Aam Aadmi leh Mizoram

                                        

            Kum 2013 April thla tir a ni a. Delhi khawpui hmarlama Sunder Nagri hmunah chuan mi pakhat hian chawngheia nawrh a huaihawt a. A nawrh chhan chu Delhi khawpuia tui leh electric man sang chak lutuk chu a ni. Mahse, chawngheia a nawrhna chu tu khaw kha in an uksak lem lova, mi challang tam tak nuar te anga tawiawmtu mipui leh media mite lah an awm hek lo. A nawrh a tawp meuh chuan chanchinbu mi awm ang ang te pawh an lo tiltiak hman tawh a. Sawrkarna a lak huna Delhi a chengte tui litres 20,000 a thlawna a pek tur thu a sawite chu mi nuih tiza mai a ni. Chu pa chu tu dang ni lovin vawiina Delhi Chief Minister lo ni ta leh Delhi CM kumhlun Sheila Dixit hneh taka paihthlatu Arvind Kejriwal hi a ni.

            Khatih lai khan Kejriwal-a party din, Aam Aadmi party khan tu rin mah a hlawh lova, Political party upa leh kumhlun, Congress leh BJP te khing pha tur lek phei chuan tumahin an beisei lo. Mahse, Mizoramin inthlanpui kan hmachhawn hnua Delhi in inthlanpui a han hmachhawn ve meuh chuan tu te mahin an beisei loh leh mang lamah pawha an lo man phak loh thil a thleng ta a nih kha. Tunah chuan India ram politics chu ‘AAP fever’ chuan a tuam ta mek zel a. An term tawp lamah an hlawhtlin leh hlawhtlin loh chu thuhran nise, tunah rih chuan political party lian apiang an hlauthawng zual emaw tih turin social activist atanga politician-a inlet ta Arvind Kejriwal leh a party chuan India politics bupuiah mi thar chan chang mahse, an aia palian zawkte pawh an chhuk en nghal titih ta tlat mai a nih hi.

            AAP manifesto zinga mipui ngaihven berte zinga pahnih, nitin tui litre 700 a thlawna in tina sem leh electric chhiah chawi tihhniam te chu an han kaltan pui ta chu a ni a, hun kal zelah rah tha a chhuah ang nge, sawrkarin a chhiat phah ang tih chu political analyst te titi tui ber a ni chho ta rih a ni. Helam hi chu thuhran ni ta se, heti tak maia inthlanpui an hmachhawn vawi khatna chauh lehnghala AAP rawn lar ta thut mai leh India ram khawpui lian hrang hranga an than chak tak em em nachhan leh mipuiin an duhna chhan ber nia lang pakhat chu ‘VIP Culture’ tihbo an tumna hi a ni thei awm e.

            Sawrkar tura lakluh an nih phat atangin Kejriwal leh a cabinet minister te chuan an motor-a VIP light dah an han duh lo phawt a. Tin, minister te security rip tak an pek thin te hnarin, khawilo kalna-a motor tam taka official te inzui tir duah duah ang chi te pawh ‘aam aadmi(common man)’ kan ni tiin mi naran ve mai an nihzia lantirna atan an duhlo bawk a. Kejriwal ngei pawhin CM bungalow-a awm duh lovin,ama chenna in pangngaia awm a thlang a. Hei hi India ram, roreltu te leh an rorelsak te dinhmun inkar inhlat takah chuan thil thar leh mipuite rilru hneh em em tu chu a ni. Political party dangte ang bawkin an manifesto thenkhat, heng sawrkar sikul 500 din, delhi mihring panga zelin khum pakhat inhmantawm thei tura hospital thar sakbelh tihte hi chu a tak ram chang tur chuan rin a harsa deuh pawh a ni maithei e. Mahse, politician ten mipui sum renchem lek lova lal an hrawt thin ‘VIP culture’ tihbo tuma an bultanna hi zawngin nghawng a nei chiang a ni. Kuminah Lok Sabha inthlanpui kan hmachhawn dawn bawk si nen, Party lian te lu chu AAP hian a tihai ve deuh niin a lang. AAP vang tih chu awm chiahlo mahse kumin January 4 a UP CM Akhilesh Yadav-a, hnungzuitu motor 20 chuang nei thinin  hnungzuitu motor pali a’n nei ta mai te,Jharkhand CM Hemant Sorena’n a car-a siren dah an duhlo thar ta te, Rajasthan CM thlan thar Vasundhara Raje-i’n CM Bungalow-a insuanluh a hnar te hi AAP vang ni lo ta se, eng vang nge ni ta ang? Zalen hnu-a Indian politics-a politician ten ‘mi pangngai’ nih an chak vawikhatna a ni hial mai ang em?

            Eng pawh chu nise, AAP hi entawn vek ang tihna phei chu a ni law, mahse kan Zoram politician te pawh hian entawn tur tam tak erawh an nei tih chu a chiang viau a ni. India today poll atanga a landan chuan State capital 24 a mipui 75% te chuan an CM atan Arvind Kejriwal hi an duh a(India Today 20^th January, 2014 issue.p.24). An duh chhan chu sawi tam a ngai tawh lo.Mizo mipui te hian kan politician hlunte hi CM tura kan duh ber, mi tha dang pawh lo chhuak se, chung te ai pawha kan duh zawk tur te an ni ve meuh ang em? A chang hi chuan politician thenkhat te hi chuan mipui rawngbawltu (public servant) an nihna hi election dawnah chauh hian an ti emaw ni chu aw tih theih a ni, sawi thui lo mai ang. Chu tak chu AAP in hnawla a rawn champion pui taka chu a ni a. Congress party, political party hlun leh kum za chuang India politics lo chenchilh tawh leh politics khawvela mi hrang (veteran/seasoned politician) engemawzat awmna meuh pawh tilu haitu leh hunrei tak an chakna (strong hold) ni thin, an bupui ngei mai luhchhuaka hneh taka phihthlatu chu Arvind Kejriwal leh a party, mi naran ve mai ten an din chu a ni a, chu dinhmuna hlangkaitu pawh chu mi naran ve bawk, mipuite an ni. Tin, India ram hmun hrang hranga he party chawilartu ber pawh lal hrawt tum lova mi naran anga awm leh mi naran te tana rorel tuma ke an penna mai chu a ni. Hei hi kan zoram politician te pawh hian inbihchianna atan hmang thei se a va duhawm em. Khawi emaw-a minister chhuak hlek a hnunga official engemaw zat, an thil va tih tura tel lo thei lo ni lem si lovin an zui duah duah reng chung te chuan engtin nge an hnuaia thawkte an thawhrim ang a, engtinnge kan ram hi a intodelh theih tehlul ang ni! Inlam enkawl tura naupang daha, a nu leh pa, roreltu leh thutawp siamtu ber an phet buai reng chuan chhungkua pawhin tam mai loh chu hmabak a tlem duh viau ta ve ang! Mipuite hian politician te hi thil ropui leh changkang, khawvel hriat hat khawp leh ram pum nghawr dawt khawp thil ropui ti kher turin kan beisei hran lo. Mi naran ten kan banphak mipui rawngbawltu, election zawh hnu pawha ‘mi naran (common man)’ ni zui reng tho te hi mipui ten kan thlakhlelh leh beisei chu a ni tih hria se a tha hle a ni.