Media leh Thalai te
Kan chen mekna khawvel, ‘tunlai
khawvel’ tia pulpit tlang atanga chawei dawhkan thlenga kan chipnawi khawvelah
hian ‘hmân’ leh ‘tun’ khaikhin pawha thil a
danglam nasatzia chu tu hrilhnawn mah kan ngai lo. Kan khawhawi leh rilru
puthmang reng reng pawh a khawvel huap (global) ruih tawh mai a. A’n tia lawm…
Lengpui khaw nu ho, airport kianga chawhmeh zuara eizawng thin te zing tho
inbiakna tawngkam te chu, “Vawiin flight an cancel leh cancel loh i hria em?”
tih te a ni tawh a, thlawhmaa bung chung pawhin khawvel ram changkanga office
kal te ang bawkin kan ‘hello’ zet zet
tawh mai zawng a nih hi! Chutiang khawvel, changkannna leh hmasawnna thlipui na
takin a nuaivir vel karah chuan keini ho pawh hi kan lo then ve mek a ni.
‘Tunlai
khawvel’ han tih hian vawiina kan chenna khawvel leh nitina kan nunin a tawn
leh a hriat te hi a ni satliah mai lova, American hote tunlai khawvel leh keini
Mizoten tunlai khawvel tia kan chhâl
te hi a inang lo thei viau awm e.Mithiam te chuan ‘tunlai khawvel’ tia kan sawi
bik hi hun(period) hnihah an then a.Pakhat zawk chu modern world(tunlai khawvel) tiin an vuah a, a dang leh chu Post-modern world(tunlai khawvel
piahlam/hnulam) tiin an vuah ve thung a. Modern period(tunlai hun) an tih hun chhung bik hi chuan khawvel
puma revolution(inthlak danglamna) hrang hrang-heng Industrial
revolution,khawl(machine), inkalpawhna hmanrua-rel leh rel kawng an hmuhchhuah
leh siam, inbiakpawhna(communication)- Dâk(postal),
thirhhrui leh inbiakhlatna(telephone), Agricultural revolution-Thlai tha chi an
hmuhchhuah te, lei tihthatna hlo(Fertilizer) chi hrang hrang te leh lo/huan
enkawlna hmanrua changkang zawk an hmuhchhuah te leh thildang tam tak, kan
nitin nun tiawlsam tu khawl thil leh thil dang an hmuhchhuah chur chur hunlai,
kum zabi 19na atanga kum zabi 20na chawhma lam vel thleng a huam a tih theih
awm e. He modern world/period hunlaia an thil hmuhchhuah leh siamchhuah te
chuan nasa takin khawvel, a bikin ram changkang leh hausa zawkah te chuan hmasawnna
leh changkanna a thlen a, khawvel pumpui chu hun(era) tharah a rawn hlangkai ta
a ni.
He modern period hian sawi tak ang khan mihring thiamna
leh theihna nasa takin a tipung ta a.Chu chuan thil thar tha zawk leh changkang
zawk te hmuchhuak thei turin technological development(thil siam chhuak tura
thiamna lama hmasawnna) nasa tak a rawn thlen ta a.Chu chuan an thil hmuchhuah
tawhsa te a aia tha zawka thuamtirin leh, a aia changkang zawk dang te
hmuhchhuah belhtir zelin ‘Post-modern
world’ah khawvel chu min hruailut ta a, kum zabi 20na chawhnu lam atang
chuan khawvel leh a chhunga cheng te chu hun kal tawh aia changkang, awlsam leh
nuamsa taka khawsak theihna
hun/khawvelah min hruailut ta a ni. Tichuan, vawiina kan chenna khawvel, kan
tunlai khawvel chu ‘Post-modern world’-thiamna,
hriatna leh changkanna nasa takin a chiahpiah khawvel a lo ni ta a ni.
Chu kan chenna khawvelah chuan nitin kumtinin thil thar,
kan nun leh khawsak ti nuamsa thei tur tam tak an hmuchhuak âwl
lova. Kum 10 liamta leh vawiina kan khawsak phung leh nunphung danglam takzia
te, kan hmelhriat ngai loh leh suangtuah phâk
ngai loh thil/hmanraw thar chi hrang hrang, tha zet zet kan ipte leh inchhunga
a tam tawhzia atang te hian he post-modern world-a ‘danglamna’ nasa tak lo
thlengin keini Mizo te ngei pawh min thlak danglam nasatzia chu a chiang mai
awm e. Chung danglamna (revolution) hrang hrang rawn thleng zinga Mizote, a
bikin thalai te, a tha zawng leh chhe zawng pawha min nghawng nasa em em tu
leh, Khawtlang, Kohhran leh chhungkua pawhin kan buaipui em em te zinga pakhat
chu “Media Revolution” hi a ni.
