Fianrial

 

American thu ziak mi, Henry David Thoreau khan a lehkhabu pakhat, Walden tihah chuan he ti hian a ziak a, ‘Ka in chhungah chuan thutthleng pathum ka nei a, thutthleng pakhatna chu mahni chauh a fianriala ngaihtuahna ka sen veng vengna a ni a, thutthleng pahnihna chu thian te nen titi phung leng kan vawr hona a ni a, thutthleng pathumna chu vantlang/khawtlang nun leh chungchang kan sawi hona leh zir hona a ni,’ tiin. Thoreau-a thutthleng pathum chungchang hi zir tham a awm a, mi thiam te pawhin an zir in an sawi ho nasa reng a. Chu mi lam erawh han sawi zau chiam ka tum hran lova, a sawi tum ber hi ka hre fiah em pawh ka hre hran lo! Chu tih rualin, he sap pa chal, mi fing, khawvel zi hut hut tlansan a, kum hnih teh meuh ramhnuai, hmun fianrial leh reh reih rawih a a ngaihtuahna sawr bing tura in sa meuh a va in kulh hrangin, chu mi hmuna engmah in a tih buai loh va a ngaihtuahna ril ber hmanga a ngaihtuah neuh neuh a a rawn ngaihtuah chhuah, a thutthleng pakhatna, a sap tawnga ‘solitude’ an tih, kan tawnga ‘mahni a awm falna, fianrial/fianrial nun’ chungchang hi a ni ka ngaihtuahna luah bertu chu.

A ni tak a, khawvelah hian mi ril, mi fing, thil chik mi leh ngaihtuahna nasa tak seng a, an thiam leh finna sawr chhuak tura hun, tha leh zung lo seng tawh thin tu mi tam tak an awm a. Heng mite vang hian vawiina kan nun dan, kan awm dan kan rilru put hmang leh kan che zia zawng zawng te hian kan lo nungin kan lo che a ni ti ta ila, Pathian avanga awm, nung leh che kan ni tih thudik awm sa kan kalh nasa viau lo ang chu maw! Chu tih rualin, kan tunlai khawvel, thiam leh finna lo sang zel leh kan nun min rawn sawi danglamtu, min rawn su fawn vel tu tam tak karah hian ‘fianrial/fianrial nun’ hi kan nei ta meuh em tih leh chu fianrial nun chu neih ngaihna a awm ta lo nge, mihring hian kan peih ta meuh lo zawk tih hi thupui chai fe tham chu a awmin ka hria. Mi thiam te hian mihring nun zia leh rilru put hmang te, chung thil ten kan nunphung leh chet zia, mimal, chhungkua, khawtlang leh khawvel thlenga nghawng a neih dan te hi kum za tam liam ta atang khan an lo zirin an lo chhui mup mup tawh a, chu chu zirna peng pakhat, Psychology kan tih lo chhuahna te pawh hi a ni awm asin (a psychology lam chungchang phei chu sawi tur ka hre em em chuang hlei law). Eng pawh chu nise, fianrial nun hian engnge tangkaina a neih a, eng vanga mihring te hian fianriala hun hman hi mamawh fo nge kan nih tih lam hi kan thluk tur lam zawk chu a ni.

Siamtu’n mihring taksa a duan danah hian kan taksa peng hrang hrang te hian thawh tur leh hnathawh dan phung an nei hrang vek a, chu ti ang bawkin kan thluak pawh hian hna tam tak thawh tur a nei a, chung a hnathawh tur zinga pawimawh ber leh mihring te min ti hmasawn thei bera ka hriat chu thluak sen/hman hi a ni. Thluak hi sen/hman tura siam a ni em tih phei chu ka hre lo, mahse, ngaihtuahna ril tak seng kan tih te, ngaihtuahna thar leh ngaihtuahna tha mihringin kan sawr chhuahna ber chu kan thluak chu a ni lawi si a nih hi! Chu vangin, kan thluak hi sen/hman tur a ni a, ren tur a ni lo te han ti ve thawr teh ang. Chu kan thluak kan sawizawina hun leh hmun atana tha, kan thluakin hna a thawh tur anga a thawh theihna tur leh kan thluak kan sen/hman theihna ber hun leh hmun chu fianrial hi a ni. Mahse, chu tak chu tunlai khawvela thil harsa ber pawlah a lo chang ta der chu a ni mai si a.

