Digital Khawvela Kan Hma Hun

            Mizo khawtlang nunah hian kan dinhmun (status) hriltu/tehna atana hman hi tam tak kan nei thin a. Kan pi leh pu te hunah kha chuan taimakna te, huaisenna te, tlawmngaihna te kha khawtlangin mimal an hmuh dan leh teh dan hriltu pawimawh tak a ni a; tunlai hunah chuan zirna te, khawtlang leh kohhrana tangkai dan te, in leh lo te leh thil dang tam tak a awm thei awm e. Heng kan in tehna leh mihring dinhmun hriltu atana kan hman te hi a tha e emaw, a tha love tih emaw lam hi ka thluk tum lam a ni lova, ka sawi tum ber chu mihring hian kan mihringpui te kan hmuh dan leh en dan te, kan mihringpui ten min hmuh dan leh en danah hian ziak loh dan, tehkhawng atana hman hi mimal rilru put hmang azir te, khawtlang inrelbawl dan leh hnam kalphung azir te in kan nei fur hlawm a, chu chu khawtlang leh kan mihringpui te laka kan dinhmun hriltu atan ber eng hnam pawh hian kan hmang theuh hlawm thin a ni. Chu tah chuan thil pawimawh tak, hmanlai leh tunlai (digital khawvela kan luh hnu) khawvel in an loh deuhna pakhat a awm a. Hmanlai hunah leh mihring nihphung hrim hrimah hian zahawmna te, ropuina te, chawimawina te…a tawi zawngin, mihring te ngaih a dinhmun tha leh zahawm ang chi te hi a peka in pek emaw, a vuah a in vuah ngawt chi ni lovin, a hlawh a hlawh chhuah chi zawk a ni thin. Mizo hnam nuna kan ngaihhlut, heng tlawmngaihna, huaisenna, rinawmna adt ang chi pawh kha khawtlangin a pek a an pek ni lovin, mimalin a hlawh a a hlawh chhuah a ni a. A phu te chuan chu nihna chu an nei mai a, a phu lo te chuan an nei lo mai. Chu chu Mizo khawtlang nun inrelbawlnaah khan a pawimawh em em a, tin, a sap tawng takin a ‘fair’ em em bawk. Chu tih laiin, tunlai khawvel (digital khawvel) ah chuan a phu ber te hian dinhmun sang an chang em, phu vang renga mihringpui te chung en emaw, zahawmna hlawh chhuak hi kan ni vek em…tin, a hlawh a hlawh chhuah ni lo, thiam leh finna sang zelin a rawn thlen, digital khawvela hmasawnna hian tun hma khawvela dinhmun tha leh zahawm, a hlawh a hlawh chhuah ngai leh hlawh chhuak tur pawh a beih fat fat ngai thin kha awlsam taka mi nazawng, a phu ber ni kher lo te thlenga kan ban phak maiah hian a rawn hung hnai ta in, mihring tha leh tha lo, fel leh fel lo tehkhawng pawimawh tak thin te kha a rawn su thiat zo ta em ni tih hi ngaihtuah tham tak a awmin ka hria.

