Hun Pui Zun leh Thil Thlawn Pek

 

            Kristian te hun pui hi kan han ti tak na a, a nihna takah chuan khawvel hun pui a ni e ti ila, a sual leh pawi thui viauna tur hi a awm vakin ka ring lo. Ni e, Mizo ten ‘hun pui’ ti meuh a kan sawi, he krismas leh kum lo thar tur vuakveta kan phusa luih luih mai hi a ropui ti tu tan chuan ropui tak a ni ang a, tul lova hun leh tha, sum leh pai kan in sen thlawnna a ni ti lam zawng a thluk duh te tan pawh in sen thlawnna hun ropui tak chu a ni thei tho vin ka ring. A eng lam hawi zawng pawh ni se, a tha lam a ni emaw, ni lo emaw, a ‘hun’ hrim hrim hi a ‘pui’ ve hrim hrim! Mak deuh asin…sakhaw dang betu te hun pui, Hindu te tan Durga Puja te, muslim te tan Ramadan leh eid-ul-fitr te hi chu a sakhaw betu te tan chuan hun pui tak chu a ni ngei ang. Mahse, khawvel a dap chhuak zo meuh em tih leh, krismas leh kum thar vuakvet boruak nena han khaikhin ralah chuan, kristian te hun pui meuh hi chu a tluk lo lam chu a niin ka hria. Pakhatah chuan, a hun hian a zir vang te pawh a ni thei ang a, thlasik boruak thiang leh vawh vin tuk hun lai taka krismas a lo ni tlat mai te, kan han hmang zo chauh va, kum hlui a liam a, kum a rawn thar zui nghal mai vang te pawh hi a ni mahna, he kan ‘hun pui’ ah hi chuan chi tin, hnam tin hi kan phu suau suau zel chu a nih ber hi. Chu tih rualin, khawvel phel lehlam, chhim phel (Southern hemisphere) a cheng te tan erawh krismas hun pui hi khaw lum lai tak a ni ve thung a, mahse, sik leh sa hian he hun pui ‘puina’ hi a nghawng chhe pha lo ni te pawhin a lang. A eng pawh chu ni se, kan hun pui puina chungchangah chuan duhtawk phawt teh ang.

            He hun pui a lo thlen dawn hnaih a mitin te chet dan (kan chet dan theuh te pawh ti ila a dik thei ang) hi I lo chik ngai em? A then in kawn kan chei a, in leh a vel kan chei a, Christmas tree kan tung a, kan vul chek chuk a. Chu ti ang bawkin, hmangaih then ta te pawhin kan hmangaih kal ta te thlan kan ti fai a, kan chei bawk a. A then in kan thil neih leh sum leh pai hmangin mi dang te kan tanpui a, thenkhat ten chu ti ang mi te tanpuina tur vehbur an lo khawn bawk a. Hun pui lai na na na chuan chhung tin ten mahni phak tawk theuhah, engkimah a tha ber tih leh neih vek kan tum a, thawmhnaw pawh ram leh hnam pum ang a a hu hova kan neih rual thup hun chu kum khatah hian he hun pui chauh hi a ni mai awm mang e ka ti! Ei leh in lamah lah kan theihtawpin kan in tui tuah a, sum leh pai lah kan hmang ral nasa…he hun pui vuak veta kan sum leh pai hman ral zawng zawng hi ruah mal ang hian van atang khian rawn tla dawn ta se la, ruahpui vanawn nasa tak tluk hialin a surin a rawn sur hum hum hian ka ring a ni. Thlarau lamah pawh kan tan vanglai leh a hun a lo thlen dawn hnaih a kohhran tin te tawngtai subject lian ber chu he hun pui vuakvet tho hi a ni a, chu ti ang bawkin, a rual a, hun khata ruih theih thil chi hrang hrang rui kan tam hun lai ber pawh he hun pui vuakvet lai tho hi a ni zel! Khawlaiah ni se, khaw tinah, a bikin, krismas urlawk ni-ah phei chuan mi kan pung hluai a, kan in sul pel suau suau a. Khawi lai mai pawh hi a lun em em vek mai ni mai hian ka hre thin. Hei vang hian alawm, he kan ‘hun pui’ meuh hi chu a ‘pui’ bik em emna chhan chu. Hei hi alawm ‘Hun Pui Zun’ ka han tih kherna chhan pawh ni.

