Zirlaiten Social Networking Kan Hmansual Dan

Zirlaiten Social Networking Kan Hmansual Dan

            Social Networking leh Mizo te hi kum sawmhnih kal ta kha chu nise, Zohnahthlak zinga lehkha thiam ber pawh a inkungkaihna sawitir dawn ta ila, sawi tur a vân ve viau ngei ang le! Mahse, vawiinah erawh chuan vawksa kan ei a, a tui kan chawm a, a kawchhung tuizia bakah zunthlumin a huatzia thlenga kan hre bel em em tawh ang mai hian Social Networking leh Mizote hi kan inkungkaih nghet tawhin kan nitin khawsak phungah hian a bet tel tlat tawh lawi si! Chutiang taka kan inchhunga kum tam pawh kan hmelhriat hma hauha rawn tlangnel nghal a, kan thutkhawmna pindan atanga rizai hnuai thlenga min awmtleitu leh kan buaipui tak em em, thenkhat phei chuan hna bera kan neih tak ‘Social Networking’ chu eng tak nge a lo nih chiah chu le!

            Hmasang Greek mifing pakhat chuan mihring te hi a huho-a cheng thin leh khawsa ho, engkima in mamawh tawn leh inpuitawn thin (social animal) kan ni a ti a, a dik hmel hle. Khawvel changkanna lo sang zel leh hmasawnna lo thang zel te chuan chung khawvel mihring, mahnia tlei thei lo leh inmamawhtawn em em mai te chu thiamna hrang hrang (technology) hmanga an hmuhchhuah, inbiakpawhna leh inbiaktawnna (communication) mai piah lamah thu inthawnna leh inhrilhchhawn/inhriattir tawnna (information) hmanrua hrang hrang hmangin min thlunzawm ta ut mai a. Chu chu a tawi zawngin ‘Information/Communication Technology’ tia sawi thin a ni. Chu information leh communication technology thiamna huangchhungah chuan vawiina khawvel mihring te leh keini Mizote ngei pawh khawvel huap tukverha min dahtir a, American thalaite nen pawha thu khat vuaa kan titi theihna tura min thlunzawmtu pawimawh tak tak a awm ta teuh mai a. Tawngkaa kan inbiakpawh theihna telephone, mobile phone te bakah internet hmanga a huho leh mimal ang pawha awlsam taka kan inbiakpawh a, kan inhriattawn zung zung theihna tur heng facebook, twitter, instagram, whatapp, hike, messenger, we chat, skype leh a dang te chu mi thluak tha leh thiam tak tak te zarah Mizo te pawhin kan lo hmelhriat ve ta hle mai pawh ni lovin, kan nitin nuna tel ve leh bet tlat a lo ni ta a ni. Chung communication/information technology thiamna hmanga hmuhchhuah internet kaltlanga khawvel mihring te min thlunzawm a, veng khat/khaw khata chengza (global village) ang maia khawmualpui letliama mite pawh min inchibai tir a, min inhmelhriattirtu hrang hrang te chu khaikhawmin ‘Social Networking’ tia sawi a ni ta a, chung atana kan hman hrang hrang te chu Social Networking Sites tiin tunlai Mizo thalai, technology atchilh/ruihchilh (technology craze) te khawvelah chuan kan lo lam puam ve ta talh talh mai a ni!

            Kum 2006 chho vel atang khan Mizoram hian ‘internet’ hi kan lo hmelhriat ve tan a, mahse, kum sawm em pawh a la ral hmaa vawiina Mizo te, a bikin thalai te, he internet tel lova a tha zawng leh tha lo zawng pawha hmangtu kan tam tawhzia leh a tel lova awm hleithei tawh tlat lo kan pun chak dan hi ngaihtuah fe tham a ni tawh! A hma lawk, kum 2004 vela mobile phone kan lo hmelhriat tawh sa nen hmehbel kan thiam hnu, service provider hrang hrang ten sum siamna tha lutuk a nih hriaa internet pack an han siamchhuah leh hnu zet phei chuan Mizo thalai tam zawk te thian tha ber chu kan naupan lai atanga kan lo kawm thin leh hriat than, kan thian te ni tawh lovin, kan mobile phone kaltlanga kan thian chhar thar, he social networking hi a lo ni ta a ni.

            Mahse...tih a ngai leh thin! chhuk a awm chuan chho a awm thin a, damna dawi pawh hmansual chuan thihna thlentu a lo ni thin angin he social networking, a tha zawnga hman chuan kan nun tinuamtu leh hmasawnna kawng min zawhtirtu ngei pawh hi Mizo thalai, a bikin zirlai tam tak te hmakhua leh nun tichhetu a lo chang ve thei tho mai. Engtiang takin nge social networking chuan a hmangsualtu Mizo thalai, a bikin zirlaite nun chu a lo khawih pawi theih tak dan chu le?

            Sawi tak ang khan social networking sites hi a hmangtuten inhriattawnna leh inbiaktawnna, thiana iniamna leh kan duh leh mamawh, kan rilru te thleng pawha kan inhriattawn (share) theihna atana a siamtu (developer) ten an siam a ni. Chutiang taka tangkai leh chhawrnahawm a nih rual chuan social networking sites te hmang tangkai tak tak tur chuan ‘hun’  a ngai ta a ni. Chu tak chu zirlai te tana social networking in pawi a khawih lian tak pakhat chu a ni thung si ta a ni. Zirlai te kan inenfiah a ngai viau mai. Social networking hi kan hnathawhna hmun emaw, kan eizawnna a ni lova, kan buaipui ber tur zawk chu kan ‘zirlai’ hi a ni. Mahse, kan lehkha zirna tur hun hi darkar engzah chiah nge social networking-a kan hun hman hian min eiral sak ang le?

