Van Lal Lunghlu Tleirawl te

           

            Inngaihzawnna, rual elna, rual pawlna, phurna, hlimna, thawvenna...heng te bakah hringnuna hlimna hrang hrang kan tawn hun hi mahni theuh han inchhut let ta ila, tleirawl lai, Mizo ten duat taka ‘rawl lai nun’ kan tih hun kha a lo ni deuh zel nia.

            A ni tak a, nu leh pa angchhunga thlamuang taka awm chung siin, puitlin kan hre tan a, chhungkaw mawhphurhna leh ei bo bar ngaihtuah lungkhamna in min la tih buai loh avangin hringnun chu a par mawi em em a, kan nitin hun chu hlimna leh lawmna hlir a ni ta emaw tih turin engthawl leh rilru helhkamtu reng nei lovin dam chhung ni kan chhiar thin. Hla siamtu pakhatin, “Lungngai lo la, tap mai lo la, Van Lal Lunghlu i ni, Malsawm i ni,’ tia a lo phuah chhuah hi tleirawl te hringnun hrilhfiahna fun kim tak niin ka hria.

            Mithiam ten an zirbingna atanga an hmuh chhuah chu tleirawl lai hun hi mihring thluak chak lai ber, thil reng reng, a sual a tha-a an thiam chak lai ber hun a ni an tih hi kei ka awih zawng tak a ni. Tleirawl chuan engkim ‘chhin’ a chak a. Tunge a nih a, eng mi nge a nih dawn, a saptawngin, a identity a la hriatchian miau loh avangin a tleirawlpuite-ah a nihna a zawng a, a mi ngaihsan te-ah te a zawng a, chung mite anga awm tum leh nih tum chuan a hmanhlel thin. Mahse, tleirawl laia nih kan chak leh kan tum tam zawk hi chu kum 25 kan pelh chhoh hi chuan kan ni zui lo tlangpui a, nih pawh kan tum zui lem lo tlangpui! Chu chuan lunghlu lai chhuak tura lei thuk tak laih hnu a, fimkhur taka a lunghlu tuamtu lei leh chirh paihfai hnua lunghlu kan lai chhuak ta chauh thin ang hian, tleirawl te hi anmahni-a lunghlu awm, van malsawmna awm hai chhuak tura kaihhruai leh hrual an mamawhzia a ti lang chiang hle awm e.

            Khawvel hian tleirawl te, nakin lawka tuna puitling te ai rawn awha rawn puitling chho tur te pawimawhzia hi a hai lova. Ram changkang apiangin tleirawl te an ngai pawimawhin an dah sang thiam ta hle chu a nih hi. Tleirawl te hi an hlu asin. Chhungkuaah naupang te anga chawm hlawm leh enkawl an ngai tawh lova, nu leh pa leh chhungte puitu leh chhawk zangkhaitu tangkai tak an ni tawh a. An vun a la marin, an tituai a nalh a, an thluak a chakin, an duh zawng leh chak zawng tak hmanga thiam taka kaihhruai chuan phur leh thatho takin kan hnung an zui mai a. Zirna kawngah pawh a peng thuam lai tak an thlen hun, nun kawng dik zawh tura ke an chheh rem hun, kawng engkima naupan kalsan a, puitlinna lama ke an chheh hun lai a nih avangin an hun tawn hi a pawimawh em em a. Nu leh pa, Kohhran leh khawtlang ti hmingthatu atanga kumkhaw zahna thlen thei khawpa mihringin kan dai fuh a, kan dai pelhna hun tam ber chu tleirawl lai hun hi a ni. Han chhut let vang vang ila, misualin a sual tanna, sual lama lo dai pelh zeuhin a insiamrem a, kawng dik a zawh lehna hun hi tleirawl lai hun a lo ni tlangpui. Chuvangin, telirawl lai huna kan duhthlanna hian kan dam chhunga kan awm dan tur a hril thei tih kan hriat a pawimawh hle. Khawvela thil nuam leh hrehawm, dik leh dik lo, tha leh sual kan tem chhinna leh hria thran tanna pawh rawl lai nun hi a nih thin avangin, tleirawl ten kan duhthlanna kan hman thiam a pawimawh takzet a ni.

            Tleirawl te u, Pathianin duh taka a siam, hringnuna a par mawi lai tak, tleirawl nun tem mek in ni a, a siamtu che u tan leh nu leh pa te tana in hlut lai tak a ni. Nakinah chuan in puitling ang a, nupui pasal neiin chhungkaw hran in din ang a, in chhungkua, nupui fanau tulpuiin in dam chhung hun in la hmang dawn. Tunah erawh chuan chhungte nghahfak niin, hringnuna a nawm lai ber leh hlimawm lai ber, pawimawh lai ber ni bawkah in cheng mek a. Van Lal lunghlu leh lei mite tana malsawmna ni tura malsawm (blessed) in ni. In dinhmun hi a hlu in a ropui asin! Mahse, hei hi hre reng rawh u. Engzata man tam lunghlu pawh hi hmuh zawh lohva a bo hlen chuan eng hlutna mah a nei lo. Van malsawm in nihna leh in hlutna te hi in hman thiam loh va, in duhthlanna a fuh loh chuan mit khap kar leka bo thei, in dam chhunga hlutna nei lova awm tir theitu che u a ni tih hi theihnghilh ngai suh u. Van Lal Lunghlu in ni a, midang te tana malsawmna ni tura malsawm in ni. Chu chu in tleirawl lai hian nun chhuahpui ula, in damchhungin lunghlu tha mi, midang te tana malsawmna thlentu in lo ni dawn zuk ni a!