Eng kan ti nge keini chhung hi?

           Kum eng emaw zat kal ta ah khan Pu Thanga Jongte khan lemchan, zirtir nei tha zet, nuih ti za bawk si, Eng kan ti nge keini chhung hi? tih kha local cable network kaltlangin thlir theihin a rawn chhawp chhuak a, mipui te en a hlawhin, kha lemchan ennawm kha hmuhnawm kan ti tlang viau thin a nih kha. A lemchan kalphung emaw, a thawnthu lam emaw rawn chip nawi a, rawn sep rawtui ka duh leh ka tum vang ni lovin, kha lemchan thupui kha vawiina kan rama thil thleng hrang hrang te leh mipui mimir sukthlek en hian Mizo mipui te hian kan inzawh nawn a ngai em tih rilru atangin, kha lemchan thupui kha he kan thu ziah tur thupui atan hian ka han thur chhuak ve ngawt mai a ni. He thupui, Eng kan ti nge keini chhung hi? tih hmang hian Mizo mipui, chhul khat kual, chhung khat leh Mizo thisena phuar khawm hnam te hi kil hrang hrang atangin, kawng hrang hrangin zawhna I han in zawt dawn teh ang.

Sawrkar: Sawrkar tha-ah chuan ram kalphung a felfai a, mipui mimir nunphung, rilru sukthlek thlengin hma a sawn in a sang thin. Sawrkar tha leh sawrkarna tha (good government leh good governance) tehna atan hian mi thiam te chuan tehkhawng hrang hrang an hmang thin a. Chung tehkhawng an hman rim zual tlem te hmang chuan kan sawrkar (tuna sawrkar lai mek ni kher lo, hun kalta a sawrkar kan lo hrawn tawh te thlengin) hian a tih tur a ti em, a tih loh tur a ti em, a mawhphurhna a hlen em tih te hi keini chhung hi I han inzawt teh ang.

·         Lang tlang (transparent)- Sawrkar tha reng rengah chuan an hnathawh leh hmalakna te hi a lang tlangin, mipui mimir te tana awlsam taka hmuh leh hriat theih turin an chhawpchhuak thin tur a ni. India ramah Right to Information (RTI) Act kan nei a, he dan hmanga sawrkar departmenta zawhna zawttu te hian chhanna dik tak, rang tak leh kim takin an hmu thin em? Sawrkar hian mipui te hriat a puanzar chin leh puanzar loh chin hi a neiin, mipui ten an hriat a hlauh zek zek puanhnuai thil te hi a nei em. Tin, chung puanhnuai thil te chu eng tin tin emaw pholan a lo nih pawhin sawrkar chuan siam that tum aiin thup bo/ngawih ralpui a tum thin em? Sawrkar thu chhuak, hmalakna  leh bawhzuina reng reng te hi a ngaihven a, chhui zui peih te tana hmuh theih tur leh hriat theih turin sawrkar hian a chhawpchhuak thin em? Heng zawhna tlem te atang ringawt pawh hian kan sawrkar hi an inchhal anga lang tlang sawrkar, engmah zep leh puanhnuai nei lo, lepse ngam, bih chian leh chhui chian ngam leh cho zak sawrkar an ni em tih hi I inzawt teh ang u keini chhung hian.

·         Accountability (Mawhphurhna lak ngam)- Sawrkara a vawn fung chelhtu te hian an thil tih that mai ni lo, tihpalh thil emaw, a ruk a rala dan kalh a an thil tih te hailan a a lo awm chang te, eng emaw avanga sawrkar a lo mualpho chang te hian mawhphurhna an la nge, midang kawh tur an zawng thin? Ram changkang, sawrkar tha leh sawrkarna tha a taka awmna leh kalpuina ramah chuan ram hruaitu leh sawrkar hotu lu te hian an ram leh sawrkar chhiat thatah a mawh an phur ngam asin! Mawhphurhna la ngam lo ram hruaitu, mi tha thawh ringa rorel tum, harsatna a lo thlen a bihrukna zawng a, hrem ngai leh thenfai ngai te hrem leh then fai kawnga tuan fum hruaitu te hi khawi ram leh khawi sawrkarah mah hruaitu tha an ni ngai lo. UK Prime Minister hlui, Boris Johnson te kha covid 19 hri pui len vanglaia a bangla kawta party tenau a lo buatsaih avanga mipui dodalna avangin a bang hmiah mai asin!

