Goal in Life

            Kan naupan lai, sikul naupang kan nih ve laia kan zirtirtu ten min zawh fo thin pakhat chu engnge nih i tum? (What is your aim in Life?) tih kha a ni a. He zawhna vawi khat tal chhan tura zawh loh hi keini chhuan hovah hian kan awm lo a tih theih hial ang. Chuti taka zawhna pawimawh, kan dam chhung hun khawih leh hril thei zawhna a nih miau avang te pawh a ni mahna, naupang na fam chuan kan ngaihtuah phak tawka a ropui ber nia kan hriat angin doctor, IAS, engineer etc kha kan chhan dan tlanglawn a ni a. Thenkhat ten mak dangdai tum hrim hrim vang nge phei chu ka hre law...handleman/handyman tih te-a chhang pawh an awm tho bawk a! Kan chhanna chu a eng a pawh lo ni ta se, hetia ka han ngaihtuah let hian khang kan chhanna tam zawk kha chu kan puitlin hnua kan nih tum, kan eizawnna atana kan thlan pawh ni em em lov, kan hriat phak tawka kan nih chak zawng kha kan sawi mai thin ni ta berin ka hria. Chu vang te pawh chu a ni mahna, sikul kan kal laia kan nih tum kan sawi ang tak ni zui ta kan tam vak lohna chhan te pawh hi!

            Aim in life leh goal in life hi a sap tawng bul lam han en pawhin danglamna nei lo, tum thuhmun nei an ni a. Amaherawhchu, kan hmanna hun leh hmun (context) azirin an awmzia erawh a inpersan viau thei ang. Mizo tawnga ‘lei’ thumal awmze hran hrana kan hmang thei ang hi a ni mai awm e. Chu vangin, tun tumah pawh hian ‘aim’ leh ‘goal’ hi a thumal ngau ngau chuan awmze thuhmun ni mah se, duh dan danin kan pawt sawiin, kan pawt fan vel dawn a ni.

            A hmasa berah chuan ‘aim in life’ kan tih hlawhtlinna atan ‘goal in life’ i nei thin teh ang u tiin bul i han tan phawt teh ang. Football khel thin te atang hian entirna han pe ila. Football field-a inkhel team pahnih player te hian aim (tum) an nei a, chu chu an khingpuite hneh/khingpuite goala thun a ni. Chu chu an inkhelh chhan, an thupui ber leh tih hlawhtlin an tum ber chu a ni. Chutih rual chuan, chu an thil tum (an aim) ti hlawhtling tur chuan tih hmasak tur tam tak an nei ta a. An khingpui te goal-a thun tur chuan an team work a that a ngai a, goal an chhuah loh a ngai a, game an thunun a ngai a, chu chu an goal (thil tum hmasa) chu a ni. Chung zawng zawng chu an tih hlawhtlin hmasak phawt loh chuan an aim an ti hlawhtling thei lo. Heti hian han sawi leh teh ang. Player chuan an khingpui te goala ball chhuih luh chu a tum ber (aim) a ni a. Mahse, chumi hma chuan ball rawn chuhtu laka ball humhim a, lo bum a, khingpui te goal hnaih thei ang bera ball thlen phei pui chu a tih tur hmasa (goal) a ni. A goal  tih puitlin hnuah a aim chu a ti puitling thei dawn chauh tihna a nih chu. Chu vangin, hla tak thlir a, kan tum tih puitlin kan tum lai hian, chu hmun thleng tur chuan kan hmaah tih hlawhtlin leh paltlang hmasak ngai awm te paltlang a ngai thin. Kan goal in life chu rei lote-ah tih puitlin tur a ni a, chu chuan hun rei zawk atan kan aim in life min tih puitlintir dawn tihna a nih chu.

