In the interest of Public Service

            Sawrkar hnathawk te hna thawhna kawng hrang hrang-hna thar hmu te an hna zawm tura kohna (calling letter), hna thawk tura ruatna leh puanna (letter of appointment/declaration), transfer & posting etc lehkha zawng zawnga kan hmuh fo thin, a kam keuna tawngkam ber 'in the interest of public service' tih tawngkam hi i ngaihtuah ve ngai em?

           He tawngkam awmzia ber chu 'mipui/vantlang tana tha zawk, remchang leh tangkai zawk a nih avangin' tihna a ni ber awm e. Sawrkar tawngkam leh hmalakna reng rengah he tawngkam hmang hian thu kamkeu a ni tlangpui a, chumi awmzia chu sawrkar thil tih leh hmalakna reng reng chu mipui/vantlang tana sâwtpui tlak, tha zawk leh tangkai tur a ni tur a ni tihna a ni ber ang chu. Mahse, chu lam chu ka sawi tum ber a ni lo!

           Kan hriat angin state hrang hrang leh ram pawn hmun hrang hranga kan mizopui tangkhang sing tel te an lo haw khawm mek a. An tan state danga sum leh ei bar nei mumal tawh lova cham reng theih ni bik hek lo le, mahni in leh lo thlen hlan an nghahhlelh tur chu thuhranah lo dah ta ila, Mizorama an haw hi an mamawh takzetin, an tan a tulin a tul tawh a ni ber mai. Chu vangin, hetia an lo haw khawm hi keini, state chhunga awm te pawhin 'public interest' a ni tih hria a, lâwm taka kan lo lawm mai hi kan tih tur niin a lang.

           Chu tih rualin, heng kan Mizopui te hi Mizoram aia covid 19 vei tamna state atanga lo haw tur te an ni a. An rawn hawna state bakah, kal kawnga an paltlang tur zawng zawng te pawh Mizoram aia covid 19 vei tamna state vek a ni. Tawngthu chhe lovah, mi sing tel lo haw te zingah hian he hri lo kai palh awm theihna chance hi sang tak a ni a, chu vang tak chuan Mizoram an lo thlen hunah pawh uluk taka dah hran leh enthlak an tul hle dawn a. Chutiang tur pawh chuan sawrkar leh khawtlang pawh kan inbuatsaih mek a nih hi. Lo haw tur te pawhin hetianga kan lo dawnsawn hi 'public interest' a ni tih hria a, chhel tak leh thuawih taka sawrkar thu an zawm hram hram a pawimawh hle ang.

          Kan thu khaikhawmna atan chuan covid 19 avanga kan thil tih leh hmalakna hrang hrang piahlamah hian kan nitin nun leh thil tih zawng zawngah hian mimal emaw, mi tlem te hamthatna leh hlawkpuina tur, 'in the interest of private/personal/family etc' ni lova, mipui nawlpui te tana that tlanna, hlawkpui leh hmasawnna tur, 'in the interest of public service' hian mi tin hian thil tiin, hma la thin ila, khua leh tui tha leh ram leh khawtlang hruaitu tha chu kan lo ni dawn a lo ni reng mai.