Ka Tawnhriat: Researcher te hnena thuchah

 

            Research beih hi thil harsa tak a nih loh ang bawkin thil awlsam tak a ni hran lo bawk. Researcher tha tak ni tur chuan taimak, dawhtheih leh kan research tihna tur topic-a tui a pawimawh hle in ka hria. Kum 2012 ah Master of Philosophy ti turin MZU ah ka in ziak lut ve a. Ka dissertation title chu Elections in Mizoram: A Study of the Role of the Mizoram People Forum (MPF) tih a ni a. Kum 2013 kum tawpah ‘O’ Grade hmuin Pathian zarah tluang takin ka zo va. Kum 2014 ah Doctor of Philosophy ti turin MZU ah vek hian in ziak lut leh in, April 5, 2017 khan Doctorate Degree ka lo hmu ve leh ta a, ka thesis title chu Political Parties in Mizoram: A Case Study of the Mizo National Front (MNF) tih a ni.

            Research tih hi Mizo thalai lehkha zir tam tak ten kan zir dan phung, exam dawna theihtawpa beih chiama zawh duak theih chi a ni lova. Inthlahdah a ngaithei lova, palzam a theih hek loh. Bul tan tirh atanga tha thlah lova tan mar pat a ngai a. Chutiang tlin lo/peih lo te chu mi tam tak an research zo chhuak ta lo an awm teuh a ni. Kei ngei pawh hi 2012-2017 chhung khan thla tin MZU ah ka research avang hian a fur a thal, a sur a sa hnuaiah kal ka ngai a. M.Phil kan tan dawn a kan professor pakhat thusawi hi ka hre reng thin. “Research tih chhunga vawi khat tal beidawng lo hi ka la hre ngai lo,” a tih hi. Researcher tan chuan mahni hi kan hmelma lian ber a ni a, mahni peih lohna, thatchhiatna etc, kan research tihna kawnga min daltu lian ber chu keimahni hi kan ni. Kan hlawhtlinna pawh mahni ta bil liau liau, midang ten min tawmpui theih miah loh a ni bawk Ka research tih chhung (M.Phil leh Ph.D) hian Mizoram hmun hrang hranga mi, mi 50 chuang ka kawm a. Tin, ka research atana tangkai thei tur lehkhabu, articles etc ka hmuh ang ang chu ka chhiar kim viau bawk. Tin, chanchinbu (state leh national) a thu thar, ka research atan tangkaina nei awma ka hriat te chu chep thla in file-ah ka dah tha zel bawk. Ka vei em em pakhat chu Mizo chu communitarian society kan ni. Research kan tih hian hna kan thawh hi mahni pindan chhungah, computer leh lehkhabu te nen a nih thin avangin, mite angin kan hnathawh ve hi a langsar lem lo thin a. Kohhran leh khawtlanga a kul a taia inhmang tura hunin min daih loh thin avang hian researcher te hi dem kai lek lek chang a awm fo thin. Hemi chungchangah hian vantlangin researcher te laka an rilru puthmang hi siam rem thei se, zirlai chu ni chiah tawh lo mahse, zir bing tu an nihnaah hian hun pe thiam se a tha ka ti hle mai. Lehkhabu ruah tham loh ziah ang chiah a nih avangin research tih hi ngaihtuahna sen nasat a ngai ve hle. Kei phei chu ka lehkhabu ‘Titanic’ 2015 a release tak ka ziah lai khan Ph.D nen ka ti kawp a, hna a tam duh khawp mai. Mahse, research leh thuziah hi ka tuina a nih avangin hrehawm ka ti lem lo. Tlaivar dawn dawna ka thesis ka ziah chang hi a tam khawp mai. Zan lamah hna (research) ka thawk tlangpui bawk. Kum 2017 July thla khan ka M.Phil Dissertation behchhana ka ziah, Civil Society and Elections in Mizoram: A Study of the Role of the Mizoram People Forum (MPF) chu Straightforward Publishers Pvt.Ltd, New Delhi ten min publish sak tawh a, 2019ah hian ka Ph.D thesis behchhanin lehkhabu pakhat chhuah leh ka tum a ni. Thalai te, kan ram politics, economy leh society hi zirchian/zir bing tur tam tak a la awm a. Tin, Mizo te leh North East region hrim hrim hi mainland India hian min la hrechiang lo hle bawk. Chumi zir chian leh puan darh hna chu researcher te mawhphurhna a nih avangin research ti tur hian ka sawm a. Chutih rualin chona an hmachhawn ruala chu chona chu mahni remchanna mila thlak danglam tum lova, chona mila mahni inthlak danglam zel hi researcher tha quality pawimawh tak a ni tih hi theihnghilh lo se ka duh a ni (Don’t try to change the challenges. Rather challenge the changes).