            Digital (a awm zia hi kan pianpui tawng tluk zeta kan hriat thiam fur tho avangin a Mizo tawng chuan dah chhuak kher lo ta ila) khawvela digital thil te hian mimal nun mai pawh ni lovin chhungkaw in kungkaihna te, khawtlang leh kohhran in awp khawm dan atanga kan sum lakluhna leh ram in relbawlna thleng hian min luh chilh hneh hle tawh a. Hei hian kan ngaihhlut zawng thleng hian nasa takin min thlak danglam ta ti ila kan sawi sual lutukin ka ring lo. Digital khawvel hian khawvel hran, mihring te kan chenna, a tak ram khawvel aia nuam leh tha zawk, suangtuahna/mitthla khawvel (virtual world) a rawn hring tel ta tlat mai hian kan rilru put hmang leh kan khaw thlir thleng hian nasa takin min ti buai ta chu a nih ber hi maw! Digital/virtual khawvela kan nih phung leh lan dan te hi a tak ram (real world) a kan nihna dik tak nen hian kan ngaih pawlh a, kan ngaih fin a, nihphung pahnih nei ang deuh reuh hian kan khawsa ta tlat mai hian mihring te hi kan nihna (identity) a ti chiang lo zo ta deuh tlat te hian ka hre thin. Mak ka tih ve deuh mai chu, a tak rama kan sawi duh loh leh tih duh hauh loh tur hi virtual khawvelah chuan timna leh insum karna nei miah lo hian kan ti duh tlat zel a. Entirna atan, nupa kan in ti thinrim emaw, lungawi lohna kan nei emaw, tu emaw laka thinrimna kan neih ang chi te hi a tak khawvel (real world) ah hian ti langin, sawi chhuak duh pawh ni ta ila, mi zawng zawng, kan hmelhriat satliah leh hmelhriat loh te nen lam hnenah hian kan sawi duhin a rinawm loh. Mahse, virtual khawvelah chuan status ah te, story-ah te, whatsapp group thleng pawhin, a ta krama kan sawi duh loh leh tih duh loh kha kan tlangaupui ta chiam thin a. Lo hmu tur leh lo chhiar ngei tura kan duh te bak, midang, hmu leh hre tura kan duh lem loh te thlengin an lo hmu in, an lo hre ve ang tih lam hi kan ngaihtuah tawh lo. Hei tak hi, a tak rama kan tih duh loh tur, suangtuahna/mitthla (virtual) khawvela tim miah lova kan tih leh duh sin a rilru tak hi cyberpsychologists te chuan Online Disinhibition Effect tiin an sawi thin a, rilru put hmang chi khat a ni. Kan zingah hian he ti ang rilru put hmang neih avanga virtual khawvela mize hloh ta hlauh hi kan tam viau in a rinawm! He ti hian han ngaihtuah ta vang vang la, I status, story, post adt te a I thil sawi hi a tak ram khawvelah hian vantlang inkhawmnaah, mi tam tak I hma-a thu te hma-ah aurinna hmangin sawi dawn ta la, I sawi duh ang em? A tam zawkah chuan kan chhanna chu ‘duh lo’ tih a nih ngei ka ring. Mahse, chu kan duh loh taka chu virtual khawvelah chuan kan ti duh leh tlat thin si a, a ta krama vantlang hma-a aurinna hmanga puang chhuak ang tho kan nihna lam hi kan hre chang leh tawh thin si lo.

            Tin, tunlai khawvelah chuan, a tir lama kan sawi, mihring hlutna leh zahawmna te hi ‘number’ hian kan in teh zo ta em ni aw ka ti thin. A tak ram khawvelah chuan mitin hian ‘thian’ ti a kan sawi theih leh, a bik takin, ‘thian tha’ ti a kan chhal theih hi chu kut thliah tham lek kan neih ka ring. Mahse, a tak rama thian bulfuk tak nei lo pawh hian virtual khawvelah chuan thian sang tam tak a neih theih tlat a, a tam thei ang ber neih chu mihring dinhmun tehna tehkhawng pawimawh takah kan hmang ta tlat bawk! Istagram lama follower ngah te, facebook-a ‘friend’ ngah te, youtube channela subscriber ngah te hi kan dinhmun (status) hriltu pawimawh takah a chang chho ta mek zel a nih hi. Social media platform hrang hranga zuitu ngah leh hretu ngah te hi a that lohna lian tak a awm chu ka hre lem lo; chu tih rualin, heng kan virtual thian te hi a tak ram khawvela kan thian te nen han khaikhin ila, thian an tling tak tak meuh em? An tling lo tih chu kan hre vek, mahse, virtual khawvela thian neih ngah hi kan dinhmun tehna pawimawh takah erawh kan hmang lawi si! Kan tlukpui ni a kan hriat emaw, keini aia kan dah hniam zawk te aia ‘friend’ neih tlem zawk te, ‘follower’ nei tlem zawk nih chu kan duh miah lo thung a, ‘Likers’ ngah loh phei chu pawi tak a ni!

            ‘Likers’ sawi takah chuan, virtual khawvelah chuan mitin hian kan nihna dik tak ni lo, kan nihna dik tak aia tha hreta lan kan tum vek avang hian liker ngah hi the khawng pawimawh tak a ni lo thei lova. Tin, kan thatna ber deuh dah chhuah (post) kan tum theuh avang hian liker ngah loh chuan rilru a nuam thei tlat lo! Hetah pawh hian he ti zawng hian I han ngaihtuah teh ang. A tak ram khawvel (real world) ah chuan min faktu te, min ngaisangtu te leh min eilotu te zawng zawng thlengin an tawngkam leh hmel hmai atangin kan hre nghal chat chat thei. Mahse, virtual khawvelah chuan min liketu zawng zawng te hian min fak avang emaw, min lawmpui avang emaw, kan thil tih tha an tih ema vanga min ‘like’ an ni vek kher em, an ni tih I hre chiang em tiin in zawt ta ila, a chhanna chu ‘hre chiang lo’ tih a ni ang. A chhan chu, hriat chian theih leh finfiah theih a ni tlat lova, chu chu a tak ram khawvel ni lo, suangtuahna/mitthla khawvel, nih kan duh leh chak ang, kan mitthla leh suangtuah dan anga kan nihphung kan lan tir theihna khawvel a nih tlat vang a ni a, chu ta kan intehna tehkhawng ber chu ‘number’ a ni…likers/followers/subscribers eng zah nge?!