Media?
Media chuan mihring te kan inbiakpawhna, indawr tawnna,
chanchin kan inhriat tawnna leh chutiang kawnga kan inthlunzawmna chi zawng
zawng te chu a huam ti ila a fiah mai awm e. Chanchinbu atanga lehkhabu, lehkha
thawn atanga mobile phone thlengin media hian a huam vek a ni. Mithiam te chuan
chung kan inbiakpawhna leh inhriat tawnna hmanraw hrang hrang, mi pahnih inbiak
tawnna leh indawr tawnna hmanrua ni satliah mai lo, mi tam tak, hmun hran hrana
awm te pawh thu dun ang maia kan indawr tawn theihna hmanrua te chu hlawm
khawmin, hlawm lianpuiah an chhungkhawm ta a, chu chu Mass Media kan tih hi a ni ta a ni. Chu Mass media huang chhungah
chuan media hrang hrang te chu chi hrang hranga thendarh leh vek an ni a. Chung
zing atang chuan hetiang hian han hlawm hrang leh dawn teh ang:
Print
Media:
Print media chuan lehkha pheka hawrawp chhutkai a inbiak tawnna
leh indawr tawnna atana siamchhuah te hi a huam a. Heng lehkhabu, lehkhathawn,
chanchinbu, hoarding, signboard etc te hi a huam vek a ni. Mihring inbiak leh
indawr tawnna (media) hmanraw upa ber niin kum zabi 15na lai vela John
Gutenberg-a’n kum 1453a lehkha chhutna khawl (Printing Press) a hmuhchhuah atang
daih tawha media hmanraw pawimawh tak atana hman tan tawh a ni a. “Mass Media”
tih thumal pawh hi helai hun atanga hman tan hi niin mithiam te chuan an ngai a
ni. Vawiin thlengin chanchin hriatna, inhrilhtawnna leh vawnthatna hmanraw
pawimawh tak leh indawr tawnna hmanraw tangkai ber te zinga mi a la ni ta reng
a. Tin, mi maktaduai tam takin ei hmuhna atan an la hmang reng a ni, entir nan,
chanchinbumi (journalist/reporter), lehkhabu chhutu leh chhuahtu (Publishers)
etc.
Broadcast
Media:
Kum
zabi 20na lo inherchhuak chuan media hmanraw thar, tha zawk leh changtlung zawk
a rawn hringchhuak zel a. Lehkha phek hmanga indawr tawnna leh inbiak tawnna
chu a aia chak zawk, changkang zawk leh awlsam zawk, mi tam zawk huapzo bawk
si, heng Television, Cinema, Radio, Video Cassette, a hnu deuhah CD, DVD etc
ten a rawn luahlan ve leh ta a. Heng media hmanraw lo chhuak thar te hian
khawvel chanchin leh thil thleng te chu awlsam takin khawvel pum hmuh leh hriat
theih turin a thehdarh (broadcast) ta chur chur mai a, media hmanga khawvel
danglamna (Media revolution) chu a hma aia chak zawkin khawvel chuan a tawng
chho ta zel a ni.
Digital
Media:
Broadcast Media
huangchhungah chuan Science leh technology-a khawvel hmasawnna chuan danglamna
a rawn thlen chho ve zel a, broadcast media hmanraw pawimawh em em mai, a hmaa
mite zawng zawng aia changkang, tangkai leh huapzo dang, a lem leh ri nena
thehdarhna hmanrua, a hmaa mite aia changkang leh changtlung zawk ‘Digital media’
a rawn hringchhuak leh ta a. Kut zungtanga hmeh zeuhin chung digital media
hmanraw kutphah tia lek lek te hmang chuan minit leh second tinin khawvel puma
mihring tluklehdingawn rual te chu kan inthlunzawmin kan inbetawn ta mup mup
reng mai a ni! Chung digital media hmanraw zingah chuan vawiin thleng pawha
keini Mizo te pawhin kan hman tangkai, chutih ruala kan chhiatpui nasat em em
zinga mi ni lawi si mobile phones (Kum 2000 vel atanga hman tan) leh internet
(Kum 1990) vel atanga hman tan) te pawh hi a tel a ni.
Media Revolution chuan kum 2014 kan han chuankai meuh
chuan, kan ramin kum 10 awrh la hmelhriat chauh mah ila, kan choka atanga mut
pindan, office hnathawhna atanga inhlawhna, feh kawnga kal te atanga
thlawhtheihnaa vansanga thlawk te chenin kan mamawh dan(?) leh a te llova kan
khawsak theih loh dan a inchen tlang ta deuh pât
mai zawng a ni e.
