Digital/Online Literacy

            Hetia information technology a lo than chak tak hnu leh mihringte hi a sap tawng taka ‘cyber/digital khawvela’ kan luh hnuah hian mithiam te chuan mihring hi chi hnihah an then a. A chi khatna chu digital natives an ti a. Digital natives te chu internet-in khawvel a chiah hnu, computer, internet leh smart phone ten mihring nun thlak danglam dawrh khawpa danglamna a rawn thlen hnu, a bikin kum 2000 hnulama piang, Generation Z, Generation X tit e an sawi thin, thangthar te hi an ni a. A chi hnihna chu digital immigrant te niin, hranghlui leh internet khawvel lo lan hmaa piang, internet khawvela la cheng hman si, a tawi zawngin internet khawvel hmalama nikhaw hre rual nip ha, internet khawvelin a rawn chim leh si te hi an ni. Digital natives te chuan digital khawvel hi an pianna leh thanlenna khawvel a nih avangin khawvel changkanna leh hmasawnna, a bikin digital khawvela hmasawnna te hi an man chakin an thiam chak em em a (Naute, kum hnih pawh la tling mang lote pawhin smart phone an khawih thiam em hi!). Chutih lain digital immigrants te chuan an khawvel hriat leh chen thinna nena inang lo tak mai pawh ni lo, inpersan hlak, digital khawvelah chuan an thiam leh hriat a tlem ta hle a, digital natives te umpha tur leh digital khawvel hmang tangkai tur chuan theihtawp chhuah a an beih fe a ngai ta. Chu vang tak chuan thalai te khawvel leh nu leh pa, upa zawk te khawvel chu a inpersan ta viau mai a. A chang phei chuan a insut buai lek lek chang a awm ta fo mai a nih hi.

            Digital khawvela cheng tleirawl leh thalaite nunzia leh digital khawvela rawn ar khaw thim dai luh kum upa zawk te nunzia leh rilru put hmang chu a inang lo ta hle a. He thil inthlau tak pahnih sawi rem leh inremtir dan hi khawvelin a la buaipui ta zel chu a ni. Digital khawvel, internet tualzawlah hian thil tha leh chhia a inpawlh nuk a, hman thiam a, hman sual theih a ni tih hi chu kan hre vek tawhin a rinawm. Mizo thalai te bikah hian lo insawrbing ta ila. Mizo thalai, digital thil chhuak thar hre chak leh hmang thiam zung zung te hi online/digital literate (online/digital thiam) tia sawi theih kan ni em?

            American tleirawl ten online-a an hun hman dan leh an nunziaa nghawng a neih dan zirbingna neitu Professor Dana Boyd, Microsoft Company-a Principal Researcher leh New York University Research Assistant Professor chuan, “Miin internet a khawih thiam avang leh internet-a a duh zawng zawng a hmuh theih avang ringawt hian internet hmang thiam a ni ngawt lo. Internet hman thiamna (online literacy) leh a chhunga awm te hman thiamna (online literacy) chu internet khawih thiam satliah ringawt ni lovin, zawnna tur hmmun dik taka zawn thiam te, chung kan thil hmuhchhuah te hman tangkai thiam leh a hun leh hmun nena hmehbel thiam a, tangkai taka hman dan thiamna hi a ni,” tiin a lehkhabu ‘It’sComplicated: The Social Lives of Networked Teens’ ah a sawi a.

He a thusawi hian a tih lan fiah em em pakhat chu internet khawih thiam, online thiam ni tur hian kum upat leh naupan lam a ni lova, inzir peih leh taimak leh taimak loh lam zawk a ni tih hi a ni. Kum upa zawk te hi chuan online khawvela han chetla tak tak tur chuan zir belh tur kan ngah tih chu phat rual a awm lova. Chutih rualin, digital khawvel thanlen hnan lo, digital immigrant kan nih avanga changkanna man pha ngai lo tur leh thiam ve ngai lo tura indah ngawt hi mahni tan a fuh lo mai ni lovin, naupang zawk te tan a pawi hle tih kan hriat a ngai. Kan thalai, tleirawl leh naupang te hi digital khawvela piang leh seilian an nih vang ngawt hian internet khawvela chetphung leh nunphung thiam an ni hauh lo. Ziak leh chhiar thiam (literate) nazawng hi lehkha thiam an ni vek lo ang bawk hian internet hun hmang tam leh online nasa, internet khawih thiam nazawng hi internet hmang thiam (digital literate) an ni kher lo tih kan hriat a pawimawh. Anni ho hi chuan digital leh online khawvel bak hi an hmuh phak miau loh avangin khawvel dang an hrethiam lo. Upa zawk te erawh chuan internet khawvel lo lan hma khan kan nunphung leh kan khawvel kha engtin nge a awm tih chiang takin kan hre thei. Chu kan tawnhriat (experience) tak chu naupang zawk ten an neih ve loh chu a ni a. Chung kan tawnhriat te bulthuta hmanga online/digital hmang thiam kan nih ve hi khawvel leh kan thlai leh tleirawl te hian an mamawh takzet a ni. Thiamna leh finna hian kan nunphung leh rilru puthmang thleng hian a sawi danglam chho zel dawn a. Digital khawvel lo lan hma khawvelah khan engtikah mah kan let leh tawh dawn lo. Mahse, hringnuna puitling zawk ten nausen leh naupang te en enkawl seilen a, an khalh puitlin a ngai ang bawk hian digital khawvelah pawh puitling zawk te hian kan naute kaihruai tur hian kan lo daikhalh a ngai ve tho mai. Chuti lo chu digital native, information technology khawvela cheng leh seilian tia kan sawi tleirawl leh thalaite hian online/digital thiamna tak tak an nei lo ang a, ram leh khawtlang tan tha an thawh tam thei lo tial tial ang a, online leh digital khawvela hun an hman tam ang ai hian an thiamna leh theihna, an hun leh tha senral zozai te hi kan hlawkpui lovang tih a hlauhawm hle a ni