Hlimni lungngaihthlak!

Zokhaw lama meihawl rawhtute an hlawk viau chuan thlasik a intan ta tihna a ni a.Sumdawng ten Kolkata leh Bangkok an kart awn sek chuan ‘bazar runpui’ a hnai tihna a ni mai!!Sumo counter ah mi an phu suau suau a, kan airport neih ve chhun,khawvel chu sawi loh, India state dang airport te nena khaikhin pawha fanghmir tia lekah pawh khawilam lal chhungkua nge maw tih tura inchei parh ten an neih baka chung hreta hawi vawh vawh chunga flight number an tih sek tawh chuan engemaw tak a lo thleng dawn a ni phawt mai.

          Ni e, khing zawng zawng khian Kristiante hunpui krismas chuan khawvel ram dang zawng  zawng a rawn tuam ang bawkin kan zotlang ram nuamah pawh thlen zai a rawn rel leh dawn a ni tih chhungtinte min rawn hrilhhre leh ta!Chu hun lo thleng tur chu a ni mitin ten milian lo thleng tur hmuah taka kan neih rohlu ber ber leh tangka, kumpui lingleta thlansa phulkaia kan lo khawl tang tangte kan phawrh chhuah hun chu ni;mahse nau piang chibai bukna atana hlan erawh chu kn tam vak lo ta ve ang.Eng pawh chu nise, he hun, Krismas hi chuan neinung leh nung lo, khawpui leh thingtlanga cheng pawh nise, kan nunphung chu a khawih danglam ve chiang a ni lawm ni?! Hlimna hun, chhungkhat laina leh thiante,kar hlaa thenrual thate duhsakna kan inhlan tawn hun, Pisa kaite awllen hunlai,zirlai leh hnathawk hmun hrang hranga awmte pawhin hah leh sum sen pawh sawi lova mahni in luma sikri ai ngei tuma kan hawkhawm hun, computer age-a kan chawngchen hun chu a ni ber alawm le!! Chhun ni sa vawl vawl mail eh van dumpawl ruih mai ten thlasik boruak vawt var mai phungbawma sawma min hahdamtir sawng sawng hun chu kum khat chhunga a hmasa ber leh a tawpna ber ni nghal bawk turin kan lei chuan a rawn herchhuahpui leh ta a ni.

Mahse hei hi i  ngaihtuah ve ngai em?In chhungkua, nupui fanau, u leh naute nena dawr changkanga foreign ar(Turkey etc) hem hmin nena inchhung kuma in cheina eng tle neuh neuh chitin leh Christmas tree tle siar siar hual vela thlamuang taka i/in intuituah lai khan i/in pawnlam hmun tam takah chuan he krismas hun hi chhungkaw thenkhat tan chuan kum khat chhunga an rilru hah leh lungngaih ber hun a lo ni reng mai tih hi.Nu leh pa thenkhat ten an fate phai atanga lo haw tur nghakhlel em ema an lo thlir laia thenkhat tan erawh phurrit dang an phurh belh hun rawn inherchhuahpui tu chu eng dang ni lovin he krismas hun ngei a ni asin!Corruption pawlh buai lohva sum hailuttu te leh mi chanai sum an eisak ak puar pawng,bazaar a chhuak thar thar lei pup pup leh chhungkaw pa ber, fate tana second hand lane-ah pawh a tlawm tlawm zawng hram hrama lo bazaar tawk tawkte hlimna leh lungngaih rilru hahna ve ve te hi han buk chin ve the, a buk a inrihhleih viau maithei!Khawtlanga tum dang zawng aia ruihhlo huangtau hun,zuruite pawr zual hun leh zan khawvawt pawh sawi lova kan dan kengkawhtute leh mi tlawmngaite, mutmu pawh tuah hleithei lova siamtu chu he krismas hun ngei hi a ni.Hmanni lawka Biak In lamtuala a chhuak hmasa pawl leh a ‘rau’ ber berte pawhin an piantharna an theihnghilh hun, fanu tam takte sawn pai hun leh zu leh drugs in kan thalai tam tak a huangchhunga a lawmluh tamlai ber hun a ni miau si!Hlimna hun tia kan nghahhlelh hi chhungkaw tam tak leh khawtlang hruaitute tilungngaitu leh ti luhaitu a ni fo asin.

Kan damdawiin ten tlawhtu an ngah hun ber leh nunna hlu tak, zu no khat leh drugs tlem te te-a hralhte, accident rapthlak tak nena lo thlengte an tam hun ber a lo ni ve bawk a! Kan ram dung leh vanga damna in bela khawhar leh na tuara he hun hmangtu tam takte hi I rilru sir khat tal chu he krismas lai hian lo luahtir ve hram the;vanneihna hi tu ta bik mah a ni lo ania!Vwai khat tihsual avang leh nun tleu laklawh avanga tan in chhung thim leh rimchhe taka he hun hmangtute hi hlimna vawrtawp chang tur chuan kan beisei thei loving.Hnuchham ina naupang,chhia leh tha pawh la thliar thiam lo, nu hmangaihna leh pa thlazar hnuaia thlamuanna mamawh ngawih ngawihte chan hi I dawnpui pha ve em le?Thil ropui leh ram pum nghawr dawt khawpa lian tham tham ti turin tumahin min beisei lo.Mahse an tan hian engemaw chu kan ti thei chiang a ni lawm ni? Krismas kan hman theihna chhan pawh hi Van Lal Fapa,kan sualte tlan tur leh kan lungngaihna min hnema, kan phurrit min chhawk zangkhai tura he khawvela a lo pian champha a ni tih hi a hretu mai ni lovin, a taka lanchhuahtirtu kan nih hi a hun tawh viau lo maw?

Chhung leh khat, ram dang leh hmun danga awmte pawh kan inchahkhawm hram hram hun, chhungkima hman ngei tuma kan hmanhlel hun krismas ah hian chhungkaw tam takte tan chuan an hmangaihte tell ova an hman hun a lo ni vet hung asin.Hlimna nui ri kara lungngaihna rum ri pawh hi kan hmuhhmaih thiang loving.Awle, a enga pawh chu nise, famkimlohna khawvela cheng kan ni miau si ale,kan hlimni hi a inherchhuak reng thei bik lova,lungngaihna kan mikhual hun thleng lo thei thin si lo mahse, khuanu erawh han dem thei ziazang kan ni silo.Mahse hei erawh kan thu hnuhnung atan han inchah leh teh ang.Midangte tana hlimni leh lungngaihni-a siamtheihna leh chanter theihna thuneihna hi chunglam khian thui tak kan kutah a dah tih erawh chu theihngilh lo hram ila.Tichuan, he zawhna hi han inzawt theuh teh ang.He hun, krismas ah hian Pathian thu angin midangte tana malsawmna kan ni dawn nge, ‘hlimni lungngaihthlak’ ah kan chanter dawn le?!!