Kan Kaisan dan hi

Social media that ve na riau chu duh duh kan râk pui ve mawlh mawlh thei lai hi a niin ka hria! Kan phak tawk theuha kan ngaihtuahna te han tlangaupui ve leh phawng phawng thin hian nun a ti hlim ve riau nia. Tun tumah pawh ka sawi avanga awmze awm hauh lo tur ka'n sawi leh hram teh ang!

Covid 19 avangin college hrang hrang ten online hmanga zirna leh zirhona (webinar) kan kalpui nasa a. Kan college ngei pawhin thupui hrang hrangah, mi thiam tak tak te hmangin zirhona kan nei thin a, a hlawkthlak thin hle.

Hman zanah  kan resource person pakhat chuan heti hian a sawi a, "Sawrkar hna that lohna pakhat chu kaisanna hi thiam leh theihnaa teh ni lova, thawh rei tawh dan atanga teh (promotion by seniority, not by competency) a ni hi a ni," tiin a sawi a, a dik thui hle dawnin ka hria.

Mizo ten ze tha lo deuh kan neih pakhata ka hriat chu 'keini chu kan upa tawh' tih kan ching hi a ni. He tawngkam/zia kan chelek nasa lutuk hian ram hmasawnna thlengin a khawih buai phaa hriatna ka nei! Hnam dang te hi han en ila, an upa telh telh a, an fing telh telh a, an hre zau telh telh emaw tih mai tur an ni. Keini erawh chu kum 50 (a then phei chuan kum 40!) kan pel dêk dêk a, kan upa tawh a ka thiam ve tawh lo, engmah ka ni tawh lo, ka tih ve chi a ni tawh lo...lo,lo,lo hi kan ngah nghal em em ringawt mai a. A lungfing chin, dai zau leh tawnhriat ngah ber tur ten hetianga kan tih zel te chuan thangthar ten an rawn ar khaw thim dai mai loh nâkah! Hriat belh tumna nei tawh lo, chhiar zau peih tawh bawk si lo, an ngaihdan leh duh dan kalh nikhuaah erawh ngaithei lonleh viau si, hmasawnna kawng thar zawh dawna upat chhuanlam a, dah awl dawna upatna hmanga chaldelh leh ching lawi si hi khaw tin hian kan kawl theuhin ka ring! Hei vang tak hian a nia 'ka upa tawh' ti ti ho hian ram hmasawnna an khawih buai ka tihna chhan (aia upa zahna chungchang pawh hi thlirna tlang dang atangin hun hranah ka la rawn thlir leh ang)

Tin, a chunga kan sawi te khi ram hmasawnna daltu an nih lehna chhan pakhat chu a tir lama kan sawi, thiam leh remhriat avng ni lo, thawh rei/upat vanga ram/vantlang rorelna ki pawimawh chelhtu na ni leh fur hlawm si hi a ni. Private sectorah chuan a thiam leh thluak tha, taima leh remhria apiang an kaisang chak mai a, zawhte upata upa ve satliah ringawt, thluak leh tha thawh tur nei lo te chu na upat vang ngawtin an kaisang ve ngawt ngai lo. Hei vang tak hian alawm naupang tê té, khawvela mi hausa tawntaw kan neih teuh ni. An thiam leh theihna (competency) a sân poh leh an kaisanna (promotion) a chak mai a. An aia thiam an rawn chhuah chuan kar lovah an rawn lehpel mai dawn si a. Chu vang chuan an dam chhungin na inzir reng mai a ni. Hetiang hian sawrkar hnathawk te kaisan dan pawh hi han ti ve thei ngat ila chuan kan kâng zawt zawt hian ka ring thin (upa inti ho chuan an duh lo viau thung ang a!). 

Thawh rei tawh vang ni lo, thiam leh remhriat avang hian han inkaisan tir ngat ila zawng, hnathawktu hlemhlé, zelthel, thatchhia leh intuaihriam peih lo...a tawi zawngin 'kan upa tawh' tia iak iak tam tak hi chu tuna an dinhmun ang hi an luah pha hauh lovang amwle!