POLITICS,WORLD CUP LEH KA SUANGTUAHNA( 20th June 2010)

Tunlai zet zawng Zokhaw in 150 vel awmna khaw VCP inchhung atanga khawvel ram ropui America President chenna in thleng pawhin titi a inang a, kut hnathawk atanga millionaire ngaihven zawng pawh a inang thup mai.Ni e, khawvela ennawm ropui ber(The greatest show on earth)ti hiala an sawi FIFA World Cup 2010 chu South Africa ah kum li zet kan nghah hnuah khelhin a lo awm leh ta.Mi lian bual in pawh tia lo  mi inhnuai luahte atanga eiru leh eiru lote inchhawng khir iaih uaih chhung atang pawhin Vuvuzela(inkhelh laia an lo hamrik chuah chuah thin plastic tawtawrawt hi)thawm a ri chuah chuah reng zawng a nih hi.He ennawm ropui kan thlir a, kan en lai mek leh a boruakin khawvel kil tin kil tang a tuam mek lai hian kawng dang zawngin he khawvel ‘hunpui’ pakhat hian suangtuahna min neih tir tlat pek a.

            World Cup an khelhna stadium te hi Serchhip district mipui zawng zawng pawh kan thawl han hanna tur khawpa lian an ni hlawm a.Inkhelh apiangin chung stadium lian leh ropui tak takah chuan mipui sing tel, an ram football players te lo auphur thin an awm ve ziah a.A tam zawk phei chu mel sang tam tak a hla atanga mahni sum senga kalkhawmte an ni.Heng mipuite hi world cup tihlawhtlingtu leh ti ‘world cup’ tu pakhat an ni a.Football hi mihring 11 ni lova mi 12 inkhelhna game a ni tia an sawi fo chhan pawh heng mipui te hian khelmuala an ram player khelte chu an lo auh thin avanga player ten phurna leh tumruhna nasa tak an lo neih phah thin vang a ni reng a ni.

            Heng mipui maktaduai tel,South Africa-a inkhel en tura lo kalte hian suangtuahna dang min la neihtir leh ta zel a.B.A kan zir laia kan thil zir pakhat,ram roreltu politician te zinga mi chi hrang hrang chi thum kan zirte min hriatchhuahtir a.Pakhatna ah chuan gladiator politicians an tih te an ni a.Hmasang  Rom sawrkar lai atang daih tawh khan gladiator te hi an lo awm tawh a.Gladiators te chu ennawm chhuahna hmun colleseum chhungah inbeiin  entu mipuite tan thih thlengin an insualin hriamhrei hmangin an inbei tawp mai a.Chuvang chuan gladiator ni tur chuan mi huaisen,tuarchhel leh hrat khawkheng leh pawisaak nei lo tawpkhawk nih a ngai tawp mai.Chung mi hrat khawkheng te an kohna hming chu hawhin politician zingah pawh ‘gladiator politicians’ tia vuah an lo awm ta a.Heng politician te tan hi chuan an awmna party chu an engkima engkim,an nunna leh innghahna a ni tawp mai a ni.An party an sawrkar emaw sawrkar lo emaw,a nuam leh hrehawm,mi sawichhiatna karah leh  an harsat lai ber pawhin heng gladiator politician   an tih te hi chuan  an party chu an phatsan ngai lo.A pahnihna ah chuan ‘transitory politicians’ te an awm leh a.Heng ve thung erawh hi chu ‘lehlama awr sen,lehlama awr dum’kan tih ang deuh,an awmna hmun leh an thutiam thlak zut chi an ni a.Mizoram politician leh political party member zingah an tam khawp mai!Sawrkar thar lo ding apiang rinawmna thu lo tiampui ve thei reng ho hi an ni ber mai.Zoram Kristiante zingah pawh an tamzia chu kan la sawi zel ang.A pathumna ah chuan ‘spectator politicians’ an tih te an awm leh a.Heng ho hi chu tan lam nei lo, neutral kan tih te hi an ni ber awm e.Politics leh a kaihhnawih velah chuan tel peih lem lo,a him chin atanga lo thlir a, an duh duh lo fak a lo sawisel thintu te an ni.

            Khai le,world cup lam i hawi leh hrih teh ang.Entu mipui kan sawi zingah te pawh khan khing politician chi thum kan sawite ang chi khi an tam khawp mai.Fans thenkhat chu an ram teamvte an inkhelhna hmun apianga anmahni tana au tang tangte an awm a.An auh ber an player ten an hmelhriat  em tih lam an ngaihtuah lo,football inkhel hmuhnawm en tura kal an ni satliah hek lo,an ‘ram’ tan ke an penchhuak a ni tih inhre rengin khawi hmunah pawh,eng dinhmunah pawh an tan lam chu a ngai reng mai a ni.Chutiang zel chuan mahni in lum atanga TV-a lo en a,an ram tana lo au te leh tan lam pawh nei mumal lem lova lo phek en ve mai mai pawh an kat nuk tho mai.