Media
Revolution, Mizoramah:
Sawi tak ang khan khawvel ram zau zawk leh hnam upa zawk
te zingah chuan kum zabi 15na lai vel atang daih tawh khan media hi hman leh
hmelhriat a lo ni tawh a. Hun lo inher zela thiamna, theihna leh finna lo sang
zel chuan chung media hmanrua te chu thuam tha leh hmuhchhuah belh zelin
changkanna/tunlaina (modernism) atanga changkan lehzualna/tunlai lehzualna
(Post-modernism) hun min lo chuankaipui ta a ni.
Kum 1980 kumtir lamah te kha chuan Mizoram pumpuia motor
nei kha kut tang thliaka chhiar tham lek an ni ngei ang. Chutiang chiah chuan
kum 1986 FIFA World Cup-a Diego Maradona vanglai, mahni inluma TV-a enpha chin
ngat kha chu a Mizoram pum huap pawhin rawt thak tham pawh an awm meuh lovang!
Kum 1990 chho vela telephone, mahni chhungbila kawl te pawh kha khaw khatah
chuan an hlut theih em thin kha maw! Mahse, kum 20/30 awrh a liam a, vawiina
Mizoram leh Mizo te dinhmun chu a dang ta. Television te hi Mizoramah chuan kum
1990 bawr chho atang khan kan hmelhriat ve tak tak tan chauh kha a ni a.
Antennae herchawp ngai leh Bangladesh channel manfuh lai hun atang kha chuan
vawiina kan dinhmun chu a sang ta hle mai. Tin, tunlaiah chuan TV kawl lo
chhungkua hi veng khatah hian zawngchhuak dawn ta ila, kut tang thliaka chhiar
tur pawh hi kan hmuzo tawh dawn em ni?!
Telephone pawh kum 1990 bawr chho atanga kan hmelhriat
tan chauh a ni a. Kum 2000 a lo inherchhuah chuan mahni inah kan kawl far tawh
a, a kawl lo te tan lah STD booth a awm ta thluah mai bawk, kan changkang sawt
viau zel! Kum 2004 a lo inherchhuak a, kan la hmelhriat ngai loh leh ngaihtuah
pawh kan thiam loh, mobile handset a rawn chhuak ta! Kum 10 a liam leh meuh
chuan Mizoram chu India ram state zinga mobile phone hmang nasa berah kan
chhuak ta luah mai a, kum 2013ah mobile phone hmangtu chu 7,01,959 kan lo tling
ta hial a, connection/top up etc atanga sum lalut hnem ber, Airtel company
chuan bill/top up man vel atangin thla tin cheng vaibelchhe ruk vel ngawt a la
lut hial a, service provider dang, heng BSNL, Aircel, Vodafone, Idea etc te
nena kum 2014 a thla khata an sum lakluh belhkhawm chu vaibelchhe 16 vel a ni
(Vanglaini 19.2.2014 Issue). Mizo mipui te hi kan lo hausa hle mai!
Chutiang zelin internet te pawh kum 2005 vel atangin kan
hmelhriat chho tan ve ta zel a, tunah phei chuan phone-a khawih mai theih turin
company ten hma min laksak ta bawk nen, hriatloh leh hmuhloh tak tak pawh kan
nei ta lo, Media Revolution thlipui chuan Mizoram a rawn nuai ve tak tak ta!
E-banking, Smart Card, sorkar kalphung thar atan
E-Governance, engkim mai chu internet leh kh âwl
thil hmang vek a lo ni ta a, ram changkang zawkah te phei chuan minit khat lek
power supply a khaihlak hlek pawhin rampum a buai nghal luai zel tawh mai a ni.
Media
Revolution leh Mizo Thalai te: Malsawmna nge Anchhia?
Media hrang
hrang te kan sawi tawh a, tin, media lo thanchhoh zel dan, hmanraw changkang
leh tha zawk lo chhuak zel ten khawvel pumpuia mihring te nun, khawhawi leh
nunphung, rilru puthmang thlenga a thlak danglam nasatzia kan sawi tawh a.
Tunlai khawvela Mizo thalai,tleirawl leh chhungkua, khawtlang leh Kohhran
thleng pawha min run tu leh a hmang thiam tana dinchhuahna, a thiamlo te tana
boralna ni si chu “Social Media” hi a ni. Prof. Andreas Kaplan leh Prof.
