Hnathawh

                                  

Mizo khawtlang nunah hian hnathawh hi ei hmuhna a ni satliah mai lova, kan nunphunga bet tel tlat leh hnam ang pawha min khaidingtu ziding pawimawh ber te zinga mi a ni tiin a sawi theih awm e. Kan khawtlang nuna kan ngaihhlut, heng tlawmngaihna leh taimakna te ngat phei hi chu hnathawh/kut hnathawh nen a inzawm tlat a ni. Chu vang chuan kan pipute khan hna pawh an lo thawk nasa thin reng a ni.

Tunlai khawvel, kum zabi 21na khawvelah ah hian khawvel hun (era/epoch) dang zawng aiin mihring te hi kan thawkrimin, hna kan thawk nasa nia sawi a ni.Organization for Econmic Co-operation and Development (OECD) in kum 2017a a zirchiannaa a lan dan chuan heng te hi khawvel ram zinga kum khat chhunga hna thawk tam/nasa zual te an ni (coutesy of www.telegraph.co.uk):

1.Mexico                      -  2255

2. Costa Rica               - 2122

3. South Korea - 2069

4. Greece                     - 2035

5. Chile                        - 1974

* Number hi kum khat chhunga chawhruala an hnathawh zat darkar a ni.

OECD zirchiannaah hian ram hausa zingah USA 16na (1783hrs), Japan 22na (1713), United Kingdom 26na (1676), Germany 38na (1363)niin, India chu top 50ah pawh kan lang pha lo. Chu tak chu kan chhuizau tur chu a ni. OECD zirchiannaa top 5 ram te khi khawvel ram hausa leh thiltithei ber ber (global power) tia sawi tur an ni lo. Ei leh bar leh sum leh paia ram hmasawn leh hausa zawk te chungah an awm lawi si. Chu chuan rual an el zia leh an taimakzia, ram hausa leh thiltithei ni ve tura thawhrim nasat an ngaihzia a hriatchiantirin, a kai harh ni maw, hna an thawk nasa em em hlawm ta mai a nih khi!

Mizo te hi taima tak tak leh thawkrim tak tak engemawzat kan awm laiin, a nawlpui hi chuan kan theihna (potential) hi kan thawk chhuak phak lo/thei lo em ni tih hi ka ngaihtuah thin. Chumi rual chuan, hna thawh nasat mamawh ber leh khawvel rual pawl pha tura thawh mamawh nasa ber te zinga mi kan nih vei nen, eng vang hian nge a hnam anga hnam thawkrim leh taimaa hnam dang chu sawi loh, keimahni ngei ngei pawh hian kan inhriat a, kan inhmuh theih tak miah loh mai le? Chhanna leh hrilhfiahna tam tak awm thei te zingah thil pakhat chauh han thlurbing dawn teh ang. Chu chu ‘hnathawh’ kan ngaihdan leh hriat dan (concept) hi a ni.

A tlangpuiin hnathawh/hna thawk kan sawi hian Mizo rilru-ah chuan thlur hnihin kan thenin a lang-hlawh neia thawk leh hlawh nei lo/petu awm lova thawk. Heng hnathawh chi hnihah hian a hmasa zawk hi a lo hahdamin, a lo hlawk zawk (?) tlangpui bawk nen, a hnuhnung zawk ai hi chuan khawtlangin kan hmuh leh ngaihdan pawh a sang zawk niin a lang a. Tin, hlawh neia thawk te chu an hnaah pawh an lungawi (satisfied) tlangpuiin a lang. Hei pawh hi chhan hrang hrang-ram ei leh bar dinhmun, sawrkar kalphung adt vang pawh a ni thei ang. Ram changkangah chuan ziakmi pawhin a ziakfung hmangin ei a zawng thei a, lemziak thiam pawhin a lemziah chu a hausakpui thei. A tawi zawngin miin a tui zawng tak hmangin hna a thawk thei tihna a nih chu. Kan ramah erawh chuan kan tuina zawng zawng hi eizawnna atan a la hmantlak lovin, a la hman theih ve si lova. Chu chuan hnathawh chungchanga kan ngaihdan, pawm dan leh hriat dan pawh hi thui tak a kaihhruai niin a sawi theih a ni.