·         Citizen’s Participation (Khua leh tui te tel that leh that loh)- Switzerland te ang, vawiin thlenga sawrkar thutlukna tinreng, a te ber atanga a lian ber, ram hnuk khawih thil thlenga mipui ten tlang (direct) taka an tel ve na sawrkar angah te khu chuan ram rorelna hi Switzerland khawpuia an sawrkar hotu lu te thutna office pindanah ni lovin, mipui rorelna (grassroot government) ah a in nghat a, mipui te khu thutlukna siamtu ber an ni a, sawrkar chu mipui te thutlukna kengkawhtu ang lek fang a ni. Khua leh tui tha chu ram kalsiam relna-ah phur tak leh taima takin a tel tur a ni a, a tel theihna turin sawrkar pawhin remchanna a siamsak ngei tur a ni bawk. Mipui te hi sawrkar thu chhuak leh hmalakna apiang, a kip a kawi, a kawi a ngila zawm a, lo dawh ringawt tur kan ni lova, sawrkarna (governance) a kan telna awm chinah chuan tel a, sawrkar khalh ngil tur kan ni zawk. Chu remchanna chu kan sawrkar hian mipui te min siam em, nge, mipui te hi ram rorelnaa kan tel ve theihna chinah pawh thuk taka kan in tah luh an lo hlau hle zawk le?

·         Responsiveness (A hun taka chhanna pek)- Sawrkar leh a hnuaia thawk sawrkar hnathawk, department hrang hrang te hian khua leh tui ten kan duh leh mamawh te hi a hun takah, khawtlai lovin min pe zung zung thin em tih hi sawrkar tha leh sawrkarna tha tehfung pawimawh tak a ni. In tiam anga a hun taka mipui te mamawh phuhru thei lo, phuhruk tum aia chhuanlam zawng reng mai sawrkar hruaitu te sawrkarnaah sawrkar tha leh sawrkarna tha a awm ngai lo.

·         Rule of Law (Dan lalna leh rorelna)- Kan ramah hian dan leh thupek te hi a nihna tur ang taka kenkawh leh zawm a ni em, a kengkawhtu te hian huai takin an kengkawh ngamin, an kengkawh thei em. Tin, dan leh thupek te chu hleih nei lo, danglam danglam lo leh angkhata kenkawh a ni em tih te hi keini chhung hian I inzawt teh ang u. Dan aia lal awmna ram reng reng ram nuam a awm ngai lova, sawrkar tha leh sawrkarna tha a awm ngai lo bawk a, awm pawh a awm thei hek lo.

·         Effectiveness (Tangkaina)- Sawrkar hmalakna leh mipui te thleng phak rorelna te hian hlen an tum (intended goals) a hun takah an hlen chhuak thin em? Kan ramah hian hmalakna leh ruahmanna hrawl leh ropui tak tak, a nih tur ang ni lova hlamzuih ta hi engzah nge awm a, sawrkarin mipui te hamthatna atana hma a lakna te hian tangkai takin hna an thawkin, an tangkai dan tur dik takin an tangkai em tih hi keini chhung hian I inzawt fo teh ang u.