Michael Haenlein te chuan, “Social Media
chu internet hmanga a hmangtu ten an duh duh an duanchhuah theihna leh
inthlengtawn theihna hmanrua te hi an ni,” tiin an sawi a. Chung zinga a langsar
zual te i han chhuichiang leh dawn teh ang:
Mobile
Social Media:
Mobile Social
media chu mobile phone hmanga social media hman tangkaina a ni ti ila a dik
thei awm e. Ram changkang zawkah chuan mobile phone hmang hian indawr tawnna
leh insumdawn tawnna, sum leh pai thlengin internet kaltlangin an khawih tawh
a, chu chu E-Commerce ti te in an sawi thin. Tin, Mizorama kan hman lar em em
heng social networking sites-Facebook, Twitter, Instagram, Bebo etc hmang te
hian inbiakpawhna leh thlalak inthawn satliah mai ni lo, indawr tawnna leh
insumdawn tawnna atan te, internet kaltlanga inkawmkhawmna E-Conferencing
neihna atan te, hmasawnna kawng hrang hrang sawikhawmna Forum buatsaihna atan
te, thil lei leh hralh leh Chanchintha thehdarhna atan te thlengin ram hrang
hranga thalai te chuan an hmang tangkai hle a. Heng Social Networking
Sites zingah hian kum 2004 atanga hman
tan, Facebook hian hmangtu khawvel pumah a ngah ber a, mi maktaduai 900
chuangin an hmang a, chung hmangtu zawng zawng zinga mi maktaduai 543 te chuan
mobile phone atang hian an khawih thin.[1] Kum
2010 a University of Maryland, USA a mithiam ten an zirchiannaah chuan
internet-ah hian website hrang hrang zingah Social networking sites ah te hian
internet hmangtu tam zawk te chuan an hun an hmang thin tih an hmuchhuak a.
Chung zinga 20% te chuan an Personal Computer (PC) hmangin an khawih a, 30%
erawh chuan Mobile Phone atangin an khawih thung a. Tin, US rampuma heng
Facebook, Twitter etc te khawih nana thalai ten an hun hmanral chu kum 2011 a
minute tluklehdingawn 88 ni thin kha kum 2012 ah chuan minute tluklehdingawn
121 ah a chho dawrh mai a, 37% laiin a pung tihna a ni.[2]
A pawi ber mai chu heng mobile social media hmanrua te hi
atchilh/ruihchiah (Addict) theih an ni a. Hei hi Mizo thalai tam tak te pawhin
kan natna vei a ni ve ta in a lang. Social networking sites engemaw bera
account nei lo hi chu Mizo thalai kum 16-40 inkarah hian a tlem zawk kan ni
ngei ang a. Chung zingah chuan eizawnna leh zirna kawnga a tangkai avang te leh
tangkaipui avanga hmang ni lem lo, nuam tih ve hrim hrim vanga hmang, thlalak
enkualna leh comment ho te te post na atan te a hmang, tangkaipui leh sawtpui
lem si lo hi 80% aiin an tam hial ka ring. Chumi piahah You tube, porn sites
etc tlawh taima zet zet pawh hi kan kat nuk ngei ang. Mizo thalai ten internet khawihna atana kan hun
khawhral zat te leh chung atana kan sum khawhral zat te hi zirchiangin
chhutchhuak ve ta chiah ila, ram hmasawn leh changkang nih hi kan phu meuh ang
em? (La ni chuang lo mah ila!). Mobile phone atanga khawihtu hi 50% vel bawr
kan ni turah ngai ta ila, chung mobile hmangtu zinga 60% vel chu thawhchhuah
mumal nei lem lo kan ni ngei turah ngai bawk ila. Kan mobile man leh top up
man, hun khawhral zat….. Hun leh sum hi kan hloh teuh lovang maw?! Social
Networking sites-a mahni thuruk niawm tak, thian satliah te chu sawi loh, thian
tha ber leh thisen zawmpui te hnen chauhva sawi âwma
mawi te kan la post vu vu mai thin te hi kan zahawmna (dignity) tihhniamnaah
kan ngai em? Media Ethics-a Mizo Thalai tam zawk te kan la hniamzia tilangtu
maiah kei chuan ka ngai. Kan phone changkang leh tha pui pui te hi mite chuan hun
leh sum khawhral nan ni lovin hnathawh nan, hun ren (save) nan leh sum peipun nan
te an hmang asin!
Television
Culture:
Media zinga Mizo
thalai te hun, rilru leh nun ei hek leh hruai khawlo nasa tak pakhat leh chu
“Television Culture” hi a ni. Mizoram hi India ram State zinga reality show
ngah ber kan ni mai ang em aw ka ti thin. Television culture hian Mizo te,
thalai leh thalai lo te pawh min eichhe nasa em em tawh. Nilenga hna thulh thak
leh zanah pawha khawdang hawi lek lova, a chhun a zana Korean Serial en leh
atchilh nutling, nula leh tleirawl hi Mizo zingah hian engzah nge awm ang?
