Face Book

 

            Tun tuma kan ‘Face Book’ sawi tur chu Mark Zuckerberga’n a hausak pui lawih ‘Facebook’ kha ni lovin, Pathianin a siam, ka/i hmel hmai lehkhabu (Face Book) zawk hi a ni a, chuvanga kan article thupuiah pawh ‘facebook’ ti lovin ‘face book’ ka han ti kher kher a nih hi!

            A ni lah tak a, he face book hi chu American tlangval, Mark Zuckerberga’n a hmuh/siam chhuah facebook nen inanna lai nei bawk mah se, a inanlohna lam hi sawi tur a tam zawk ngei ang. Face book chu facebook (a danglamna i hre tawh ngei turah ngai ila) mitinin kan kawl vek a ni tlat mai. He face book hmang tur hian mobile handset man to a ngai lova, tunlai khawvel thiamna hriat leh thiam, a tawi zawngin ‘techno’tak nih a ngai ve lo. Mihringa chhiar i nih a, mihring i tling a nih phawt chuan face book hi a thlawna pek leh chhawmtir nghal zel i ni. Chu vang chuan, he face book hi chu facebook te anga midang ngaihsak hman lo lek a kheuh neuh neuh leh en chet chet a ngai lova, khawih thiam tura inzir viau a ngai hran lo. Amaherawhchu, hmang thiam tur erawh chuan inzir ve deuh chu a ngai thung.

            Kan face book phekah hian han keu leh tur leh chinleh tur, facebook tawngkam takin browse tur a tam ve hle. Hlimna keu chhuah chang a awm a, a phek lehlam chiahah lungngaihna leh thinrimna, hmuhnawm leh en nuam lem lo tak te pawh keu chhuah tur a awm. Nui hmel mawi hmuh tur a awm a, a phek lehlamah titau hmel pawh a hmuh hmaih theih loh. A tawi zawngin, kan face book hi mihring min ti mihringtu ber a ni te pawhin ka hria. Kan hlimna leh lawmna, thinrimna leh tauhna, lungngaihna leh lungawina, nelawmna leh mi huat hlawhna...mihring ze siamtu pawimawh zawng zawng leh a lan chhuahna handset (hmel) pawh he face book-ah hian dah luh sa diam (in-built) vek a ni. Chu face book hmang thiam te chu a thenin midang te ngaihsan leh zah an inhlawhtir a, a thenin mi huat an hlawh phah bawk. Chutih rualin, facebook kan khawih tamna ber mobile handset-ah pawh a kimtlang mawi leh duhthusam, man to tak tak a awm ang bawkin face book-ah pawh hian a puan man to leh man tlawm deuh chu a siamtu, vanram company leh a CEO, Pathian khian an lo siam ve miau avangin face book duhawm leh duhawm lo te, mi hip em em leh hip lem lo te pawh kan kat ve nuk tho! Mahse, thil reng reng chu a hmangtu azir hian a lo danglam thei khawp tih chu tingtang hrui ruk nei theuh theuh ka in perh nalh hleihzia te, kan face book-a hmanraw (application/app) tangkai ber te zinga mi, kan hmui inthemthiam hleihzia atang hian a chiang mai awm e. Facebook aia face book a that em emna pakhat chu face book chu thawm mawi leh thawm that (upgrade) ngai miah lovin a hmanraw pawimawh (apps) heng mit, beng, hnar, hmui leh ka te hi a tangkaina a bo ve thei lova, a hlui ve thei lo tlat mai hi a ni. Chutih rualin, chei peih deuh leh thawm mawi peih deuh erawh chu a peih lo te nen khaikhin chuan kan dinhmun pawh a inthlau zung ve tho bawk a. Peih leh peih loh hian kan face book lan dan leh nih danah kawngro a su thui ve viau thei a ni.

            Thenkhat ten kan face book thawm mawi leh thawm tha (update/upgrade) lem lova a nih ang anga kan hman mai laiin, thenkhat erawh chuan nitin chu sawi loh, chawhma leh chawhnu-ah pawh kan face book profile picture (hmel) kan siksawiin, kan siam danglam chamchi a (a bikin hmeichhia te!). Chutiang lam ni lem lo pawhin, kan face book profile picture chu kan hun leh boruak tawn azir te, kan kianga awm azir te pawh a ni mahna, kan thlak zing malh malh hlawm hle.A hma lawka pro pic (kaitawi ve tawh mai ang) a nelawm leh mi hlim thei tak ni-a lang pawh kha a hnu lawkah chuan rul chukna mi ang hlar pro pic han hmang leh ta mai te pawh an awm a. A face book pro pic han en mai chuan rintlak leh rinawm hmel tak kha, a profile (hringnun) han bih chian a, rei tak han chhuizui (follow) chuan a lo depde hle si a! Facebook a kan pro pic kan uluk tluk zet hian kan face booka kan pro pic hi han thlang uluk deuh hlek thin ta ila chuan min neltu leh kan bula awm nuam ti-a min faktu (likers) te pawh hi kan ngah thin tur! Nula tlangval te face book pro pic phei hi chuan min bum hnem narawh e maw! An facebook pro pic-a an lan dan hi a cheimawina khawl hmanraw (application) chi hrang hrang hmanga uluk theihtawpa an cheimawi a nih miau avangin, a takah chuan beisei an lo pha leh chiah thin lo! An face book pro pic pawh chutiang tho chu a ni. Thinrim thei lo face book pro pic hmang thin kha inneih hnuah chuan thinrim pro pic hman tur a lo ngah ngang mai a lo ni a. Ka hmuh chhuah leh siam chhuah a nih hi ti ang ziazanga ar tui awp khur leh vil tlat thin mai pawh kha inneih hnua a face book pro pic chu inngaihzawn lai nen chuan a lo inpersan hle mai! Hringnun ziarang lanna ber a nih miau avangin kan face book hi kan vawn uluk a, kan pro pic hman te pawh kan uluk hi a va tul tehlul em. Facebook-a kan inpholan duh dan te, kan thu ziah (post) duh dan te hi a nihna takah chuan kan face booka kan inlanchhuahtir duh dan leh sawi duh zawng te hlimthla a lo ni duh khawp nia. Purun sen ang deuha kheh thuk apiang a lo var thianghlim sar ang hian kan face book hmanga a chhunga awm (nun zia) miten an rawn chinleh nasat zawh poh leh kan thianghlimzia te hi han hmu tam telh telh se zawng, likers kan ngah teh ang chu! Eng pawh chu nise, i face book kha lo vawng ulukin, mawi taka i lan theihna atan i pro pic duhthlan kha lo fimkhur zel phawt mai teh.