Sulhnu
Kum 2006 Nikir thla chawhma lam a ni
a, Mizoram leh state dang, hmun hrang hrang atangin, kum dang ang bawkin
Shillong khawpuia zirna chhunzawm tum zirlai sang tel an rawn thleng khawm leh
tawh a. Kei pawh kum hnih ka lo awm tawhna, Shillong khawpuia
College/Undergraduate zirlai chhunzawm tur leh ka college luh chakna ber, St.
Edmund’s College-a luh theih ngei in beiseiin, zirlai lut tur thlan chhuah list
an tar chhuah hun chu nghakhlel ru angreng, huphurh angreng bawk siin ka lo
nghak ve ran a. A hma, kum hnih liam ta khan St. Edmund’s College-ah hian Class
XI zir tumin dilna ka thehlut ve a, mahse, ka tling zo lova. Tun tumah erawh hi
chuan ka subject zir tum ber, Political Science subject-ah CBSE hnuaiah 95
marks ka hmuh ve avangin ka in ringtawk ve viau a ni. Chu tih rualin, a hma-a
tling lo zinga ka lo tel tawh avangin, ‘palh’ a awm thei tiin, St. Anthony’s
College-ah History subject la turin admission ka dil tho bawk a. St. Anthony’s
College lam result 6th June, 2006 ah a rawn chhuak hmasa a, History
subject-ah ka tling ta si! Ka kal duhna ber, St. Edmund’s College lam a la
chhuak ve si lo. A chhuak hmasa leh tlinna hmasa-ah in admit lo ta ngawt ila,
St. Edmund’s College-ah tling leh ta si lo ila, college dang khawiah mah
admission ka dil der bawk si lova, ka ho der thei tlat mai bawk si a,
ngaihtuahna a buai ta map mai! Chhung te ka rawn a, ngun taka ka ngaihtuah
hnuah, ka tlinna hmasa-ah hian in admit phawt ila, St. Edmund’s College-ah ka
tling leh ta a nih leh sum ka seng thlawn ni mai teh se tiin, St. Anthony’s
College-a History Departmentah chuan admission chu ka ti ta a. A tuk 7th
June, 2006 ah St. Edmund’s College lam result a rawn chhuak ve leh ta a,
vanneihthlak takin Political Science Department zir tur thlan chhuah zingah ka
tel ve ta hlauh mai a, St. Anthony’s College atanga St. Edmund’s College-a
insawn leh tur hian second khat pawh ka in ngaihtuah lo! Chu tih rualin, St.
Anthony’s College-a admission tihna atana ka sum sen thlawn erawh chu vawiin
thlenga ka sum senna azawnga ka ui ber pawl a la tling ta reng a ni! Chu ti ang
chuan, ka ‘dream’ college-a lut turin ka in buatsaih chho ta kha a ni a. Tunah
chuan, khang hun lai te kha rilru leh mitthla-ah la chiang viau mahse, kum 20 dawn
liam ta kha a lo ni daih tawh mai a, ‘khuarei’ an lo chang ve ta der mai.
St. Edmund’s College atang hian ram
hruaitu te, academician tha tak tak leh entrepreneur hlawhtling tak tak te atanga
sawrkar hnathawk chhuanawm tak tak te, sakhaw rawngbawltu ropui te, a tawi
zawngin, Mizo Ram leh Hnam tana ro tling, mi hlu leh mi ropui tak tak te an lo
chhuak tawh in, an lo la chhuak mek zel a. Chu ti ang mi, kan ram leh hnam tana
mi hlu tak tak te lo chhuah tawhna zirna in hlun leh tha-a ka han zir thei leh ‘Edmund’s
chhuak’ ti a ka han in chhal ve thei hrim hrim pawh hi ka ngaihlu hle a, tuna
zir mek te pawh hian lo ngaihlu hle teh u tiin ka han chah duh che u a ni.
St. Edmund’s college-a ka kal ve lai
khan tawnhriat tam tak ka tawngin ka hria a, vawiin thlenga ka theihnghilh
theih tawh loh pawh tam tak a awm. Tawnhriat zawng zawng han sawina atan chuan
kan lehkha phek hi a zim deuh hlek a, chu vangin, a then a zar chauh ka han
tarlang mai ang e.
A hmasa berah chuan, Meithal
pawh hi (ka hriat sual loh chuan) 3rd year B.A kan nih laia 1st
year B.A zirlai, Mapuia (a hming pum ka hre ta mai lo), thu leh hla lama tui em
em kaihhruaina hnuaia bul kan tan kha a ni a (ka hre sual a nih chuan min lo
ngaidam mai ula!). Kum 20 dawn a her leh hnuah pawh nung taka enkawl zui zel a ni
tih han hriat leh, chu chanchinbu ngei a thu ziak tura editorial board te
sawmna duhawm leh zahawm tak ka han dawng leh hi ka lawm takzet a ni.