Tunhmaa pâwn pawh chhuak ngam mang lo leh
mahni pawh inthup hram hram thin “Pherh” kan tih mai te tunlaia an huangtau tak
em emna chhan hi eng vang nge ni ang? State economy phu lova kan incheina leh
khawsak sân nachhan te hi television-a kan
hmuh tam ber khawthlang ho tih kan entawn atanga kan nunpui tak te a ni thei
mai ang em? Sawi tur tam tak a awm. Television culture-in a hrinchhuah, Mizo
te, a bikin thalai te min tidanglam nasa em em tu chu milar te Pathianna (Cult
of Celebrity) hi a ni. Tunhma deuh kha chu nise, mipa kekawr tawt teng tawng ha
hi khawlai chhuak ngam an awm ka ring lo. Mahse, tunah chuan nula te ai maha
tawt, an thisen kal vel pawh a buai mai hlauhthawnawm khawp leh a hâk
lam aia a phelh lam huphurhawm zawk hmel khawpa kekawr zuih leh tawt ting teng
ha hi Mizo mipa te zingah pawh kan tam ta hle mai! Hmeichhia lah nise, kumkuruh
lang lo chauh khawpa chhing pawnfen leh kekawr bul nen pawh bazaar leh
puipunnaa kal kan zak ta lo. Incheina (fashion) hi ka sawisel a ni lo. Mahse,
khawthlang ram, mahni duh dan dana mimal tin an khawsakna khawtlang
(Individualist Society) a milar te rilru leh mize puakchhuak atanga nundan leh
incheina rawn parvul te hi keini Mizo thalai te hâk
leh tih ve atan hian a inhmeh meuh em? A hatu leh incheia te leh chutiang anga
nunga te zak lo bawk, a lo thlirtu leh hmutu an thalaipui ten lo ngaisanga lo
entawn ve lehchhawng bawk…..a buaithlak
thin teh e! Kan khawtlang nun hi pipu te hunlai ata tawh inpeizawn tawn, inpui
tawn leh a huhova khawsa leh chengza thin khawtlang (Collective Society) a nih
hi kan theihnghilh/haider emaw, palzut kan tum hun hunah kan tan khawtlang,
chhungkua leh Kohhran chu an hnawk ang a, chutiang chiah chuan an tan hnawksak
kan ni ve nghal mai dawn a ni. Chuvangin, Mizo thalai te hi TV-a nitin zantina
kan hmuh leh hriat te, milar te atchilhna/ dawi âtna
(cult) atang hian kan harhchhuah loh chuan kum 50 liam leh se, hnama chhiar
tham Mizo hi kan awm tawh lo palh ang tih hlauhawm tak a ni, kan tawng tual lengah
pawh sap tawng nen lo chuan thenkhat chu kan insawifiah zo meuh tawh lo a ni
lawm ni?!
Behavioral Scientist Steven Martino chuan America thalai
te a zirchianna (research) atangin hetiang hian a sawi a, “Naupangin TV-a
mipat-hmeichhiatna lam rawngkai a en hma poh leh chutiang ang chiaha a tih ve
hun chu a lo thleng thuai thin a, a tlangpuiin chutianga sex an hman avang
chuan an rilru hrehawm avangin an nun a khawloh phah tlangpui a, tin kum 20 an
tlin hmain hmeichhia ten nau an pai tlangpui bawk. Tin, thalai, tharum thawh nasa
leh kut thawh hrat te chu tharum thawhna media kaltlanga en leh hmu nasa thin
an tam ber a, tleirawl leh rawlthar zingah TV advertisement, Commercials leh
movies vela an en atanga zu leh vaihhlo kaihhnawih khawih tan an tam ber” tiin.[3] Canadian
naupang te khuan chawhrualin kar khat chhungin darkar 14 TV an en ziah niin an
chhut a, chung naupang te chuan high school an lo kai chuan naupan lai aiin TV
an en rei zawk a, an classroom aiin TV hmaah hun an hmang tam zawk niin an
chhut a, chuta zirmi ten an hmuhchhuah chu chutiang taka TV en nasa thin naupang
leh tleirawl te chu an thil en chuan an rilru leh nunphungah nasa takin nghawng
a nei a, TV-a an en chu an pawnlam nun tak tak (real life) ah an hriat loh
hlanin an lo entawn/ nunchhuahpui reng
mai zel a lo ni.[4]
A
khaikhawmnaah chuan television culture in a ken tel langsar tak chu ‘rualawhna’ hi a ni a, chu chuan kan
rilru, nunphung, incheina leh khawsak phung thlengin, a tawi zawngin kan moral
system/ethics thlengin Mizo thalai te min nghawng mek a nih hi.
Advertisement
Craze:
Fakna
(advertisement) hi khawi hmunah pawh hmuh tur a awm tih theih a ni ta.
