Anni leh Keini

Israel ram leh hnam chanchin han chhui han chhui hian Mizoram leh Israel bakah Mizo te leh Jews te hian inanna tam tak kan neiin ka hre tlat pek a...

Pakhatnaah chuan kan ram atanga hnawhchhuah kan ni ve ve. Juda te hi an hnam chanchina hun tam zawkah kha chuan  baihvai tak leh awm hmun nghet nei lo, khualzin vakvai, hnam lian leh chak zawk ten an ram atanga an um chhuah leh, kum eng emaw zat hnua 'ka ram' tia chhâl theih nei ve leh ta chauh an ni a. Kum 1948 a Israel ram a din hma phei kha chuan an baihvai dan chu chiang tak a ni. Indopui II laia Juda raltlan te kha khawi khawvel ram mahin an khua leh tui ni turin an lalut duh lo. Chutiang bawkin keini Mizo te pawh hi Jews te angin kan hnam chanchin thui tak chhui tur nei ve lo mah ila, hnam lian leh chak zawk te hlaua tlanchhia a, thlang tla, tuna kan awmna, Mizorama inbengbel a, 'ka ram' tih tur nei ve ta chauh hi kan ni ve tho mai.

Mahse…

Jews ho chuan independent ram an neh phat atang khan ram leh hnam hmangaihna tak tak nen an ram neih chhun chu an enkawl a. A ram chin zahve deuh hmawk Negev thlalerin a khuh chungin mahni ke-a ding a, kawng engkima intodelh turin a tir phat atangin tan an la a. An independent tirh phei chuan an mithiam zawng zawng te pawh lei letin hna an thawk mup mup mai a ni. A ram hmun thuma thena hmun hnih thlaler leh ram rovah ramhnuai te a dinin an din a, an mamawh leh tlakchham ber ni bawk tui thianghlim pawh vawiinah chuan an kham khawp mai bakah, an thenawm Arab ram te hnena hralh then tham khawp an siam chhuak ta. Keini erawh chuan kan ram neih chhun hi kan ren in kan duat thiam lo hle thung! (Ngaihtuah zui tur a tam hle mai!)

Pahnihnaah chuan, Israel ram khu hmasang ata tawh anni aia chak leh thiltithei ram leh hnam te hual vel kara awm a ni. Hmanlaiin lalram ropui, Aigupta, Babulon leh Assuria ten an hual a, tunlai hun (modern world)ah Israel ram tih chimih duh thiau Arab ram-Jordan, Syria leh Egypt ten an hual bakah, an bulhnai middle east ram zawng zawng muslim ram, Jews haw em em te an ni. Chung an hmelma te laka an him theihna atan chuan 'tam' leh 'tanrual' an mamawh tih hria in an hruaitu hmasa David Ben Gurion, Levi Eshkol, Golda Meir etc te khan Zionist Movement ropui kalpuiin khawvel puma Jews, vun ngo leh hang pawh thliar lovin, Jews thisen kai tawh dek dek phawt chu an phur khawm chiam kha a ni a. Tin, an ramri te humna atan an luahlum a tul tih hria in, ramri-ah mihring chenna khaw thar hlak te dinin, theihtawpin an ram hruaitu ten an duatin an thuam tha a. Keini ram, Mizoram pawh hi keini aia mihring tam zawk thiau leh hnam upa leh hausa zawk thiau-Assamese, Tripuri, Manipuri, Bangladeshi leh Burmese hual vela awm kan ni.

Mahse…

Jews te chuan an independent tirha an ram chin kha inches khat pawh an hloh lo mai ni lovin, hneh chhuh tumtu Arab tangrual sipai te tum eng emaw zat umletin Golan Heights, West Bank, East Jerusalem leh Gaza Strip thlengin ramri an zauh a. Keini erawh chu kan ram chhungah pawh a hulum laiah kan hruaitu te nen kan in ek beng a, kan ramri a thawl huai thung a! Kan ram chin British sawrkarin min rinsak tirh ai pawhin a zim ta (?) Ngaihtuah zui tur a va tam em! Jews te chuan an hnampui, Jews thisen kai tawh phawt chu hebrew tawng an hmang emaw, hmang lo emaw, an nunphung a danglam emaw, danglam lo emaw, an unauah lawm takin an pawm mai a, vawiinah chuan hnam ropui tak an ni ta. Keini erawh chu Mizoram chhunga cheng te chiah hi Mizo kan ni bik emaw tih turin kan unau, Mizoram pawna awm te hmangaih leh kuangkuah nachang kan hre ve tlat lo! Ngaihtuah a va ti thui em!

Pathumnaah chuan, Mizoram leh Israel ram te hi leilung hausakna nei lo ve ve ram kan ni.

Mahse…

Israel ram chuan thlaler vaivut leh tuifinriat tui al zawng zawng te chu hman tangkai theih tura sawngbawlin agriculture project ropui an kalpui a, ram pawnah an thei leh thlai thar chhuah te an thawn chhuak chur chur a. An airline bultanna te khu Indopui II hunlaia an indo thlawhna, indopui zawh hnua an hluihlawn an lei khawm atanga an din chhuah te a ni! Engmah nei lovin bul an tan a, tunah chuan engkim an nei ta. Science and technology lama an sân turuzia te, Nobel prize dawng pha mithiam an chher chhuah zozai te khu ropui tak a ni. Keini erawh Israel ang em em a ram ro, leilung hausakna tlachham kan nih loh tehlul nen, kan leilung hausakna (lui tui, ram ngaw etc) te erawh hlawkpui thamin kan ti pung ve lo. Keini aia retheia bul tan, khawi atang maha tanpuina sum cheng khat pawh dawng lo, an kutkawih liau liau hmanga indin chho Jews te dinhmun a sân tawh a, an intodelh tawh tehlul nen, keini chu centralin min chawmhlawm kumhlun chungin kan la intodelh ve lo! (Ngaihtuah tur a va tam em!)