Kha tih hun laia kan Principal kha
Irish pa lian, ngo vuah mai, Bro. Miranda kha a ni a, a taimakna leh inpekna
kha vawiin thleng hian ka theihnghilh thei lo. Morning shift leh day shift
class/period zawng zawng, period tina block tina kal kual a, class room zawng
zawng, zirtirtu an awm leh awm loh endik a, kum tluana nitin a fang ziah peih
ringawt mai pawh kha a fakawm thin ngawt mai. Fur laia a nihliap dum, sei zet
mai hawl chunga canteen kawta a lo din vung tawh hnu a, class kal tura va thlen
kha chu a inthlahrunawm thin hle a ni! Sawi leh selna tur tam tak awm mahse,
amah atang khan thil tam tak ka zir chhuak tlat a ni.
Ninga ni tlai Kohhran thalai inkhawm
ni a ni si, last period kal ngai bawk si, thalai Secretary ni a, thupuan ngai
bawk si kara ‘proxy attendance’ min lo peksak tur thian tha neih hlut zia te, a
bik takin, History Professor Abhijit Chowdhury (AC)-a class leh Sociology
zirtirtu, Mishra class ka kal peih loh thin em avanga tlar hnung ber, kawngkhar
bula thu a, attendance-a present zawh ruala ka tlan chhuah ruk nghal thin lai
te kha mitthla-ah a rawn lang thar leh uar uar mai! MSU sport a lo ni a, 3rd
year zirlai nih tawh hnu-a sport nawm thin zia te, thiam vang pawh ni lo, ‘senior’
quota-a entu tamna sports discipline-a kan lo tel ve ngawt thin te kha tun
hnu-a ka ngaihtuah leh hian, kan nau te, infiamna lam ti mi em em te tan khan
kan lo ngeiawm thin awm mang e tih te ka ngaihtuah leh hnuhnawh!
Thil pakhat, ka la hriat reng bawk
chu, college MSU Unit President ka nih lai khan, college small gate bul lawk a
Synod House-a an hall kha inhmuh khawmna atan kan hmang thin a, kei pawhin thu
te pawh ka sawi ve thin a. 9th June, 2009, Thawhtan tlaia MSU college
Unit President atana min thlan tlin te kha ka dam chhunga pawl hruaitu,
President hna ka chelh vawi khatna a ni a, ka theihnghilh thei lo.
Tum
khat chu college picnic neih kan rel a, kan phur tlang khawp mai a. Bus hirena
tur pawisa te thawh khawmin, 13th September, 2008, Inrinni tukthuan
ei khamah Shillong atanga hmun hla vak lo, Umtyngar-ah kan kal a. Kan kal ni
hian nilengin ruah a sur a, nuam erawh kan ti tlang viau tho chuan ka hria. Tih
dan phung pangngaiah chuan, picnic ei rawng bawl kha junior te chana dah deuh
thin kha a ni a. Mahse, tui chen emaw, han tei khawthawn vel kha kan peih loh
avangin, 3rd Year BA/Bsc a ka thian te, Andrew, Mawia, Sanga leh
Felix te nen choka kan lo thutchilh a. Dekchi-a chaw chhum ngai tumah kan lo
awm si lova, chhumna tur dang a awm chuang bawk si lo…kan han risk ta tak tak
a, tlaia chaw kan han ei dawn a kan chaw chhum kan han hawng chu(h)…a mawng lam
a ut vek a, a lai a hel a, a chung a hmin thung a! Chaw chhum lehna hun awm
tawh hek lo, a nih ang ang hian ei mai ang kan ti a, kan ei ta a. Mahse, kan ei
hnem tlang viau tho! A hnu lamah santen leh kaw tha lo, damdawi ina luhpui ngai
an awm leh awm loh ka ngaichang ru reng a, tumah kan awm zui ta lo niin ka hria
a, ka lawm hle a ni.
Awle, sawi tur tam tak, Rose and
Chocolate day-a thang kam fuh leh fuh lo kar inhlat theih zia te pawh ka la nei
na in, duhtawk phawt mai ang. St. Edmund’s College in Centenary hial a lo lawm
dawn ta hi Edmundian alumni tawh phawt chu, a tu a te pawh kan lawm vekin ka
ring. Chu mi puala Meithal special edition tih chhuah nachang hria
editorial board te pawh ka fakin, thu ziak tura min rawn sawm ve avang pawh
hian lawmthu ka sawi a. He college hian kan hringnun chanchin ziahna bu-ah phek
pawimawh tak a luah reng tawh dawn a. Chu vangin, tuna zir mek te pawh thil
pakhat chiah ka han chah duh che u chu ‘St. Edmund’s College-a in kal chhung
khan, Mizo hming ti tha tu, chhuang taka a lut ve lo te pawhin Edmund’s College
Mizo te ti a in hming an lam theihna turin Mizo tih awm renga mawi a khawsa in,
in nunphung leh chet phung lo uluk tlat ula. Tin, in rual u leh kan rual u te
hniakhnung rawn zui a, St. Edmund’s College chhuak ni awm renga mawi turin in
zirna leh nun kawng hrim hrimah mi rintlak, chhawrnahawm leh hlawhtling ni turin
theihtawp han chhuah ang che u.’
A
tawp berah chuan, in rilru leh thinlungah ‘Proud to be a Mizo and worthy of
an Edmundian’ tih hi vawng nung a, vawng tlat turin ka han chah duh che u a
ni. In zavaiin chibai ka buk che u a, duhsakna sang ber ka hlan a che u.
Comments
Post a Comment