NGO/Kohhran: Mizoram tluka tlawmngai pawl te leh kohhran ten sawrkar kalphunga aw an neih lenna ram hi khawvelah hian a tam lo viau mai thei. Heng pawl lian leh huhang ngah, a sap tawng taka pressure group ti a an sawi, huhang an neih len em avanga sawrkar pawhin a palzam chu sawi loh, a tlawn let hial tawh pawl te hi sawrkar tha leh sawrkarna tha neih leh thlen kawnga sulsutu pawimawh ber an ni thei a, dang bet tlattu an ni thei bawk. Eng pawh nise, kan hriat reng tur chu sawrkar hi pressure group te hian an khalh ngil tur a ni a, an khalh kal tur a ni lo. Chu ti ang bawkin, sawrkar chuan pressure group te hi a thunun tur a ni a, pressure group ten sawrkar an thunun tur a ni lo. He tehkhawng hmang ringawt pawh hian kan rama tlawmngai pawl-kohhran-sawrkar inlaichinna leh inzawmna (nexus) hi a nihphung ang tur dik takin a awm em, inzawmna leh thawhhona hrisel, sawrkar tha leh sawrkarna tha neihna kawnga inzawmna tangkai a ni nge, sawrkar tha leh sawrkarna tha neihna kawnga daltu lian tak a ni zawk? He tlawmngai pawl-kohhran-sawrkar inzawmnaah hian thu bik an awm a rem lova, hlauh bik neih a thiang lo bawk. A tawi zawngin, thuneihna inbuktawkna (balance of power) felfai tak hnuaiah inzawmna leh thawhhona tha a awm tur a ni zawk. Chu ti ang awm lova heng mipui nghawng pawl lian pathum te inzawmna leh thawhhona ah sawrkar tha leh sawrkarna tha a awm thei ngai lo. Helaiah hian belh duh ka nei. Mizo te hi kan tuipui a hniam nge, a danglam nge ka hre lo, ram pum leh hnam pum anga buaipui luih luih tura ka ngaih thilah te kan ngawi leh ang thuap a, a ram pum anga buaipui viau tura ka ruat lem loh ang chi-ah te kan phul leh ang hlut lawi a! Entirna atan, sawrkar apiangah, a bikin sawrkar hnuaia hna thawh chi, contract chungchangah sawrkara che thei fal, contract hmu thei fal hi sawrkar inthlak apiangin hmuh tur leh hriat tur hi an awm ve deuh ziah a. Tun hnaia lar em em, Kamrula phei chu ram leilung fa pawh ni lo a ni lehnghal a. Vai pakhatin Mizoram sum, mipui chan ai min eiralsak hnem zia, contract a hmuh theih si zia leh a hnathawh chhiatzia, Mizo te tana mangkhawng min hnutchhiah a pawisak loh zia te hailan a nih nawn awn awn hnuah pawh kan tlawmngai pawl, kohhran leh sawrkar chu a ngawi tlat mai! Hei bak baka ram hnuk khawih leh Mizo te pawisawina nasa hi a awm tawh dawn chuang em ni? Tun sawrkar chauh ni lo, sawrkar hmasa lamah pawh he ti ang chi, contractor thatchhia, zawmthaw leh hlep chauh um hi kan nei thin, a contractor mai pawh ni lo, a contract petu leh chu contract chungchanga inhnamhnawih zawng zawng te chhui chhuak a, thil dik lo a awm leh awm loh hai lang a, hrem ngai chu hrem, ban ngai chu ban tura ram hruaitu lu ber thlenga na taka nawr tumna reng reng a awm ngai lo hi kan tlawmngai pawl, kohhran leh sawrkar ka demna kumhlun a ni. Chu chu contract chungchangah chauh a la ni zawk a, kan sawrkar leh sawrkarna kalphung chhungah hian hnam hnuk khawih tak tak, ngawih bopui leh en liam mai mai hi kan ngah lutuk. Chu tih laiin, vai IAS officer, Mizo te chan ai a eisak emaw, Mizo ram leh hnam tana pawi a khawih hriat tur em em pawh awm lo, a hna tha taka thawk hle hle lai engzah hi nge eng dang vang ni lo, hnam dang, ‘vai’ a nih vang ringawta ‘bang rawh se’ ti-a kan au khum tawh? Bang tura kan duh chhan hi sawrkar tha leh sawrkarna tha duh vang ni lo, chi leh chi inthliarna (racism) dik tak a ni…kristianna nen hian a inhmeh hlawl lo. Mizo zinga Mizo ram leh Mizo hnam hmangaihtu dik tak ti a chhal theih tlem te kan neih zinga mi, fam Pu Rokunga’n hla thu hmanga hnam dang te hmusit lova thiana siam zawk tura min ngen lawm lawmna te kha I ngaihtuah thar teh ang u. Tin, central sawrkar hi Raj Bhavan kawt leh lammual atang te ai chuan, Delhi khawpuia Jantar Mantarah te khuan kan MP leh Delhi-a kan mizopui awm te phungbawma sawmin kan au eih thei zawk lovang maw tih te hi I ngaihtuah teh ang u keini chhung hian. Chu bakah, ram sum leh pai dinhmun a that loh em em laia pawl leh kohhran sum dinhmun lo that viau bik te hi ram kalphung dik leh tha a ni em? Kan duh loh zawng eng emaw a awm chauh va aw chhuah, kan pawl leh kohhran a nghawng dawn loh chuan uipui tui lian thlir liam mai mai pawh pawi ti lo pawl hian ram kalsiam hi a tha zawngin sawrkar kan relpui em tih te pawh hi I ngaihtuah nawn ang u.