            Hun pui vuakvet a kan chet dan, kan inchei dan, kan ei leh in dan, kan that leh sual dan…a tawi zawngin, hun pui zuna kan uai avanga kan chet chhuah dan leh rilru put hmang hrang hrang, inpersan tak tak te hi a tha lam leh sual lam emaw, tih tur leh tih loh tur tih lam hawi a sawi hi ka tum lova. ‘Hun Pui’a nih ang takin, a zuna uai te rilru-a a thawh dan dan chuan lo thawk ve mai se la, chu zuna an uai nat em avang chuan, eng hawi zawng pawhin lo che in, lo in leng vel pawh ni se, kei chuan ka en liam vek thei e!

            Ka sawi tum ber zawk chu hei hi a ni. Kristian te tan chuan he ‘hun pui,’ khel lova kum tina a lo in her chhuah ziahna chhan leh nghakhlel taka a hun lo thleng tur kan thlir fo thinna chhan lo chhuahna leh bul lo in tanna chu ‘thil thlawn pek’ hi a ni tih hi a ni. Pathian in mihring te tan thil thlawn pek a pek theih sang ber, a Fapa min pe a, chu mi a zar a he hun pui hi lo awm leh khel lova hmang kum tin hi kan ni. Chu vang chuan, thil reng reng chu a tobul, a bul thum atanga hriat chian a pawimawh kan tih fo angin, he hun pui tobul leh pian chhuah tir tu chu thilthlawn pek atangin a ni tih hi kan rilru ah rawn ri thar nawn fo se tih hi ka sawi tum ber chu a ni. A chhan thil thlawn pek, a vang pawh thil thlawn pek a nih miau vang te pawh hi a ni mai thei, he hun pui vuakvet hi Mizo te phei chu midang te tana kan luan chhuah nasat hun lai ber a ni hial awm e. Hei hi thil tha tak, chin zui zel tlak a nih piah lamah, he hun pui to bul nen pawh hian a inhmeh em em a ni. Rethei leh pachhia te tan chuan he hun pui hi huphurhawm tak a nih rualin, mitin rilru-a hun pui zuna kan uai apianga kan uai tel ziahna, thil thlawn pek avang hian hun hlimawm leh chhinchhiahtlak takah a chang ve fo thin. Heng te hlei hlei hi he ‘hun pui’ ti ‘puitu’ leh a zuna min uai nat tir em emtu pakhat pawh a ni awm e.

            Chu tih rualin, hetah tak hian kan rilru puthmang hi ennawn a, in bih chian fo hi a tul em aw ka ti thin. A nei zawk ten a nei lo zawk te kan tanpui a, thil thlawn pek kan han in pe tawn liam liam te hi a hlu in, a ropui takzet. A dawngtu te tan phei chuan thil thlawn pek a nih tawh hrim hrim chuan, eng hunah pawh, eng thilpek pawh ni se a hlu tawh hrim hrim a, hun pui zuna kan uai nat lai leh chu zuna kan uai avanga kan inpek ngat te phei hi chu a dawngtu leh a petu tan pawh a hlut dan hi a chiang lehzual bik dawn hian ka hria. Mahse, sawi ang khian, he hun puia thil thlawn pek runpuiah hian kan rilru put hmang hi kan en nawn a, kan in bih chian fo loh chuan, mi tam tak hi chuan ‘kutdawh rilru’ put hlen palh mai a awl hle dawn hian ka hria a, tin, ‘thil thlawn petu’ nih tumna thinlung put nachang hre miah lo, ‘thil thlawn peka leh thil thlawn peki’ te nih reng pawi tih lohna rilru, rilru piangsual a hring thei dawn hian ka hre tlat pek a, chu chu a ni ka vei em em chu. Kum tin hun pui a lo thlen apianga a petu ni lova a dawngtu nih kumhlun ringawt mai te hi hmasawn tum lo zia a ni thei ang em? Dinhmun in a zir ngang lo a ni thei e, chu tih rualin, kan dinhmun chawi kan leh chawi san tum a theihtawp chhuah a, a kum leh a hun pui a lo thlen leh meuh chuan dawngtu atanga petu dinhmuna in hlankaina kailawn remchangah kan thil thlawn pek dawn te hi hmang tangkai ta ila, a lawmawm chu thuhran, a kum lehah thil thlawn petu kan pung leh sawt dawn tihna a ni a, chu ti a nih chuan, thil thlawn pek dawngtu ten an dawng hnem sawt dawn tihna te pawh a ni thei ang a, duh thu han sam tak tak phei chuan, he hun pui zuna kan uai laia kan luan chhuahna lo dawngtu te hian hmang tangkai zel se, hma te pawh kan sawn zawt zawt mai awm asin!

