Hringnun-I

“Hringnun hi ka dawn thin a, hlimthla ianga ral mai tur” tiin Dr. Ramdinthara Sailo chuan hringnun lamtluang hi hla thu hmangin a lo chhui a. Chutih rual chuan hlimthla ral leh mai thin tho hi hun danga kan hlimthla lo lang leh thin hi a lo ni leh a. Hunpui kan hmang zo va, kum thar kan lo chuangkai leh ta a. Chu kum thar pawh chu kum hlui liam ta tho kha a ni lawm ni? Engkim Khuanu ruat ang thlapin, zing ni chhuak atanga tlai ni tla, sik leh sa inthlak zawng zawng te pawh kum hluia an hunbi vawnah chiah kumtharah pawh a ngai te in an rawn inher leh thin. Kan nil eh thlabi chhiar pawh kumhluia a nambar tho kha kumthara kan nambar chhiar chu a lo nil eh a. Hnah hlui te an til a, hnah tharin a rawn thlak a, hnimhnah te an lo chawrno leh thin kan tih te pawh hnah thar diai lo chawr chhuak leh ni lovin, chhuah hun leh chawr hun a inan loh avang mai a, hnah hlui leh thar chan lo chang thin te hi a lo ni mai mai awm asin!

Kum tharah rilru tharin kan han ti a, mahse, kumhluia kan hlimthla bawk chu ni leh thla a lo vei a, kan hlimthla bawk a lo ni leh fo va. Nizanah kan thianpa pa ruang hmuakin kan tlaivar a, vawiinah thlamualah kan invui liam a. An chhungkaw tan chuan kum thar bul/kum bul tanna duhawm lo a va ni tehlul em! Mahse, chu thihna hlimthla tho chu nungdama la awm zawng zawng te pawhin nakinah chuan kan hlimthla la ni ve leh tho tur, mitthi kan nih huna nungdama la awm ten he leia an hlimthla la hnutchhiah ve leh tur, chung mite thihni-a nungdama la awm te pawhin an thihni a lo thlen ve hun a an hlimthla ve leh tho tur chu a ni. A tawi zawngin, kan hringnun kawng zawh hi inang lovin, mahni kawng kawngah peng theuh mah ila, chik taka han chhut chuan kan Bible-in, “Thil hluite chu a ral ta a; ngai teh u, a lo thar ta-II Kor 5:17’ a tih hi mawlmang taka (Bible zirmite zir, hrilhfiah leh chhuizau dan lam ngaihtuah miah lovin!) han ngaihtuah a, kan hringnun nen han hmehbel pawh hian a lo dik thui fu mai. Hmana incheina/inchei hmang (fashion) kan hluihlawn tawh te kha tunlaiah a lo lar thar leh a (hmeichhe kekawr tlang arh leh inchen tluan chhuak (parallel) te pawh kan nu leh paten an lo uar hmasa tawh a!) Kar hmasa Pathianni tuka puar el euha kan vawksa ei ang tho kha a karleh Pathianni tukah vawksa dang kan puarpui leh a. Kan mihlim te leh thlaraumite pawhin kum sang engemawzat kaltaa an lo tuipui tawh Pathian thu tho kha vawiinah an lo dawn thar tuipui ve leh em em tho va. Pathlawi leh nuthlawi te pawhin an kalsan tawh (emaw an tih?) nulat tlangval khawvel atangin an tuaitir len thar leh fo a ni lawm ni?! ‘Tunlai khawvel chu thalaite khawvel a ni tawh’ kan tih fo te pawh hi kum zabi 3na vela thalaite pawh khan thalaite khawvel,an hunlaia an tunlai khawvela an ngaih ve tho kha vawiinah hian kan lo her lum ve leh mai mai a lo ni a!

Chhungkua pawh hi nu leh paten an din chhungkua atangin faten chhungkaw thar an lo din ve leh a. Chu chhungkaw thar pawh chu an rawn chawrchhuahna chhungkua ang bawk in ‘chhungkua’ a lo ni ve leh a. Chutiang chuan chhungkaw dintute atang bawkin chhungkaw dintute an lo chhuak zel a. Khawvelah ‘chhungkua’ bak chhungkaw dang a awm miau loh avangin chhungkua chu hlimthla anga a ral hnuah pawh chhungkua bawkin a rawn thlak leh thin a lo ni. Kan lo piang a, kan thi leh a, chutiang bawkin an lo piang a, an thi ve leh tho! Khawvelah hian thil thar tiha chhal tur hi a lo awm chiah em tih te hi ka ngaihtuah thin. Thil thar hmuchhuaktu pawh hian thil hlui hi awm lo ta se thil thar a hmuchhuakin, hmuchhuak tur pawhin ngaihtuahna a seng thiam tawp nang! Thil a lo hlui avanga a thar lo awm thei chauh a ni miau va. Chu thil thar pawh chu nakinah thil tharin a rawn thlak leh hunah chuan a lo hlui ve leh ringawt mai dawn a. Chuvangin, a lehlam taka ngaihtuah chuan hringnun kan thlakhlelh em em pawh hi a lo ho viau hi a lo ni. Kan thian leh lungduh te kan thlahliam ni-ah chuan mihring hi chu kan lo va ho tak em, hetiang hian kan la liam ve vek dawn chu a ni si a tiin kan inngaihtuah hnim a. Mahse, chu hringnun ho tak thlalel chuan neih thing lung khawng bakah tlem nen kan nunna dawrawm tak chu second khat lek pawh pawhsei hram tumin tan kan khawh lawi si chu a nih hi. Nula tlangval inngaizawng te pawhin tawnthar di an tawng a, an lo inthen palh a nih pawhin tawnthar di dang an va tawng leh tho va. Tisa nawmsak duhin hahthi kulin hna kan thawk a, a dik a dawk thlu lovin thenkhat phei chu thahnem an ngai fal a. Mahse, an thawhrimna an chen tak tak hma in an vanglai a lo liam hman a, an thawh hahsa chu an tu leh faten an rawn nawmsakpui a. Chung tu leh fa nuamsa te pawh chuan theihtawp chhuahin han thawk ve leh mahse, an thawhrim rah zahve an tel hma in mual an liamsan leh a, an tu leh fate bawkin a zar an lo zo leh thin. Chutianga han ngaihtuah chuan kan thawhrimna leh taimakna te pawh hi kan tan ni lovin, kan hnunga mite tan zel hian alawm lo chhawrnahawm zawk zel le! Uluk taka kan duan leh kan sak, ‘ka/kan in leh lo’ tia kan chhal te ngei pawh nakinah chuan midang in leh lo a nil eh daih dawn! Chu chu hringnun chu a ni; Thil hlui te an lo thar leh a, thil thar te an lo hlui a, chhuan thar te an hlui a, chhuan hlui te an lo thar leh thinna khawvel chu!