Kan inteh dan hi

        Mizo te hi hnam inteh nasa pawl tak kan niin ka hria han ti ngawt phawt teh ang! Kawng engkimah hian bûk lung hi kan han khâi nasa hlawm khawp a. Kan bûknaa kan buk tlin loh hlauh te phei chu anmahni atanga thil tha chhuak thei ta reng reng lo ang thawthângah kan han chan zui a. Thil tha tak, kan sâwtpui ngei tur leh kan that tlânpui ngei tur pawh sawiin, ti se, kan bûknaah kan bûk tlin tawh miau loh avangin an tla na thei tak tak tawh thin lo.

         Bûk lung atan lah khawtlang leh kohhran kan han hmang zui a. Kan bûk lung chu felhlel awm miah lo, dik lo thei lovah dahin, chu bûk lung hmanga kan bûk tawh sawisel chu an dik lohzia leh kan bûk lung dik zia hmangin kan vawm lêt êrh thin! Mi tu emaw thil tha tih leh thu tha sawi pawh a thil tih that leh a thu tha sawi kha amah tehna atana hmang ta lovin, a nun kal tawha a tih sual, an chhungkaw zia, a chapona etc te chu kan tehna bûk lungah kan han hmang ta hlauh thin a, a tu amah hi kan inteh tling hleithei hlawm ta lo thin a nih ber hi!

        Ram, khawtlang nun leh kohhran tih dik tawk loh leh fuh tawk lohna hmua siam that duha hma la tu te hi ram hmangaihtu leh siam tha tu tia chawimawi âwm zawk tak an nih laiin, kohhran leh khawtlang kalh leh do ang ten kan chhuah titih ta fo mai. Rilru ngiau ngerh hrim hrim avanga kohhran leh khawtlang kalsiam kalh tum hrim hrim te chu an awm teh meuh mai. Mahse, chung mite, kohhran leh khawtlang tarmit atanga thlit fim leh thliar hran kan tumna lamah hian ram, hnam leh khawtlang hmangaihtu dik tak te hi kan lo hnawl tel palh ang e. Mi tam tak chuan kohhran leh tlawmngai pawl te pawisawi hlauh avangin kâ kan âng duh lo niin a lang a. A kâ âng chhun te lah kan dem rawn luih luih a, an kâ an ân chhan dik leh dik loh te, kan sâwtpui leh thatpui loh tur lam, a sap tawng takin, a 'content' bih chiang lovin a sawitu leh titu, a 'heading' chauh thlirin kan bei leh chiam thin. Chutiang pal tlang hrâk ngam khawpa huaisen leh dikna tan ngam, kohhran leh khawtlang fel lohna leh dik lohna siam that duhna tak tak nena kalh ngam, ram siam tha tura ke pen ngam hi kan mi hmasa te hnuah khan Mizo hian kan nei leh tawh ngai em? Kohhran leh khawtlang pawl (a huho) hmalakna piahlama mahnia dikna championpui ngam hi kan vâng ta deuh em?

         Kohhran kal dik lohna do va protestant reformation ropui thlentu Martin Luthera te khan a thiltih kha lo ti ta lo se, Galileo khan science hmanga a thil hmuh chhuah kha a nunna nena thleng phal hial khawpin lo tan ngam ta lo se, Winston Churchill, Cigar leh zu duh ve tak, tawngkam thlahdah angreng tak kha British mipui te khan ram tana a hnathawh leh a huaisenna ni lovin a zu in (zu ka sawi mâwi chu a ni hauh lo a nia!) leh a tawngkam dengkhawng tak te hmang khan teh ta tlat mai sela, vawiina kan nun tam tak hi kan chanvo a ni kher ang em?

          Ka han ti ta duah a, khawtlang leh kohhran do hrim hrim anga lan theihna te pawh a niin ka hria! Kohhran leh kan Mizo khawtlang nun inkaihhruaina ten kan vantlang (society), kan rilru ngaihtuahna leh kan chêt chhuahna min kaihhruai avanga khawtlang leh kohhran nun nuam tak kan neih te hi ka hai bik love. Chutih rualin, khawtlanga a vawn fung chelhtu te, kohhran chhunga awm te hi mihring vek tho kan nih avangin ti sual palh thei, dai sual palh thei kan nihna hi i hre tel ve thin teh ang u ka han ti zawk a ni.

          Mimal ngaihtuahna thûk leh ril tak atanga chhuak hmasang mifing, Socrates, Plato, Aristotle te inhnialna leh khawtlang nun siam that tuma sawiseltu philospher rual John Locke, Jean Jacques Rousseau, Thomas Hobbes, John Calvin etc te kohhran leh khawtlang kalphung fel lo sawiselna (critique) te kha vawiina duh duh sawi thei leh sawrkar lakah pawha nuar ngama kan awm theihna zalenna leh sawrkar, kohhran leh khawtlang atanga hamthatna kan dawn/neihna bul democracy, socialism, communism, liberalism etc te lo chhuahna a ni ang khan, keini ramah pawh hian ram, khawtlang leh kohhran siamthatna tura inhnialna leh sawiselna (social critique) kan ngaihthlak thiam a, kan pawm thiam hun a nghahhlelhawm hle in ka hria.