He ti hian ka ngaihtuah thin, hnam fing leh upa, khawvel kawng engkima min kaihruaitu leh sul lo su hmasa tu, mi ngo te zingah pawh a an mi thiam leh mi fing chhuanvawr zawng zawng (an hming kan lam seng lo) te finna leh thiamna lo chhuahna bulpui kha an fianrial hun hman atangin/fianrial laiin a lo ni deuh zel zu nia. Chu ti ang bawkin, Mizo zingah pawh kan thu leh hla thiam, Kaphleia atanga RL Kamlala, Patea, anni hi a hlui lutuk kan ti a nih pawhin fam Pu Mafaa Hauhnar atanga Pu Hruaitluanga Chawngte te thleng pawh hian, an thu leh hla, Zo fa ten vawiin thlenga kan kurpui leh chhuan tam tak thlenga kan la kurpui zel fo tur an rawn sawr chhuahna pawh hi an fianrialna atangin a lo ni deuh vek mai. Rual kan pawl tur a ni a, khawtlang leh Kohhranah kan tel tur a ni a, Mizo hnam, a huho va thil tih nuam ti mi leh ngah em em hnam a piang kan nih angin kan telin kan in hmang tur a ni. Heng rual kan pawlna atang hian hringnun zirlai tam tak pawh kan zir chhuak thin reng a. Chu tih rualin, mahni kan in enletna, hringnun zirlai pawimawh kan chhar chhuahna, mihring tha lehzuala in chher chhuak tura bul kan tanna tur leh khawvel buai tak leh keimahni pawh kan buai em emna kara kan let fo na tur hmun chu fianrial hi a ni a, chu vang chuan, i fianrial zeuh zeuh thin ang u kan ti a ni ber mai. Hetah tak hian pawimawh ta em em mai chu fianrial awmzia kan man thiam hi a ni ta a ni. Fianrial hi mahni chauh a awm emaw, khawi lai emaw, midang tumah awm lohna hmuna va thut fal hi a ni ringawt lo. Fianrial chu engmah…sawi nawn leh ang…engmahin min chim buai lohna hmuna kan ngaihtuahna vah vel tir hi a ni. Chung te chu ka nei fo alawm I ti mai thei…mahse, chung I fianrialna hmunah chuan I mobile phone kha a tel ve zel lo maw? A tel ve zel chuan fianrial a ni thei lo!

Tunlai khawvelah chuan mitin hi kan mobile phone hian thir hip thei ang maiin min hip bet tlat tawh a (keimahni hian kan hip bet zawk te pawh a ni maithei). Thusawi ngaihthlak laia kan inhnangfakna chu kan mobile phone/social media, mi zinga kan awm lai pawh a kan kawm ber chu kan mobile phone/social media, eng emaw nghah hlek chhung pawh a kan khawih hnem ber chu kan mobile phone/social media, mahni chauh a kan awm pawh a kan in awm tleina chu kan mobile phone/social media…han ngaihtuah teh. I khawi lo kalna emaw, I thiltihna emaw, eng thilah pawh I mobile phone tel lohna hun leh hmun kha a awm em? Hei vang tak hian alawm fianrial nun hi tunlaiah chuan mihring hian kan nei mang tawh lo kan tihna chhan chu. Fianrial nun kan hman dawn apiangin kan mobile phone kan la chhuak a, khawvel dangah kan cheng a. Kan mihringpui te atanga kan zir tur te, Pathian thil siam te atanga a ropuina hmuh te…a tawi zawngin, kan chenna leh a chhehvel atanga hringnun zirlai ril leh ropui tak tak va ngaihtuah a, va suangtuah a, chu mi atanga thil thar va ngaihtuah chhuak tur hian hun hi kan nei ta meuh lo (hunk an nei duh ta meuh lo te pawh ti ila a dik zawk mai thei e). A dik a dik chuan, Pu Patea te, Pu Kamlala te ngei pawh kha tunlai khawvela piang leh seilian hi ni ta se, thlarau mita an hmuh tam tak te kha an hmu bik ang em aw te ka ti thin…fianrial hun an hman dawn chiahah te call/message te dawng ta se, whatsappah titi laklawh tlat ta se, youtube, Netflix adt velah serial film hmuhnawm tak, en laklawh deuh nei ta tlat se eng tin nge an tih bik ang!

Chu vangin, fianrial nun/fianrial hun hi I hmang uar thar leh teh ang u. A buai reng theih loh ang bawkin a fianrial reng theih chuang loh! Engkim dah tha in (mobile phone leh a chhunga awm zawng zawng te pawh telin) kan ngaihtuahna te hi kawm in, suangtuahna khawvelah rei lo te tal chu I han cheng leh veng veng teh ang…thil ropui tak kan ngaihtuah chhuak kher lovang, mahse, mahni nun chhungril ber in enletna atan hian  han fianrial ngat ila chu, tu pawh hi a hma aia hmasawnna tur kawng khat tal hmu lo kan awm hi ka ring lo. A nihna takah chuan heng thil, internet, social media, mobile phone etc lo chhuah hma pawh khan tape deck leh radio nen ringawt pawh kan in awm tlei tho alawm, a mihringin kan tum leh tum loh a thu mai mai a ni. Fianrial hi I uar thar leh teh ang u!