            Tunah chuan kan sawi tum takah i lut tawh teh ang. Politician chi thum-gladiator,transitory leh spectator kan sawi te khi kan Kristian nunah i han senglut dawn teh ang le.Kan ram,kan Kohhran,kan ‘TKP’ ah hian ‘Gladiator Kristian’, Lalpa tana mi hrat khawkheng hi engzah tak awm ang i maw? La hre ve lo te hnena Chanchintha hril tura ram thim lam pana pen chhuak kan missionary te chauh hi gladiator ah kan lo chhiar palh ang e.Heng Lalpa pasaltha te hi kan sawi nepna a ni hauh lo,an inpekna leh Pathian an hmangaihna thuk tak avangte hian Kristian gladiator tih loh rual an ni lo.Mahse nang leh kei hi Lalpa’n min kohna hmun leh min dahna hmunah hian a tan gladiator kan ni ve thei.Kohhran a chak loh lai ber pawha tel tlat,a thawhchhuah tlemte,a anhnah  hralhna emaw atang pawha Pathian ram tana thawhlawm pe tang tang te,Kohhran leh FOD-a ‘hruaitu’ nih vang emaw,’member’ nih ve vang ringawta rawngbawlna chanvo chelh leh tihlawhtling hram hram ni  lova a ringtupui,sual avanga rum te rumpui a,an hmelma hneh tura tawngtaia Pathian kara beihpui tu,nitina Lalpa tana a thara a hman theih tura inserh thianghlim thin te hi an ni ‘Kristian gladiator dik takte chu.Chung te chu thlemna thlipuiin a nuai chhiat zawh loh,thatchhiatna leh dawngdahna in a ngam lohte an ni a.Lum leh vawt leh khawchhia in an rawngbawlna a tibuai lova,midang an er in an phut ngai lova,an hna leh eizawnna, an ‘thil pawimawh’ aiin ‘Lalpa thil pawimawh’ an dah hmasa zawk thin a.Mahni insenso a tul pawhin lawmman leh mite fak leh sawichhiat phut lo leh pawisa lova ‘mihring rawng’ ni lo ‘Lalpa rawng’ bawltute chu an ni.Kan tun dinhmunah hian nangma ngaihdan  ni lo, ‘mite ngaihdan leh hmuhdan’ ah leh a tirtu che ‘Pathian hmuhdan leh ngaihdan’ ah mi hrat khawkheng,’Kristian gladiator’ tia vuah tlak in rawng i bawl em le?     

            Kan khawhawi tizimin kan Kohhran huangchhung ah leh Unit TKP huangchhungah han insawrbing ta ila.Kohhran leh FOD a chak lo, a ro tia rak rak a,a chak theihna turte, a ro lohna tur atan te-a Lalpa auva tan la peih chuang der si lo,inkhawm chu inkhawm ve reng,FOD activities(Fellowship,hnatlang etc) ah pawh a nihna in a phuar avang leh a inkhawm/hnatlan loh chuan mawi lova hriatna avang chauhva tel ve thin,mahse a bakah chuan thahnemngaihna nei tawh chuang lo,Kohhran leh pawl a hlima a nawm lai erawh chuan a phusa nasa ber ni leh lawi si ‘Transitory Christian(nun nghet nei lo)’ kan tam hle a ni.Heng bakah Kohhran leh FOD thiltihna ah pawh lang leh tel ngai lo hrim hrim(Spectator Christian),Krismas leh Kumthar ruai theh vela rawn kal hram,Kohhran ningkhawng pawh hre mumal lo engemawzat an la awm zui.Lalpa hian a rawng bawl tur pawhin a duh fir tawlh tawlh tawh si a,chu Lalpa min phutna dan hnuai ah chuan Kristian chi thum kan han tarlan-Gladiator-Mi hrat khawkheng/pasaltha,transitory-a mawi tawk,peih tawka inhmang leh spectator-ti tak tak peih lem lo zingah khian ka Kristian nun hi khawi berah khian nge ka awm a,ka rawngbawlpuite leh Pathian hian khawi berah khian nge min dah ang le?

            Kan thu khar nan erawh hei hi i hria ang u.Lalpa tana pasaltha ‘gladiator kristian’ te chuan an thahnemngaihna,inpekna leh insenso an  huamna piah lamah hmangaihna,dawhtheihna,lainatna leh mi hriatthiamna te an nei tih erawh thiehnghilh suh(IKor 13:4-8).Midang erna te,phutna te,itsikna te ni lovin an tih loh pawh a, kep an ngaih lai pawha rawngbawlpuite kep a,an chak lohna lai leh an harsatna te midang hnena anmahni relna atana hmang mai lova tawngtaisak thin a,sual hnathawh avanga Kohhran leh pawl a rum laia mahni inphata Kros lo pu thin tute an ni.OB,Committee member, nihna leh chanvo neih vang leh nih vang ni lovin,nihna neih loh avanga thahnemngaihna tlachham chuang si lovin,an lawmna chu Lalpa dan-a ni zawk a,engtinnge Lalpa ram tan ‘keimah’ ni mai lo,kan Kohhran,TKP etc hian ke kan pen ang tia Lalpa dan thu a chhun a zana ngaihtuah a,engkima ‘LALPA’ dah hmasa thintu te chu ‘GLADIATOR KRISTIAN’ te chu an ni.I ni ve em le?