Kawngsira hoarding lian pui pui intar te, movie en kârlaka
fakna chawlh (advertisement break) te, poster leh SMS kan dawn te thleng hian
advertisement hian min hual tuau tuau reng mai a ni. Heng advertisement te hi
thil pawi lutuk ang chuan thenkhat tan chuan a lang lo mai thei e. Mahse, Mizo
thalai tam tak te hi heng advertisement-in a bual ât
avang hian an khawhawi a dang vek asin! Thil fak (advertise) tu te hi sumdawng
company lian tak tak te an ni hlawm a. An thil siamchhuah te fak leh thehlar
tur hian milar tak tak te an hmang thin. Heng faktu (Advertisers) te thil tum
ber chu a lo thlirtu te mit, rilru leh thinlung hipbeh a ni tawp mai a, chuta
an hmanraw tangkai ber leh an sum dechhuahna pawimawh tak chu media hrang hrang
te hi an ni ta a ni. Mizo te zinga Green tea, Slim tea etc lar chakzia te hi
advertisemnent atchilh leh ngaihven (advertisement craze) Mizo te zingah chuan
thil âwm
tak pawh a ni reng lo maw? Khawvel puma heng fakna tarlanna media hrang hrang
te hi company lian pui pui panga- Time Warner, VIACOM, Vivendi, Universal, Walt
Disney leh News Corp company ten an thunun a. Heng company panga te hian nitina
media atanga kan hmuh leh hriat- TV Program, radio programme, news, films,
sports, internet surfing etc 95% te hi min rawn chhawpchhuah sak a.[5]
Chung an programme karlaka sumdawng company ten an thilsiam an rawn fak chuai
chuai te chu kan lo thlir ta thin a ni. Helaia thil pawi tak pakhat lo inzep
leh ta chu media te leh company te hian “warning” an pe tel ngai lo hi a ni!
Chu tak chu Mizo thalai tam tak te tlukchhiatna thin pakhat pawh hi niin a
lang. Media hi ‘kawhhmuhtu, hmai khat chauh nei’ a ni tih kan hriat reng a
pawimawh. Thil awmna min hrilh a, khawnge a awm tih leh a thatna a hriat theih
zawng zawng min fah a. Mahse, chu chu kan mamawh zawng a ni em, kan ngeih zawng
a ni em, kan khawsak nen a inmil em, kan chhiatpui palh ang em? tih lampang a
ngaihtuah tawh lo, hlawkna a hmuh tawh chuan ui hmuia khawn ang hlauh a ni leh
tawh thung si! Mizo thalai, cosmetics, tha nia an hmuh leh hriat avanga an
hman, an vunin a ngeih leh si loh avanga vun natna vei te, sam tuak leh
tlakkawlh phah ta hlauh te pawh zu awm a! Advertisement-a thil chhuak thar tha
tak tak an hmuh, an bul vela miten an leka an hâk
leh an nei sup sup hmu a, sum nei chuang si lo, rualawh ve bawk si avanga mahni
taksa inzuara ‘call-girl/call-boy’ a tang ta engemawzat hi Aizawl leh Mizoram
khawpui lian danga High/ Higher Secondary School leh College zirlai te zingah
hian an inpel suau suau zel zu han ti a! Kei ngei pawhin Aizawla taxi ka
chuanna pakhat driver ka atangin he thu hi a dik ngei a ni tih ka hria.
Advertisement hruaisualna leh atchilhna (Blackmailing/craze) hi Mizo thalai te
hian nei lo ta ila, zanreia bike tlan fur fur te, Mizo society nena inzawmna
nei hlek lo party,jam session etc, KS atanga corruption thleng hian a tlem phah
deuhin, kan khawtlang nun, a bikin zanlam boruak te hi a thianghlim zawk deuh
ang em?
Internet
Fever:
Mizo
thalai lehkhabu chhiar peih kan tlem tial tial a, chu ai chuan Mizo thalai
internet hre lo hi an tlem tawh zawk ang! Chuvangin, Kan tunlai khawvela
computer technology pawimawhna leh a tel lova kan nun theih tawhloh zia chu
sawi nawn a ngai awm love. Kan nuna computer hmun sang leh pawimawh tak
luahtirtu hi ‘internet’ a ni ti ila
kan sawi sualin ka ring lo. Internet chuan ‘Worldwide web (www)’ hmangin
khawvel mihringte min thlunzawm ta a, khawmualpui lehlama thil thlengte pawh a
thlenglai ngei keini khawvel lehlama awm te pawhin kan mit ngeiin kan lo hmuh
theih phah ta a ni. Lehkha ziaka Dâk
In kaltlanga thawna hunrei tak thangtir ai chuan internet kaltlangin second
reilote-ah kan inthawn zung zung tawh zawk a ni. Amaherawhchu, he internet,
remchanna leh awlsamna nasa tak min hluitu hi hmansual theih tak a ni tih erawh
kan hriat a pawimawh hle. Nu leh Pate chuan internet hman tangkai dan leh a
pawimawhna pawh kan hrethiamin kan pawh phalo chiahlo a ni maithei.Mahse, kan
fate hian kan rin phak bakin internet khawvel hi an bel tih kan hriat a
pawimawh hle. Internet ah hian engtiklai pawhin
pornographic(zahmawh’hmeichhiat-mipat lam rawngkai) film leh thlalak vawikhat
hmeh zeuhva hmuh mai theih sing tel a awm reng a.I fanu/fapa khan
computer/internet hi a khawih/hmang satliah emaw i tihlai khan a rilru
ngaihtuahna chu thui tak a lo hruaisual thei reng asin. Heng bakah hian
internet-in a kentel, mihring nun hruaisual thei-sum inthapa infiamna(online
gambling), hmansual chuan thian sual leh kawppui dukdaklo inchhar theihna
awlsam lutuk social networking sites-Facebook,Twitter etc te hi thingtlanga kan
awm vang ringawt hian kan fate hian an hrelovin an hmelhriat lo hauh lo a nia.