Chanchinbu mite/Thu thar theh darhtu (media) te: Chanchinbu mite leh thu thar theh darhtu te hi ram kalphung siam that kawngah te, sawrkar tha leh sawrkarna tha neihna kawnga a ki pawimawh chelh leh vuantu te zinga mi an ni. Chu tih rualin, heng media mite hian chanchin thar an theh darhna kawngah te, mipui te an hrilh hriatna kawngah te, an thu ziah leh chhuah dan kalhmangah te leh sawrkar nen an inlaichin dan thlenga fimkhur taka an kalpui loh chuan tu sawrkar emaw thu chhuah puanzarsaktu leh thu puangtu ang lekah an chhuak thei tih an in hriat a pawimawh hle. Tin, Mizorama ka rualawh em em thinna pakhat chu thil dik lo chhui a, hai lang a, mipui hmuh a puang zar ngei tura chhui ngar ngartu chanchinbu mi, a sap tawng taka investigative journalist kan tlachham lutuk hi a ni. Khawvel pum huapa chanchinbu lar, New York Times, Washington Post, The Tribune leh India rama The Hindu chanchinbu te chanchin hi han keu let la, thu thar an theh darh piah lama sawrkar chhunga dik lo an hai lan avanga politics-a danglamna an thlen nasat zia I hmu ang. Chung zingah chuan The Hindu in Bofors laipui India sawrkarin a leina chungchanga eirukna a rawn hailan te, kum 1971, US in Vietnam a run vanglaia The Washington Post leh New York Times ten US sawrkarin indona a kalpui dan thuruk an puan zar avanga US politics danglam phah te, kum 1972 a Watergate Scandal, US President tanglai, Richard Nixon leh a thuihruai ten an elpui political party, Democratic party National Committee office a lut ru tura mi an tirh dan chhui a, an hai lan avanga President Nixon meuh pawh a ban phah tak hialna te kha ngaihtuah ila. Kan chanchinbu mi te leh chanchin thar thehdarhtu te hian thu thar ringawt puan zar hi a tawk lova, sawrkar khalh ngil tura ke pen a, mipui te ha hawlh zawng ringawt ni lo, mipui te ha hawlh tur chhawp chhuah, theh darh leh tarlan hi an hna pawimawh ber te zinga mi a ni tih hre nawn leh se, sawrkar hmalakna ringawt ni lova sawrkar hmalak lohna, thil dik lo puangzartu satliah ni mai lova, thil dik lo chhui zui a, pho lang tu nih an tum hi a hun tawhin ka hria. Chu ti ang ni thei tur erawh chuan khawi sawrkar leh political party chawm chanchinbu mah an nih a rem lova, lang tlang taka thu vavuk ni lo, thu dik, anmahni ngeiin an finfiah thlap huaisen taka puang chhuaktu, thlirna hrang hrang te buk a, thlifim thei tura khaw hawi zau leh chik taka ngaihtuahna seng mi chanchinbu mi/thu thar theh darhtu an ni ngei tur a ni. Chu ti ang media lama in hmang mi rintlak, taima, teirei peih leh huaisen te awmna ramah chuan sawrkar tha leh sawrkarna tha a awm thin. Kan ramah hian kan nei ve em tih hi I in zawt teh ang keini chhung hian.

