Phengphe nunnem(10th September, 2010)

He hla, Pu Zirsangzela Hnamte phuah hian kei chauh lo pawh, Zofate zingah hian an dawn a tihthui leh an lung a tihlen hi an awm teuhin ka ring.A phuahtu rilru lam chu lo dahthain, midangin he hla an lo ngaihdan lampang pawh i theihnghilh hrih teh ila.Keima mimal ngaihdan liau liau, he hlain keimaha chhemdam thli a rawn thawttirin min chhemna lam hawi zawng zawngin ka’n chip ve dawn ange!

                                                “Leng der der thangvan zauvah

                                                  Partin zu lawr phengpheleng”

Tunlai khawvel thang zel leh changkang zelin a kentel tam tak zinga pakhat chu ‘buaina’ hi a ni. He buaina hian hna lama buaina,nitin eizawnna kawnga buaina, firfiakte avanga  buaina leh a dang zawng zawng a huam thei ang. Mitin mahni zawn leh hna theuhah kan buai tawh a, mahni tanghma theuh haiin kan hmanhlel tawhin hunawl kan nei tlem telh telh ta.Midangte tan lek phei chuan kan hun neihchhun pawh kan hmang phal ta meuh lo.Van dumpawl ruih,zau tak maia thlifim thaw heuh heuh kara tumah tibuaitu nei lo leh enghelh nei miah lova han thlawh der der mai chu…Chutah, pangpar zu thlum tha tha duh thlang theia, han dawt zui phei chuan….lung a va awi duh dawn hliah hliah em! Keini, kan duh reng vang leh chak vang pawh ni miah lovin buai leh hah reng rengin kawla ni chhuak kan chhiar a!

                                                “Thlum tin chhim tlaini lengin

                                                  Zal nan run a chham si lo” 

Kan inang lo teh e maw!! Keini dik taka kan thawhchhuah, bianga thlantui luang zawih zawiha kan dehchhuah pawhin min daih zo ta meuh lo.Awm leh mawi, tha leh sual pawh thlu thei lek lovin ‘awhna leh itna’ sual avangin mi chanai, an zema mi ngei ngei pawh kan rut chhuak hreh tawh lo chu a ni a. ‘Phengphe nunnem’ erawh chu khawvel ram zawng zawnga thlum tinreng, partin lawra a chhim chung pawhin keini ang lovin chhungril hahdamna leh thlamuanna a chham chuang der si lova.

                                                “Theih chang ve se lenthiama’n

                                                  Tuangtuah par an vullai ni

                                                  Chhunrawlah va ring ila

                                                  Hringnun sual hnutiang chhawnin”   

 Kan tunlai khawvel zet zawng, hawina lam apiangah duhamna, nekchepna, hlemhletna leh sual tinreng intihsiakna mualah dinchan tuma hmanhlel an lo phu suau suau a, dikna leh ‘mi dik’ chuan bawlhhlawh bawm ai pawhin tangkaina an nei tlem ta hle nite pawhin a lang thawthang ta! Hetiang reng renga khawvel nun hman ai chuan parzu thlum dawta lungmuang taka damchhungni  vuiliam thei phengphe nunnema chan chu keipawh ka hnial phal lul lovang,theih nise chuan!!

                                                “Phengphe nunnem leh zaidam

                                                  Vahkhuai, tho leh hmiripa’n

                                                  Parzu dawnza thlir changin

                                                  Hringnun hi ka tahpui thin”

Mitin mai hi ‘ni,ni,ni ka tan, ka tan’ an ti ta vek mai emaw ni le….a hausate an hausa tual tual a, a retheite an rawp telh telh thung si. Thenawmpa leh thenawmpa pawh choka tukverh kan inkharkhum ta hmak hmak hlawm mai! ‘Sem sem dam dam, eibil thi thi’ Mizo khawtlang nunze mawi leh hawihhawmna tuifim pawh kha rualelna leh duhamna tuilianin a tinu zo ta!Siamtu din nungchaten parzu khat tlana lungrual taka an dawt za hmuh meuh chuan hnim ruih mai chu kei ka awlsam phianin ka ring!!

“Chhun nipui sensa hnuaiah

                                                  Thlir chang thinlai tihlimtu

                                                  I sakruang ze tin tial mawi

                                                  Par zawng nen an mawi mange”

 Siamtu’n a duan ang leh ni tura a siamdan bak chuan phengphe nunnem leh nungchate hian midang pianzia awhna leh thikna an nei lo.Siamtu lung an dum em em tho si!Kuttling lova sum lakluh hmanga in leh lo din khawn khir iaih uaih, neihkeh cheta belte phai theilo kawl ang hrima inchhek arbawma, khawtuala inleng parh velte ai chuan rukruk leh eiruk them pawh tello, an nihna anga lungawia, mahni chantawk leh khuanu ruat anga hringnun kawng zawhtute hian a ni lawm ni, sumin a lei theih loh ‘nun hlimna’, suahsualna ni sa-in a em chauhte, tha reng nei tawh lova an tluk laia kawl thin zawktute chu?

                                                “Phengphe nunnem lenthiami

                                                  Lo leng leh la kan runah

                                                  Kei ariang leh parmawiten

                                                  I ngaiin kan kiu vawng vawng”

 Kan ngaihsan em em,sap vun var hote pawhin an la ngaihsan ve lehchhawn milar, ‘celebrities’ hote hi en  teh. Sum…an nei.Nupui/pasal…an inneiin an inthen awl lo!Mipat-hmeichhiat, ruihtheih thil leh nawmchenna tinreng…tem loh alawi an nei tawh lo.Mahse hlimna…khawiah nge? A thenin silai dawtah he khawvela hlimna leh nawmna an zawnna zinkawng an titawp a, a then damdawi overdose in. A then an inawkhlum…sakhaw hrang hrangah an inlet thul!An tan ‘nun’ hian hlutna a nei meuh tawh lo a ni mai lo maw? An zinkawng leh tawnhriat chanve pawh la thleng pha lo hian ‘khawvel ka thlahlel’ te chu  kan la ti ve tak tak tak a! Lal Solomona, khawvela rohlu zawng zawng, a hmuh theih apiang khawmtu, nawmchenna tinrenga hlimna zawnga, ‘a mit it zawng apiang hlah lotu’ leh chu achhapah, chunglam atanga thilthlawnpek, finna ropui lutuk, ram hla tak atang pawha an pan huai huai khawpa hmingthang rochungtu pawhin ‘Ni hnuaia thil awmte hi engmah lo mai a lo ni’ a ti tawp mai si a.Kan la dai tlem leh dai pawn aleiah ‘min la chimpil em lo bawk a’ ti niawm fahranin kan la duhamin kan la pamham tang tang hlawm si! Rah tur a awm tawh loh hnu, khawvel tuipuia kan luh thuk hnuah chuan a tui hak hian mi tam takte angin kan la tlahlum mai dawn tih kan dawn pha der bawk si lo!

Kan ram kallai rel sual tawh leh rel sual mek, kawng dika min rawn hruaikir a, sual tuipuiin a lenbo mek kan thalai rualte rawn chhanchhuaka  nieng thar hmu tura min rawn dinthar lehtu tur ‘phengphe nunnem’ hi khawilam atang takin kan chung vanzawlah hian lo thlawk tak ang maw le?!!