Anni leh Keini Part II

Irish thuziak mi, George Bernard Shaw khan, "Apple pakhat ve ve keng a kan inthleng chuan apple pakhat ve ve tho kan nei a, ngaihtuahna (idea) pakhat ve ve kan inthleng erawh chuan ngaihtuahna pahnih kan nei tihna a ni," tiin thu tawi, fing zet a lo sawi a. Ngaihtuahna a ti thui hle in ka hria.

Mizo te hi a tam zawk kan ram chhung, Mizoram zimte-ah kan awm kan tih rual hian, kawng lehlamah chuan khawvel zau zawk hi kan lo dai dar ve nasa hle tawh tih chu tun covid 19 avanga state pawn atanga lo haw kan ngahzia atang pawh hian a lang theiin ka hria. Tin, ram danga inbengbel ta leh, khawvel ram changkang zawkah te pawh thenawm khaw zin mai mai tluk leka lut chhuak pawh kan tam ve ta. Chu tih ruala ka rilrua lo awm chu, heng kan vahzauna te, thil tha leh changkang, hnam hmasawn leh ropui zawk te kan luh chhuah atang hian kan rama kan kir lehin ngaihtuahna thar tha zawk emaw, tih dan phung tha zawk hi kan paw haw ngai em aw tih hi a ni.

Mizo zingah chuan Pu Sangzela Tlau hi helam kawngah hi chuan fak a phu hle in ka hria. A zin tam a, ram hrang hrang a tlawh a. Heng a zinna reng rengah hian hmun nuam leh hmingthang tlawhin, a kiangah emaw thla a va la satliah ngawt ngai lo tih chu a ram fan documentary video thlir thin te chuan kan hre vek âwm e. Ani ram fang zau hi chu keini a fang zau ve lo te tana fin belh phahna tham leh harh phah hawkna tham hi a ni zel mai. Mi tam tak erawh chuan ram changkang leh hmun changkang kan tlawhna te, hnam changkang te zinga kan khawsakna te hi social media platform-a intihtheihna leh thlalak inneih thatsiaka, likers leh followers ngahna atan bak hian kan hmang lem lo emaw ni chu aw ka ti thin. A ram nawmzia, an fai leh thianghlimzia, an changkanzia etc vel chauh hi kan paw haw a, an ram siam nuam tura an hmalakna te, thianghlim tura an inzirtirna leh changkang tura an thiltih te zir chian leh hriat belh a, kan rama tih ve ngei tum rén ràwn chunga zin hi kan tam vak lo ni hian ka hria. 'Zin khawthawng' dik tak hi a tam zawk hi chu kan nih hmel!

Khawvela hnam anga ka ngaihsan leh an chanchin pawh ka chhiar tam an ni bawk a, Israel ho bawk khu sawi leh thin ila. Vawiina kan nun ti nuam tu technology chhuak thar leh changkang ber ber te hi company lian ten Israel rama research and development center din a, Israeli te ruaia an thluak hmanga an hmuh chhuah leh siam chhuah hi a tam zawk a ni tlat asin. Israeli te chungchang sawina tawngkam lar tak pakhat chu, 'khawl thil eng pawh Israel rama i rawn ken luh chuan, minute nga chhungin Israeli ten an thiat darh ang a, a hma aia tha zawkah an lo chhuah zel ang," tih a ni!. Tum khat pawh Israel engineer rual ten Finland-a Nokia hmunpui an tlawh a. An rilrua awm ber chu Nokia company ropuizia leh, an hmun neih thatzia te, an khawl leh technology turuzia lam ni lovin, 'eng vangin nge Finland-a Nokia ang hi Israelin kan neih ve loh? Khawiah nge Israel Nokia a awm ve," tih lam a ni daih! An kalna apianga thil tha, Israel rama awm ve lo an hmuh apiang chu Israela awm tir dan tur an ngaihtuah nghal char char zel! Chung avang te pawh chu a ni mahna, anni aia a lêt za tama ram lian, hausa leh sum ngah zawk China leh USA ai pawha start up company an ngah em emna chhan.

Kan vah zauna te, kan thlen hlatna te, hnam dang hmelhriat kan neih thatna leh thil changkang kan ban phâkna te hi kan rama thil changkang lo leh hnuaihnung zawk te tih hmasawn (upgrade) na atan leh tih changkan (modernize) na atana hman hi ching uar zel ila a duhawm hle mai