            Chu mai chu ni lovin, khawl changkang leh ropui, mihring te tluk thaw thanga fing leh kan tih ang zawng zawng ti thei khawl, mahni-a thluak hran nei, a sap tawnga artificial intelligence (AI) kan tih thil hrang hrang lo chhuak te hian kan nunphung a rawn ti danglam nasa hle bawk. Hmanni lawk, April thla khan Spain-a damdawiin pakhatah chuan robot pakhat, Da Vinci ti-a an vuah chuan doctor te tel miah lovin, mihring lung thlak (heart transplant) hlawhtling takin a nei a, khawvela a hmasa ber a ni. He robot hian doctorin a kut zaizira ti tura a hrilh ang thlapin mihring a zai a, mihring aiin tih sual a nei tlem zawk fe bawk! Thlawhtheihnaah pawh pilot te khalh ngai lova khawl hmanga khalhna auto pilot system te a awm tawh a, taksa sawizawi pawh a kan lung phu ran zawng leh kan thau chhe paih zat enna sana te kan bun fer fur tawh a, tunlai thalai te zingah phei chuan ‘Alexa’ hming hre lo pawh hi kan awm tawh kher lovang. Zirna lamah lah nise, tuna kan zirna kalphung ti chhe vek thei khawpa hmanraw tha leh awlsam, Chatgpt kan tih te a lo chhuak bawk a, darkar tin, minute tin, second tin hi digital thiamna hmang leh rinchhan hian kan nung chu a ni thaw thang chu a nih tak ber hi! Nakinah chuan mihring awmpui aiah robot awmpui te, nupui pasal atan pawh mihringpui te aiah robot nupui pasal te, mihring doctor aiah robot doctor, mihring zirtirtu aiah robot zirtirtu…a tawi zawngin, a tak ram khawvel hi hun lo kal leh zel turah hian suangtuahna/mitthla khawvel hian a rawn luahlan vek ang a, a tak nge suangtuahna pawh thliar hran hleih theih loh khawp hian kan nun hi a la chingchivet kual vel lovang tih sawi thiam a har ta hle mai!

            A chuga kan han sawi tak te khi tunlai khawvela kan nihphung mek leh chu ti ang nihphung ten kan hma huna kan nun a nghawng theih dan tam tak, mi thiam ten lehkhabu meuh a ziak leh chhui a, an lo chhuah (publish) tawh tam tak te zinga a fang khat chauh a ni a, a khuhhawnna ang lek a nih bakah article pakhata ziah leh chhui kim sen a ni lo. Kan thu tawpna atana ka sawi duh chu, khawvel hi a la awm zel a nih chuan heng digital thil te hi a aia tha leh changkang zawk a la rawn chhuak zel dawn a, artificial intelligence kan tih te pawh hi nakinah chuan a aia fing leh thiltithei zawk a la rawn chhuak zel dawn. Chu vang chuan, mihringin kan lo dan chah theih an ni lova, lo dan chah tum chi lah a  ni hek lo. Chu tih rualin, tui lian hi dan chah chi a nih loh rual a, kan himna tur lo inhmakhaw suih a, tan lo khawh ve lova, tuilianin min len ang ang leh min theh ang anga lo sepui ruah tawrh ringawt chuan thihna a ni ang hian, kan khawvel chen mekna leh kan hma hun khawvela heng digital tui lian in min rawn nuaina tura tih theih kan nei lo ti a, a tui lianin min chim hun kan lo nghah ringawt mai chuan, digital tuilianah hian kan pil nghal ang a, kan thi nghal ang. Chu ti ang chu ni lovin, kan theih ang angin kan himna tur lawng hi tukin lo inhma khua ila, digital tuilian in a chim pil theih loh tur lawng lo tukin, tuilian chungah zel lan (float) turin kan rilru leh taksa lo in buatsaih ila, in chhiar zau in lo hriat zau tum ila, a tha lo chu paih a, a hman tangkai tur chi erawh kan lawng tukna hmanrua atana la khawm zel a, a tangkai thei ang bera hman tumin tun atang hian tan I la tlang theuh ang u.