            Helai tak hi mi thenkhat hian kan man fuh lo thin niin a lang. Tum (aim) ropui tak kan nei a, chu kan tum chu tih hlawhtlin ngei pawh kan tum ruhin, kan insehruh sauh sauh thin. Amaherawhchu, chu kan tum (aim) chu ni hnih khat, thla hnih khat, kum hnih khat emaw a tih hlawhtlin chi a lo ni thin si lova. Dam chhunga nih tum (aim in life) a nih miau avangin hun rei tak hnua kan chan/hlawhtlin pui chauh tur thil a ni thin. Chutah tak chuan kan hmuh kan fo zawk, chu kan thil tum tih hlawhtlinna atana paltlang ngei ngei ngai ni thung si kan goal in life (kan dam chhunga kan tumna leh duhna tih puitlinna kawnga kan tih hmasak) ngai chu nitin deuhthaw in kan hmachhawn chho ta thin a. Kan aim in life chu kan chiang a, kan goal in life erawh chu kan hriat lawk leh hmuh lawk tam tak (thawhrim leh taimak a ngaihna, insum a ngaihna etc) a awm laiin, kan hmuh lawk theih hauh loh leh hriat lawk ngaihna awm lo (damlohna, harsatna, buaina etc) tam tak a lo tel ve ta thin a. Kan aim in life puitlin tura kan paukhauh viau laiin, chutia nitin, thla tin maia kan tum lian ber ni lo zawk, kan goal in life chinfel tur rawn lang ta zut zut thin chuan kan tumruhna te, kan paukhauhna te chu a rawn chiah zawpin, a rawn thamral tir ta fo thin a ni. Chuvangin, kan aim in life ti puitling tur hian kan goal in life hi kan ngaih pawimawh hmasak a tul ta hle tihna a nih chu.

            Tin, hlawhtlinna hi nambara teh chi a ni lova, nunzia leh nihphung, nunphunga teh chi zawk a ni tih hi kan hriat reng a pawimawh hle. A bik takin, tunlai khawvel, internet leh social media nena kan nitin nun kan hmannaah hian hei hi kan hriat a pawimawh lehzual. Social media sites leh platforms-facebook,twitter,youtube,instagram etc a mi hlawhtling/lar etc kan tehna hi han chhut chiang mah teh...follower ngah, liker ngah, viewer ngah etc atangin a ni. Chung zawng zawng chu nambar hmanga teh vek an ni. A nih leh viewer,liker, follower ngah ve lo mihring kha a hlu ta lovin, tangkaina a nei ta lo tihna em ni? Liker,viewer,follower tam tak nei kha mi zawng zawng aia chungnung, mi entawntlak, a nuna zir tur tam tak awm a ni tihna em ni? A chhanna chu ni love tih a ni. Social media celebrity tam tak hi nunphung, rilru put hmang, nunziaa mi tlabal leh entawntlak loh fe fe an awm nawk mai. Chutiang bawkin social media account nei lem lo, khawvelin a zah leh ngaihsan ni lawi si an awm bawk (social media-a mi lar entawn tlak leh social media-a lar lem lo, entawn tlak chuang lo an awm teuh tih erawh hre tho ila). A pawimawh lai tak chu internet khawvel hi a tak ram awm lo khawvel (virtual world) a ni a, he kan chenhona khawvel nen a inpersan lutuk a. Chuvangin,kan mihringpuite tehna atan a rintalak tawk lo tih hi kan hriat a pawimawh hle mai. Hmaichhana inhmuh a, chen hova, titi hova, nunho tluka mihring te kan inhriatchian tawn theihna hi Information technology hmasawnna leh thiamna sang tak pawh hian a la hmu chhuak lo tih hi i hre reng ila, kan aim in life leh goal in life kan hmachhawnna leh tihpuitlinna kawngah pawh internet khawvela a pehhelna kawng awlsam zawn ai chuan a tak rama huai taka hmachhawn zel te hi a tawpah chuan belhchian dawl leh hlawhtling ziktluak te chu an lo ni leh nge nge thin ti hi i chiang ang u.