Pathianin mihring min din dan leh khawvel a duan dan hrim hrimah pawh hian hnathawk turin min duang niin a lang. Britsih Pastor John Stott (L) chuan, “Pathian chuan leilung (nature) min pe a, enkawl leh vulh len (culture) chu mihring te mawhphurhna a ni,” tiin a sawi. Chumi awmzia chu rawih (employed) kher hi hna thawh a ni lova, hna thawk an ni bik kher lo tihna a nih chu. Hei hi kan hriat chian a tul hle. Chumi rilru pu-a hna kan thawk a nih phawt chuan eng hna pawh thawk ila hnathawha lungawina (job satisfaction) hi kan lo nei dawn a lo ni reng mai. Tin, hnathawha lungawina (job satisfaction) kan tih tak pawh hi hlep tam, hlawh hmuh tam, hna sang leh thawhna hmun nuam leh changkang ber bera thawh hi a lo ni ber lo a ni ang, company CEO leh mi hausa tawntaw te, hna sang tak tak chelh, mahni intihlum ta mai leh an hna bansan ta sawi tur an tam em mai! Hna leh hnathawha lungawina hi hna in a ken tel leh, chu hna thawh atanga hmuh let/thawh chhuah te chuan thui tak hril bawk mahse, lungawina tak tak chu chung a behbawmah te chuan ni lovin, a hnaah khan a awm zawk a lo ni. Pathian thu hril a, rawngbawl thin pakhat chu an team-ah Director atan ruat a ni a. Mi tam takin chu a nihna dinhmun chu eng vaka an lo ngaihpui lem loh laiin ani erawh chuan a hlutin a dah sang thiam hle: “Kei chu lei leh van Lalber rawngbawltu team-a director ka ni a. Chu vang chuan sawrkar officer lian te leh hna sang tak tak thawk te pawh hi kan rawngbawlna huang chhungah na na na chuan ka hnuaia mi vek an ni tih ka chiang em,” a ti hmiah mai. Mizoram rock band lar tak pakhata an drummer chu zing tin darkar hnih vel drums vuak a zir (practice) ziah thin a. A nu in thenawm khawveng te an zahawm tia thawm dim deuh tura a’n ngen chuan ani ngaihdan nen a lo inang hauh lo mai. Ani chuan an thenawm khawveng ten ani ang drummer turu lutuk thawm a thlawna an ngaithla pha chu lawm hle zawk turah a lo ngai hle zawk an ti! Chutiang chu a ni. Hna leh an hnathawha lungawi taka thawk thin te hian midang te tana an thawh emaw, an hnathawh leh thil tih hmanga an tum ram chiang taka an hmuh thin avang hian an thil tih leh hna thawhna apiangah an lo lungawi mai zel niin a lang. Kan Mizo mi ropui JF Laldailova’n, “Ka thiltih apiang hi atchilh khawpa ka beih thin avangin ka tui thin a ni,” a lo tih te pawh hian kan hnathawh dan leh hnathawna kan ngaihdan te pawh min kaihruai sela a duhawm hle.

Kan thusawi a fiah lehzualna atan entirna pakhat han pe leh teh ang:

Putar pakhat tlai leng hian lung lakna hmun (quarry) a patling engemawzat hnathawk hi a hmu a. Eng nge an thawh tiin zawhna a’n zawt hlawm a. Pakhat chuan thinrim tih hriat tak hian, “Hei, lung ka ker hi i hmu reng lawm ni?,’ a lo ti hlar a. Pakhat leh chuan, a zawttu putar pawh en chuang lem lo chuan, “Kar khata Rs. 200/- hlawhna a nih hi,” a lo ti sam et a. Pakhat ve thung chuan a lung ral dah thla a, rawn ding chhuak meuhin, “ka hnathawh i hre duh a maw? Biakin sak hna ka thawk mek a nih hi,” tiin chhuang takin a rawn chhang ta a ni.

A tawp bera zawhna chhangtu khi chuan a hmanrua leh a hlawh lam ni lovin, hna a thawh chhan leh chu a hnathawhin a thlen tur (end) lam chu a thlir daih zawk zu nia. Chu rilru tak chu alawm, khawvel mi ropui tam tak te pawhin an lo put a, retheihna, harsatna leh lung bang tam tak su tlanga ropuina tlang chhipa an hnathawh an lo chuanchhuahpui tawh chu ni. Eng hna pawh thawk la, i thawh chhan leh i thlenna tur chiang taka i hriat a, i hmuh fiah ngat chuan he khawvel hi kan khawvel a nih chhung chuan i hlawhchham ngai hian ka ring lo.

Chuvangin, tun atang chuan hnathawh leh hnathawk an sawi apiang chuan hetiang hian, Pastor John Stott ang hian lo hrilhfiah ve tawh chhin teh:

“ Hnathawh/hnathawk chu midang te tanpuina atana mahni sum, hun leh tha insenralna leh insensona, chumiin a thawktu-a thinlunga lawmna leh lungawina a thlen, a thawhsaka te tana chhawrnahawm leh Pathian a ropuina hi a ni” tiin. Eng chhanna nge i dawn let teh reng le!