Mipui: A tawp berah chuan mipui te hi ‘mipui’ ni ringawt lova ‘khua leh tui tha’ kan nih a ngai. Eng emaw changa chhuah khawm a, rik hluai ringawt hian kawng ro a su thui lo. Kan ram hian mihring tam satliah ringawt hi a mamawh lova, ram leh hnam chhan tura mi hrat khawkheng neih tam hi a mamawh zawk. A chunga kan sawi tak te zawng zawng pawh khi a nih tur ang niin, an tih tur leh thawh tur theuh niin, thawk theuh pawh nise, mipui, khua leh tui ber ten kan bengkhawn loh va, kan uksak chuan si loh chuan engmah awmzia a nei dawn chuang lo. A dik a dik chuan, sawrkar tha leh sawrkarna tha hi khua leh tui tha tel lovin a neih ngawt theih loh va, siam pawh a siam ngawt theih loh. Sawrkar hi kan din, kan siam, kan ta a ni a, kan in ti ta tu hle tur hi a ni ringawt mai a ni! A khua leh tui te berin sawrkar tha leh sawrkarna tha nei tura ngaihtuahna kan sen peih loh va, chu mi lam kawng zawh tura ke kan pen peih chuan si loh chuan sawrkar tha leh sawrkarna tha neih hi kan chanvo ah kan dah tur a ni bik lovang. Kan ram chhan thei tu, tlu chhe tur vengtu leh dinhmun sanga dah theitu chu keini mipui te hi kan ni a, sawrkar kalphung te hi chik ila, Kohhran leh tlawmngai pawl te pawh uluk taka vilin enzui ila, kan tih theih chinah chuan kan chhia leh tha hriatna, ngaihtuahna fim takin ka tan chauh ni lo, ram leh hnam tana tha ni a min hrilh ang chinah chiah zel huaisen taka aw chhuahin kal ila, kan ram zim te, square kilometre sing hnih chuang leka zau hi chhal nawm chawp ram nuam ni lo, ram nuama hnam dang ten an rawn chhal luih luih tura din chhuah hi thil har tak niin a lang lo. Kan buaipui tawh hi chu buaipui chat ila, bawnghnute so liam anga so hluai, kiam leh rawih rawih a reh hlen daih thin mipui nih hi kan sim a hun tawh. He kan ze nghet lo lutuk hi kan politician zinga fing phakar leh an sangawi zawnpui te hian an hre chiang tawh lutuk a, engmah tih hreh an nei tawh lova, kan hmai eng pawh min zahsak duh tawh loh hi. I harh ang u keini chhung hi!

       Kum tawpah kan inthlang leh dawn. Italian thuhlahril phuah thiam, Dante Aleghieria’n ‘Hremhmuna hmun sa lai ber chu ram leh khawtlang chhiat lai ber pawh a tan lam bik nei lova ngawi tlat thin te tan zuah a ni,’ a tih angin, kan ram, kan hnam hian mi fing ngawichawi a mamawh lova, mi mawl bengchheng leh mi pamham taima te a din chhuahpui dawn lo. Mi dik, huaisen, taima, mahni aia ram leh hnam dah hmasa, ngawih a huna ngawi thei, pen chhuah a huna hma hruaitu, ral thlirtu mipui satliah ni lo, khua leh tui tha a mamawh. Kan ram hruaitu leh politics a zuang lut te ah ka beidawng tawh I tih chuan nangmah kha ram leh hnam chhanna atan zuang lut ve rawh. A nih loh chuan, ram leh hnam tana chhenfakawma thawk ho thei tur te awmna ber ni a I ngaih ah khan I kut zung chal kha I hmet keuh mai dawn nia. Heng te thleng hian I ngaihtuah teh ang u keini chhung hian!