            Pahnihnaah chuan social networking hmangtute hi mize inang lo tak tak, a then chu tawngkam thlahdah leh tlahawlh tak tak te pawh an ni ang....chutiang mi hrang hrang a tluklehdingawn tel te kan titihona hmun a ni a. Chutiang taka hmangtu tam kan nih avang chuan thil tha chauh hi kan chhiarin kan hmu seng lo tih chu hriatsa a ni. Hetah tak hian thalai leh zirlaite kan fimkhur thiam a ngai hle. Kan hriatna, thiamna leh finna tizaua tipung theitu sawihona leh titihona hmun (forum leh group) tam tak awm karah hian kan rilru ngaihtuahna hruaikawi theitu hmeichhiat-mipatna rawngkai thlalak tarchhuahna leh sawihona hmun (group) zawka active tak hi zirlai enggzat tak awm ang maw? Chung group dukdak lem lova darkar engemawzat hun hmang thin te chuan an hun mai ni lovin, an rilru ngaihtuahna thianghlim tak chu sualna leh tisa chakna kawngah an hralh tih reng an ngaihtuah lem si lo!

            Kawng dang lehah chuan social networking kaltlang hian thian kan inchhar a, ngaihzawng thlengin kan inhmuchhuak a...a tha tho mai. Mahse, hei erawh i vawng tel ang. American tleirawl leh thalaite zinga zirchianna an neihah chuan social networking kaltlanga inhmelhriat, inngaizawng leh nupaa insiam ta te zingah nupa inthenna, ruihhlova tluksualna leh tualthahna thlengin hmaichhana intawng a, chutianga insuihnghet chho ta te aiin an tam zawk an ti tlat mai! Chuvangin kan zirlai aia thalai tam takin kan buaipui leh atchilh, social networking hi tual min thahtirtu, chhungkaw kehchhia siamtu leh nun khawihchhe vek thei khawpa hlauhawm a ni tlat asin....hmansual chuan!

            Kawng dang tam tak a awm....sawi tur a tam....hei chauh hi han belh leh ta ila. Mizo thalaite zinga Social networking hmangtu tam zawk te hi lehkha zir mek, zirlai kan ni. Chumi awmzia chu zirlaite hi heng social networking hmanga eizawngtu te tan chuan an customer hlun ber te kan ni! Heti zawng hian i ngaihtuah ngai em? Social networking site hmang tur chuan computer/laptop, a lo berah mobile phone pangngai tak neih a lo ngai a, chumi piahlamah internet hmang tur chuan internet pack/broadband connection neih a lo ngai leh a, chung zawng zawng nei tur chuan sum a lo ngai leh ta zel bawk a ni. Mizo thalai leh zirlai, heng social networking hmang nasa ber bertu te hi a tam zawk chu nu leh pa te thawhchhuah ring a khawsa leh lehkha zir, a tawi zawngin mahni intodelh lo, chawmhlawm kan ni. Chumi piahah kan zirlai atana a tangkai avang leh min puih avanga social networking hmangtu chu za-ah sawmhnih pawh kan tling kher lovang! Chutiang ang, tangkaipui leh sawtpui nana hmang lem si lo, zirna kawnga hmasawn phahna atana hmang chuang bawk si lo, mahse, social networking hi ka hmuhchhuah/siamchhuah ti hial thei awm khawpa bel leh hrechiang lawi si ten kan social networking hmanna atana nitina sum/pawisa kan khawhral hnem turzia han ngaihtuah hian India rama state rethei ber leh intodelh lo ber nih hi kan inhmeh hliah hliah zawk lo maw! Zirlai lehkhathiam si lo, sum heh viau lawi si-a min siamtheitu pakhat chu he social networking hi a ni thei tlat asin!

            Awle, engpawhnise, social networking hi amah mai hian thil tha lo a ni lo mai ni lovin, thil tangkai leh pawimawh tawpkhawk a ni zawk a. Mahse, he famkim lohna khawvelah hian thil tha ber nia kan hriat te pawh hian that tawklohna/fel tawklohna an lo nei leh fo thin ang hian, social networking pawh hian thalai leh zirlaite tan thatna tam tak a neih rualin a tha lo zawnga hmangte tan chuan a tha lo zawngin hna a thawhsak ve mai chauh a ni a. Chuvangin, miin zu a ruih avanga a ruitu zawk ni lo, a zu zawk hauh leh zilh chiamin awmzia a nei lo angin, social networking pawh hi a hmangsualtu leh chhiatpuitute dem leh hruaidik tum mang si lova a pawng a taka hnualsuat a, do chiam chi leh dem chiam chi a ni lova, khap rem chi lah a ni hek lo. I duh emaw, duh lo emaw, khawvel changkanna leh hmasawnna sang zel hian hei aia changkang leh hman nuam zawk social networking hmanrua hi a la rawn hrinchhuah belh zel dawn, i duhthlanna kha a pawimawh ta ber zawk a nih chu!