Indira Gandhi National Open University (IGNOU) hre chiang rawh le
‘IGNOU’ tih hrim hrim hi chu kan hre fur tawhin ka ring a, chu tih rualin, a lam pum la hre miah lo hi kan awm teuh va ka rin bakah, he zirna in sang hi engnge a nih, engnge a kalphung, hna zawnna atan a tlak em, eng eng nge zir theih…a tawi zawngin, IGNOU hi zirna chhunzawm zelna emaw, zirna hrim hrim atan a rintlak in, chhawrnahawm a ni em tih hi ka han sawi zau duh lai tak chu a ni.
Mi tam takin IGNOU kan hmelhriat dan hi siam that leh in hrilhfiah a pawimawh takzet a. Mi tam zawk ten IGNOU kan hriat leh sawi dan ni fo thin chu zirna in pangngai-a zir chhuak zo lo/thei lo leh hna nei tawh ten an hna-a an kaisanna atana certificate awlsam an neihna a ni tih hi a ni a, IGNOU hi lehkha thiam thei vak lo leh kum upa lam, hna-a kaisan mamawh ten an duh leh mamawh awlsam zawk a an hmuhna ang lekah mi tam tak hi chuan kan ngai a, hei hi a dik lo ni mai lovin, thil pawi tak a ni a, IGNOU din chhan leh a thil tum kan hriat loh lutuk vang a ni chiang hle bawk.
A chung a ka han tarlan, IGNOU chungchanga kan hriat dan leh ngaihdan dik lo kan in hrilhfiahna atan chuan IGNOU tobul hi tlem han chhui zau hlek ila. India ramah hian State Open University hi kum 1982 daih tawh khan din leh hawn a lo ni tawh a. He mi hma fe, kum 1974 khan Central sawrkar chuan ram pum huap open university din a tul a hria in, zir chiangtu tur member pariat awmna Committee, kha tih laia Jawaharlal Nehru University (JNU) a Vice Chancellor ni lai, G. Parthasarathi kaihhruaina (chairmanship) hnuaiah a din a. Committee chuan uluk taka zir chianna a neih hnuah ram pum huap open university chu a rang thei ang bera din ngei turin rawtna sawrkar laipuiah a thlen a. He mi bawhzui hian sawrkar laipui chuan kum 1985 khan Central Ministry of Education chu ram pum huap open university din dan tur ruangam duang turin a hriattir a, Ministry hian chak taka bawhzuiin, August, 1985 khan ram pum huap open university hawnna tur, Indira Gandhi National Open University Bill chu Parliamentah put luh a ni ta a, Parliament-a rorelna in hnih ten lungrual taka an pawm hnuah Indira Gandhi National Open University Act chu 20th September, 1985 atang khan hman tan niin, IGNOU hi a lo piang chhuak ta a ni. Hei vang hian, a din dan kalhmang hrim hrimah pawh IGNOU hi sawrkarin a pawmpui thlap university, ram rorelna in sang berin dan (law) hmanga a din, India ram puma zirna in sang (higher institutions) te enkawltu, hriatpuitu leh viltu ber, University Grants Commission (UGC) pawhin a hriatpui leh pawmpui thlap a nih bakah, Central sawrkar hnuaia Ministry of Education hnuaia zirna in sang te zinga pakhat a ni tih kan hriat a pawimawh a. A awmzia berah chuan, tuna Central sawrkar enkawl, ram puma University zawng zawng te nen hian IGNOU hi ‘University’ a nih angin an dinhmun leh nihphung a inang vek a, Mizorama central university kan neih, MZU, ICFAI etc te nen pawh hian IGNOU hi Central sawrkar hnuaia awm, UGC pawhin a hriatpui leh pawmpui thlap a ni tih hria ila, IGNOU certificate chu hna zawnna atan a hman tlak tak tak lo/loh tih ngaihdan I lo nei emaw, he ti zawnga tawngkam I lo nei thin a nih chuan sim nghal hmak ang che…UGC leh Ministry of Education, Govt. of India in a pawmpui leh hriatpui zirna in sang atanga certificate I dawn reng reng hi khawi hmunah pawh a pawm tlak (valid) vek a, eng hna dilna atan pawh hmang dawn la, JNU, MZU chhuak te certificate neih leh IGNOU atanga zir chhuak I nih anga I certificate neih kha a pawm tlak dan a inang reng tih I lo hre tawh dawn nia!