            Tin, hun pui vuakveta thil thlawn kan pek chhuah kawngah pawh hian mitin hian, eng dinhmunah pawh ding ila, thil thlawn pek hi tu te pawh hian kan inpek tawn theih vek dan hi a awmin ka hria. Sum leh paia neinung zawk te chuan sum faiin emaw, neih thilin a thlawn in midang te thilpek an pe ang, a lawmawm a, a ropui a, chin zui zel chi pawh a ni. Mahse, thil thlawn pek hi mi neinung leh hausa te chanvo tur chauh hi a ni bik lo. Vantlang motor khalhtu te hi he mi kawngah hi chuan nachang an hria in, an entawn tlak ka ti ber mai. Hun pui vuakvetah a thlawnin mi an phur a, hei hi an hnen atanga thil thlawn pek kan dawn chu a ni. He ti ang chiah hian, sumdawng ten an thil zawrh hmangin thil thlawn pek an pe thei a, mistiri te pawhin a thlawn in midang te hna an thawhsak thei a, kut hnathawk leh in hlawh a ei zawng kan nih pawhin, kan thenawm chiah te in leh lo, huan, ram adt te a thlawn in kan tih faisakin, kan siam thatsak thei. He ti zawng a ngaihtuahna kan seng a nih ngat chuan, he hun puiah hian mitin te hian kan phak tawk theuhah thil thlawn pek hi kan sem chhuak vek thei reng zu ni a! Ka huat ber thin chu, mihring pian to tha pangngai leh pang dam vek si ten ‘keini chu kan harsa si a, engmah kan ti ve thei lo,’ ti tu ten lawm taka thil thlawn pek, mittui tla chunga an dawng leh si thin hi a ni. Sawi tawh ang khan, mi dang te tih ang, pek ang leh sem chhuah ang kan ti in, kan pe chhuak ve thei lo a ni thei. Mahse, mihring pang dam pangngai kan nih chuan, eng emaw tal chu kan mihringpui te hi kan tihsak ve thei vek. ‘Thil thlawn pek’ a nih tawh hrim hrim chuan a dawngtu tan lawmawm lo pakhat mah a awm lo kan tih tawh kha.

            Chu vangin, hei, hun pui zunah chuan a ram leh hnam pum angin kan uai leh mek tawh a ni a, rilru lo seng thar ve teh. Thil thlawn pek hi midang te chanvo nghet a ni bik lo ang bawkin, nang pawh thil thlawn pek dawngtu nih reng kha I chanvo nghet turah dah bik suh. Keimahni theuh atanga a thlawna kan in pek theih theuh te mitin te hian inpe tawn sung sung mai ila, krismas thilpek in thlengna (gift exchange) a zawnga hlu leh ropui ber kan in hlan tawn dawn a lo ni reng zu nia…Krismas leh Kum thar chibai vek ule.