Tunlai khawvela hmelmapa hmanraw tha ber pakhat chu ‘changkanna’ hi a ni tih
kan hriat a pawimawh hle mai. Tunlaia sex tape lar ta lutuk te, Mizote zinga
mipat-hmeichhiatna zalen ta lutukte hi internet kaltlanga kan hmuh leh hriat te
vang hi a ni ve thei ang em? Kan sawi tak te kha internet hmansual theihna
kawng tam tak zinga tlemte chauh an ni.
Thil
mak deuh mai chu tunlai thalai leh tleirawl chu sawi loh, Middle school zirlai
leh naupang pawl Sunday school zirlai te pawh hi stage-ah kochhuakin emaw, eng
programme-ah emaw pawh hian chanvo-solo, lam etc nei turin han ruat chhin mah
teh, zak cheih cheih an vâng pharh mai ang! Heng
ho aia tlema la upa deuh, high school chinah ngat phei hi chuan ‘râwl
lai nun’ chungchangah ngat chuan zirtir an ngai tawh lo ha ha hlawm viau tawh a
ni! Ngaihzawng zawn dan atanga Sex chungchang thleng hian nu leh paten an hrilh
ni miah si lo, lehkhabua an chhiar leh Biakina an ngaihthlak pawh ni si lo hian
an thiamin an hria a, a hmei apa hian an zei em em vek tawh mai! Chung zawng
zawnga kaihruaitu, an coach chu tudang ni lovin an handset hmanga zirtirna petu
‘Internet’ hi a ni. Amaherawhchu, hetihlai hian Kristiante hian he changkanna
leh hmasawnna, mi tam tak nun hruaisualtu hi chung mite, an nun a hruaisual te
chhanchhuahna leh a hruaisual tur te venpuina hmanruaah kan hmang ve hlauh thei
bawk. Internet-ah hian kristian te tana en himlo leh tha lo thil tam tak a awm
rual hian kan thlarau nun chawm thei ennawm leh thuziak tam tak a inphum tel ve
teuh tho a ni. Chuvangin, tunlai khawvel, Print media (Chanchinbu, magazine
etc) aia digital/Audio-visual media (A lem/ennawm nena thu thehdarhna- News
channel, movies,demand channels etc) hi Kohhran hian kan hman tangkai thiam a
pawimawh ta takzet mai. Pulpit tlang atanga Pathian thusawi mai piahlamah hian
mit titlai thei zawnga thlarau nun chawm thei ‘audio-visual sermon’ lamah hian
tan kan lak a hun ta hle mai. Khawtlang hruaitu te pawh, sualna umbo kan tum a
nih chuan computer leh internet lam kaihhnawiha kan khawhawi kan tihzau ve reng
loh chuan tunlai Mizo thalai tam zawk te hi internet addiction hriin a man te
an ni a, damdawi kan chawh sual palh hlauh ang e!
Facebook
Depression:
Kan
changkan tawh lutuk vang nge, Mizo te zingah pawh hian natna mak pui pui, a
hming pawh kan hriat ngai loh leh hmelhriat ngai loh, thenkhat phei chu a hming
pawh kan lam thiam tha thum loh chenin kan mikhual ve ta reng mai! Tunlai
thalai, a bikin khawvel puma tleirawl te natna vei buaithlak deuh mai chu
‘Facebook Depression’ an tih hi a ni. Depression Mizo te zinga a lar tawh dan kan
hria a, depression nei te awmdan pawh kan hre thawkhat viau tawhin a rinawm.
