leh Thalai huangchhunga tui tir/nuam tih hmasak tir:

Mi tam takin kan hriat fuh loh fo leh tleirawl rawngbawlna huang sawisel a hlawh fona chhan ber nia lang chu rawngbawlnaa an tui tih kan hriat ruala kohhran huang chhunga engkima tui nghal leh inhmang tha nghal vek tura tleirawl te kan beisei thin hi niin a lang. A tlangpuiin tleirawl rawngbawlnaah hian tleirawl te hian Pathian rawngbawl leh Kohhran an ngaih pawimawh em vang lam aiin, an nuam tih zawng leh an chak zawng, an nu leh pate remtihna thlap ni bawk si a telna leh inhmanna tur an hmuh vang a ni tlangpui. An tuina leh chak zawng tak hmangin Kohhran huangah kan hruai lut ang a, nuam ti taka an tel hnuah leh Kohhran thiltih nuam an tih hunah chuan nawr luih ngai lovin Kohhran huang chhung nuam an tiin, Kohhran thiltih an rawn ngai pawimawh mai ang. Chumi tur chuan dawhtheih leh nghah peih erawh chu a ngai. Thawk leh khata Kohhrana inhmang nghal em em tura kan beisei chuan, an zirlai nen, an tleirawl rilru nen, anmahni-ah tul lovin pressure kan siamsak mai mai zawk thin. Tin, hemi kawngah hian Kohhran leh thalai, upa zawk te pawhin tleirawl te rilru mila an telna leh inhmanna awm tawk kan ngaihtuahsak a, kan buatsaihsak thiam a pawimawh hle.

12.  Mahni inrintawkna nei tura fuih tam/zirtir:

An tleirawlpui, a bikin hmun dang/kohhran dang te aia an nep bik lohzia, an zei/thiam zia leh an zahpuiawm lohzia hrilh nawn fo thin a pawimawh hle. Tumah chung en bik lo tur te, miin an theih chuan an thei ve a ni tih te hrilhhriat tam a, an kova tla mawhphurhna leh an hmachhawn apiang chu hneh taka hlen zel thei tura theihna (potential) leh thiamna (skill) an nei a ni tih te hrilh a, anmahni pawha engkim hmachhawn thei tura buatsaih leh fuih a pawimawh hle a ni. Chu chuan an puitlin hnu thleng pawhin an nun kawngah a kaihruaiin, mahni inrintawkna a pe thin dawn a ni.

13.  An thlavang kan hauhsak tlat a ni tih hriattir leh lantir:

An thiltihna kawnga an tihsual leh fellohnaah te kan hrilhfiah a, kan zilh a nih pawhin an dikna-ah chuan an thlavang kan hauhsakin, an kiangah kan ding reng dawn a ni tih hriattir a pawimawh hle. Chu chuan anmahni-ah harsatna buaina an tawh chang pawhin thlamuanpui tur leh rin tur an nei tih an inhria ang a, rawngbawlna kawnga kan inpawhna a ti nghet lehzual bawk dawn a ni.

14.  Adolescescence Psychology leh Youth Ministry lam lehkhabu/thuziak chhiar tam/chhiar zau:

Tleirawl te hian khawvel changkanna leh hmasawnna an man zung zung a, a tha leh tha lo lam pawh an chhar chak hle. Chuvangin tleirawl rawngbawlnaa hruaitu chu engtik lai pawhin a intathriam (update) peih tur a ni a, an khawvel (tleirawl te) khawvela thil thleng te a man thiamine, a hre thiam ve ngei tur a ni. Tin, tleirawl te enkawl dan leh an rilru puthmang hre chiang turin amah a inchhiar zau a ngai bawk. Hetiang lam lehkhabu hi online-a chah theih leh lei theih eng emaw zat a awm a. ‘Adolescence psychology’ tiin emaw, ‘Youth Ministry’ tie maw in google-ah emaw, online shopping sites-ah te zawng ila, chhiar tur lehkhabu tam tak a awm. Tin, youth ministry kalpuitu kohhran leh pawl hrang hrang te website tlawh tam te, helam kawnga article mithiam te ziah chhiar tam te a tangkai hle. Youtube-ah pawh helam kaihhnawih video en tur tam tak a awm. Kan peih leh peih loh a thu zawk a ni e!

A tawp berah chuan tleirawl rawngbawlnaa hruaitu tha ni tur hian thalai zinga a kum upa apiang an tha ber lova, a kum naupang apiang pawh an chhawrtlak chuang lo. A pawimawh berah chuan tleirawl rawngbawlna tuipui mi, mi inzir peih leh taima, anmahni hre chiang tura zir peih leh kawm peih mi, tleirawl ten ‘hruaitu’ en a an en theih leh nunphungah pawha an ngaihsan leh chung en te hi an tha ber a ni.