Chu tih rualin, IGNOU hi university dang te nen a kalphung leh nihphungah hian danglamna lian tak a awm a, hei tak mai hi mi tam tak ten IGNOU kan hriat leh hmuh dan a dik loh phahna chhan lian tak pakhat pawh niin a lang. University tam zawk te hi chu a hmuna cham chilh leh kal chilh a zir ngai (residential system of learning) tura duan an ni a, ral khat atanga zirna (distance learning) tura duan leh din an nih miau loh avangin, chung university-a zirna sang zawk zir duh te tan chuan a hmuna cham chilh leh kal chilh a ngai thin. Mahse, mi tam tak chu chhungkaw dinhmunin a zir loh avang te, sum leh pai harsatna bakah eizawnna in a zir loh vang te, chenna hmun in a zir loh vang leh kawng hrang hrang avangin, a chunga kan sawi, zirna in sanga zir chak leh duh em em, mahse, dinhmun in a zir miau si loh avanga zir zawm thei si lo kan awm thin a, India ram pumpuiah hian chu ti ang mi chu maktaduai tel an awm a, Mizoram pawh kan bang chuang lo. Heng mi te tana an ban phaka zirna in sang chhawp hnaihsak leh, ram chhung, hmun kil khawr bera cheng te thleng pawh a zirna in sang a cham chilh leh kal chilh a zir ten zirtirna an dawn ang an dawn ve theihna tur ngaihtuahna atanga IGNOU hi kan ram rorelna in sang berin dan hmanga a lo din a ni a, IGNOU Act, Section 4 ah pawh he thu, IGNOU din a nih chhan leh a hnathawh dan kalphung tur hi chiang taka ziah lan kalh a ni. Cham chilh leh kal chilh kher lova, ral khat atang pawh a zirna in sang ber bera zirtirna an dawn ang te kan dawn ve theihna atana din leh ruahman a nih angin, IGNOU zirna hnuaiah chuan cham chilh leh kal chilh a university danga zirtirna an pek leh kalpui ang hian kalpui ve a ni lova, zirlai te tana an nitin nunphung ti buai lova inbiak tawnna hmanrua (communication technology) eng pawh hmang a, zirlai te dinhmun mil zela zirtirna pek hi IGNOU hnuaia kan in zirtirna kalphung chu a ni a. Hei vang hian, university dang te ang a kum tluan a class kal tlut tlut ngai lovin, a mamawh te tan counseling sessions, zirlai te remchan hun nen a en mila neih thin a ni a. Hei tak te hi a that tehlul nen, IGNOU chu class kal a ngai lo, class kal miah lo pawhin a pass theih te kan la ti ta dah a! IGNOU zirlaibu te hi rawn zir in, exam te hi rawn hmachhawn ve chhin la, IGNOU zirlai har zia leh zir eih loh va pass chhuah a har zia chu I rawn hre mai ang. University dangah te pawh hian IGNOU zirlaibu te hi an zirlai te hnenah zirtirtu te hian an zir tur atan an pe fo va, kei ngei pawh hi chu chu a tak a tawng tawh tu ka ni a, University of Hyderabad-a Masters degree ka zir lai khan, kan professor te hian IGNOU lehkhabu-a mi hi zirlai te min pe fo va, tun thleng hian ka la dah that thlap bakah, college-a zirlai te ka zirtirna kawngah thleng hian ka hmang tangkai em em a. Chu vangin, IGNOU hi mi thenkhat ten an sawi ang a zir mang lo pawh a pass theihna university a ni lo tih hi hriat chian hle tur a ni ringawt mai a ni!
Tin, sawi tawh ang khan, IGNOU hi ram puma zirna in sang (university) te zinga pakhat a ni a, university dang te ang lovin, dinhmunin a zir loh avanga zirna in sanga zir zawm duh, zir zawm thei lo te tana zirna sang, an ban phak a hun hnaih duhna avanga central sawrkarin a din a ni a. Hei hi keini, hmarchhak kil khawr a cheng te tan chuan lawm ngawih ngawih tur kan ni ringawt mai a, mahni kawt kai leh ban phakah, IGNOU kaltlang hian zirna in sanga zirna kan nei ve ta tihna a ni a. Chu tih lain, a hlutzia ngaihtuah a, mi tam zawk ten hman tangkai nachang kan hre lo hi a pawi takzet a ni. Tin, IGNOU hlutna em em dang leh pakhat chu, he university hnuaia zirna atana I sen zawng zawng hi a thlawn…FREE a ni tih hi a ni. Admission fee atana I sen te, zirlaibu chahna atana I senso emaw, exam fee atana I chawi zawng zawng te hi degree I neih hnuah a vaiin rulh leh pek let (reimburse) vek I ni dawn a ni! A awmzia-ah chuan IGNOU hnuaiah hian sawrkar laipui hian I zirna senso zawng zawng a tumsak vek che a, a thlawn liau liau vin zirna in sangah I zir thei tihna a nih chu. Tin, zirna in sang danga zirlai dang te ang bawk in, state leh central sawrkar atanga zirlai tanpuina (scholarship) lak/hmuh theih hrang hrang te pawh hi IGNOU zirlai, ‘University zirlai’ I nih ang takin I la thei a, I chanvo a ni. Scholarship lak dawn a IGNOU zirlai nih hreh lo, zirna atana iai leh si I nih chuan, I iai loh university-ah ngei chuan zir ngei la ka duhsak a che!
IGNOU hnuaiah hian university dang zawng zawng a zirlai ten zirna peng hrang hrang (subject) an zir te hi a kim mai ni lovin, university dang ten an tih ve theih loh, zirna peng dang hrang hrang thlengin, ralkhat zirna (distance learning) hmang a zir theih vek a ni a, he mi chungchang hi chu tun tumah chuan kan sawi vek seng hman dawn lo. Mizorama district tina college tinah hian IGNOU study centre a awm vek a, chu tah chuan kan hriat duh leh mamawh zawng zawng chu eng tik lai pawh a zawhfiah theih vek a ni, Aizawla awm te tan phei chuan Mizorama IGNOU hmunpui ber, kan Regional Headquarter, Selesih-ah engkim zawhfiah theih vek a ni.
Eng pawh ni se, ka thu kharna atan
chuan ka ngaimawh leh ngaih pawimawh ber, tun tumah pawh ka sawi tam ber bawk
hi hmang leh teh ang. IGNOU hi zirna in
sang, sawrkarin a pawmpui leh dan hmang thlapa a din a ni a, he university hi
lehkha thiam thei lo leh hna-a kaisan duh avanga certificate awlsam neih duh te
zirna emaw, awlsam taka pass tum te rawn luh khawmna tur a ni lo hrim hrim a.
Tih tak tak a zirna sang zawk chhunzawm duh, thiamna tak tak nei duh, dinhmunin
a zir loh avanga chhunzawm thei lo ten zirna tluang pangngai an chhunzawm a, an
nun kawng an sialna atana din zirna in sang, tha, pawimawh leh tangkai tak a ni
tih I hre thar theuh teh ang u.
Comments
Post a Comment