Dr.Gwenn O’Keefe, CEO and editor-in-chief, Paediatrics
Now chuan, “Teenager (Kum 20 la tling lo) te zingah facebook depression hi
a nasa zual a. Heng Social Media sites-a hun an hman tam lutuk chuan depression
nei te awmdan thin ang-mut hunbi mumal lo, chaw ei mumal lo, thinrim thut thut,
mi kawp lawr atanga mal ngawih ngawiha inhriatna thlengin an nunzia leh
nunphung a danglamin a inthlak phah thin,” tiin a sawi.[6]
Heta tang hian ‘thil thar’ lawm leh ngaihven tak Mizo thalai te hian chin tâwk
neih leh inven kan mamawhzia a chiang awm e. Tunlaia tleirawl te zinga lar em
em mai ‘ngona damdawi’ an tih mai hi Aizawl mai ni lo, District Capital mai
pawh ni tawh lovin, thingtlang khaw chengker zawk thlengin an hria in an hmang
tih chu nula leh tleirawl tam tak, an hmai leh nghawng rawng inang lo tak tak han
hmuh atang hian a chiang reng mai a. Khawi atangin nge Aizawla miten chung te
chu hman nachang an hriat a, engtin nge hmun danga mite chuan Aizawla an hman
ang te, an chin ang te leh an tih ang te chu tih nachang an lo hriat ve nghal
zung zung mai? Media power a ni lo thei lo! Nu leh pa te pawh hian kan fate hi
Facebook leh media chawilentir lova keimahni ngeiin kan enkawl seilen a
pawimawh hle a ni.
Engpawh
nise, Bible-in, “Mihring chauh lo chu zirtir an ngai lo,” a tih angin kawng tha
leh dik zawk kawhhmuh hi rual u zawk te chuan kan nau te laka kan mawh leh kan
bat a ni tih hi hria ila. Media chungchang kan sawia a thatlohna lam kan sawi
teuh rual hian a thatna leh tangkaina lam pawh a thatlohna lam ai maha tam sawi
tur a awm ve tho va, mahse, Mizo te hi kan ni bik pawh a ni maithei, vanglai
thisen lum lai chuan kan ke pen hi eng lam hawi zawng pawha a chak em em
rualin, mihring nihphung (nature) ah hian Eden huan ata tawh sual leh dik chiah
lo han chhin ve hrim hrim châkna hi a bet tel
ve hrim hrim a. Chuvang chuan a tha lam kawnga khûp
zawi viau si leh bawp rit tak te pawh hi a tha lo lama kua awm zeuh tawha lo
putchhuak leh hman zeuh khawpa tuantha te kan nih leh lawi thin si avangin
media in a nghawngchhuah tha leh tangkai tam tak te aiin a nghawng tha lo lam
zawk kan han thlur bik ta deuh a ni. Hei erawh hria ila, ruah a rawn sur a,
ruah sur mek bantir tum lova keimahni zawk kan hul theihna tura nihliap kenga
kan lo inveng a, kan tuizem te erawh ruahtui dawngkhawl tura a chhin kan hawng
thung thin ang hian Media Revolution hi tihtawp tuma lo beiha lo do chiam chi a
ni lova, khap rem chi lah a ni hek lo. Media ethics- A tha lai hmang tangkai
tura inzirtir chunga ‘media nihliap tha’ siamchhuak a, chu chu Mizo thalai
kalsual leh media hmangsual tam tak te khumtir a, media tangkaina leh theihna
erawh hmang tangkai leh chhawr thei tura kan inhawn zau sauh sauh a, kan
inzirtir uar leh hrilhhriat tam sauh sauh hi a pawimawh zawk chu a ni.
Thu
lakna leh lehkhabu rawn te:
1.
Kristianna leh Tunlai Khawvel Vol-II - Christian Media Society Publication.
(2012)
2.
Globalisation Zungzam leh Mizo te
barakhaih khawvel - Lalduhawma
Kawlni.
3.
Tunlai Khawvela Mizo te harsatna (Thalai
te thlirna atangin)-Rev.L.H. Rawsea
4.
Issues Facing Christians Today - John Stott
5.
The Media Politics and Public Life - Geoffrey Craig
6.
“Tunlai
Khawvel leh Kristianna”- Zarzosanga, Bungtlang Bial BKHP Seminara Paper
Present.
7.
“Tunlai
Tleirawl te Khawvel”- K.M.S. dawngliana. Serchhip Bial Jr.TKP Seminara
Paper Present
8.
Internet (Wikipedia leh a dang te).
[1] C.Lalnuntlinga. “Social Networking leh Thalaite.” Article
from “Kristianna leh Tunlai Khawvel
Vol-II.”p.115
[2] http://en.wikipedia.org/wiki/Social_media
[3] http://www.rand.org/blog/2013/09/what-effect-does-media-have-on-youth.html
[4] http://www.ncbi.nlm.nih.gov/pmc/articles/PMC2792691
[5] http://uthmag.com/media-influence-on-youth/
[6] http://uthmag.com/media-influence-on-youth/
Comments
Post a Comment