Palinaah chuan,Mizo te ang bawkin Jews ho khu thil thiam leh ti lawr kual ve dûm an lo ni ve tho mai. Universitya Philosophy leh Arts zirlai ni chungin jet fighter pilot te an ni tel a, bus driver mechanical engineering lama mithiam te, leilettu army infantry battalion hotu te an ni nawk mai!

Mahse…

Anni chuan chutiang taka thiam thil ngah leh tih theih neih hnem (multitasker) ni tur chuan theihtawp tak meuh chhuah leh thiam tum tak takin an zirin an bei a, mihring an indaih loh avangin ram lian, mihring tamna ram te pha tur chuan mi pakhatin thiam thil, khawvel ram danga mithiam te thiamna ang neih nual a tul tih an hria a, kawng hrang hrangah hmantlakin an in chher hriam a. Keini erawh chu kawng engkimah a 'mawi tawk' ah kan duhtawk a, a tha ber leh mawi ber erawh kan thleng thathum leh peih thin si lo. Jews ho chu jack of all trades, master of all an nih laiin, keini chu jack of all trades, master of none kan awm ta teuh bik a nih hi!

Panganaah chuan, Israel leh Mizoram hi khawvel ram dang leh state dang te aia inrenchem ngai leh mamawh ber pawl kan ni. Mediterranean tuipui, Tuipui thi leh Negev thlaler ten an hual vel kar ram khawroa awm a nih avangin, Israelin a tlakchham tam tak zinga a buaipui ber leh sum leh pai, tha leh zung pawh a sên tamna ber chu tui thianghlim hi a ni. Mizo ten kan tlakchham ber chu 'intodelh' hi a ni berin a lang bawk.

Mahse…

Israeli te chuan tui thianghlim an ngah tawk lo tih hria in school zirlai, naupang tê te atangin tui renchem an in zirtir a, an inbualna thli takngial pawh luan ral tir lovin, thlai chawmna atan te an hmang hram hram a. Khawvel ram danga kan hman tam zawk, leilet pum tuia chhun khah leh thlai tui leih huh hnûp (flood irrigation) te chu an zo ve lo tih hria in tui, a fara far hmanga thlai enkawlna (drip irrigation) te an hmu chhuak a! Keini erawh chu furpui lai pawhin PHE dept in tui an sem theih loh chuan tui kan tlachham nghal a, sum leh pai leh khawsak phung kawng hrang hrangah mamawh tih tlem aiin lakluh tihpun lam kan la thupui a, inrenchem aiin hman tur ngah kan la thupui zawk niin a lang. Ngaihtuah a va ti thui em!

Paruknaah chuan, Jews leh Mizo te kan inan lehna pakhat chu inhnial hnam (debating culture) kan ni ve ve hi a ni.

Mahse...

Israel hnam kalphunga dangdai angreng tak chu nihna sân leh hniam lam hian a tibuai ve vak lo. An ngaih pawimawh ber chu ngaihtuahna tha leh puitlin tlak an nei em tih chu a ni. Sipai lumum pawhin dik leh tha zawka an hriatah chuan army hotu lian te thu pawh an zawm lo mai a, company hnathawk te pawh an CEO te nen hmaisa inhmuh khawpin an inhnial mai. Mahse, thil tha a chhuahna a nih dawn a, Israel tan a hlawk dawn phawt chuan an pawisa lo. Kum 1967 Ni ruk indonaa hnehna ropui an chan hnu lawkah pawh, kha indonaa hnehna chanpuitu sipai hotu paruk chu an chet dan an en let a, an sawiho hnuah, an chet dan fuh tawk lova hria in an bân hmiah mai a ni! Anni chuan kawng engkimah Israel chu No.1 an dah a, a dang zawng chu No.2 a ni. Keini ramah erawh chuan social media platform hrang hranga sawngsawhlawt si lova inhnial luih luih hi kan thiam tawk em ni aw tih tur a ni. A tak rama mahni ngaihdan championpui ngam tak tak si lo, social media mithiam (social media intellectual) kan tam lutuk deuh niin a lang. Chutiang bawkin, ngaihdan tha leh ram hmasawnna atana tangkai tur ngaihtuah chhuaktu tam tak pawh an chungah hnial ngam leh chhân ngam loh pawl hruaitu leh department hotu kan ngah lutuk a, ram siam tha tur chuan 'sawrkar leh party mi pawimawh' emaw, 'vantlang mi challang deuh' nih kher a ngai ta emaw tih tur a ni. Mizo hnam leh mizoram aiin party thu te, khaw bil, veng bil, kohhran bil leh chhungkaw bil thu te kan dah lian zawk ta thin a, ram pum huap rilru kan pu hleithei thin lo. Ngaihtuah a ti thui mang e!

Eng pawh nise, sawi tur a tan...mahse, i khaikhawm phawt tawh mai teh ang! Mamawhna hi thil thar hmuh chhuahna bulpui a ni (Neccesity is the mother of invention) tih hi Israel khu chuan a takin an hmang a. Engkim an tlakchhamna avangin engkim an hmu chhuak a, engkimah an intodelh ta. Keini pawh hian engkim kan tlachham a tih theih. Kan tlakchhamna te hian kan tlakchhamna phuhru tur hian tan min laktirin, intodelhna kawng min zawh tir em tih hi zawhna pawimawh tak, kan inzawh nawn fo tur leh chhan nawn fo tur niin a lang.