Online Examination leh a Chhehvel

Hri pui léng avangin a kum zâwnin Mizoram University hnuaia affiliated college hrang hranga zirlai te chuan online examination an hmachhawn leh ta mek a. Kan hun tawnin a zir miau loh avangin hetia under graduate zirlai ten kum an hloh lohna tura examination an hmachhawn hi a tul miau si a, kawng dang awm hek lo le...examination chu kan han tan leh ta poh chu a nih hi!

Hri pui lén hma pawh khan ràlkhat atanga zirna (distance learning) kan tih ang chi hi chu zirna pêng pakhat, awm sa reng a ni ve hrim hrim a. Chu tih rualin, tun hun anga a nâwlpuiin hmun leh hmuna zirtirtu te vénna leh vilna hnuai ni lo, rálkhat atanga examination an hmachhawn hi chu a la awm áwm love.

Thil buaithlak tak mai chu...

Rálkhat atanga examination hmachhawn leh huaihawt a nih miau avangin zirtirtu te tan pawh hmun leh hmuna invil anga khauh taka kan invên thin ang kha chuan invèn ngaihna a awm si lova, invén sèn lah a ni hek lo. Eng ang pawhin zirlai te han fuihin, examination an hmachhawn tur atana inbuatsaih tha tur leh, dik leh fel taka examination hmachhawn theuh tur te, phal loh thil ti ru man chhuah an awm chuan na taka hrem an nih tur thu te sawiin, han invau sa teh mah ila, a tak takah chuan eng teh ual han tih tak tak theih a ni si lo!

Thil pawi tak mai chu...

Nikum lama online examination hmachhawn kan zirlai te result a rawn chhuak a, Outstanding class-ah an rawn pass deuh vek mai a (Mizoram college tin result pawh a ni deuh vekin ka ring!) Kum 10 chhung college-a ka lo thawh ve tâk chhunga ka paper lâk bika result ka neih that ber tum a ni! Tum dang ang examination result chu nise, lawma zuan tawr tawrna tham a nih tehlul nen, ka rilru a ti na ru riau tlat mai!

Kan nau te outstanding class-a an rawn pass vek hi ka láwm lo a ni hauh lova, an pass dan zâwk hi a ni min ti lawm lotu zâwk chu. Mahni pindan chhung atangin, mobile phone hmài te tak tê kaltlanga examination vèngtu, an zirtirtu ten an vènna hnuaia ziak an ni a, entawn a awl zia te, lo ziah láwk mai a har loh zia te, objective questions hlang chhàn phei chuan browse chhuah zung zung a har loh zia hre chiangtu te zinga mi ka ni ve a.

Zirlai thenkhat te chu college chhuahsan mai tur, an kum tàwp examination hmachhawn tawh leh hmachhawn mek te an ni a. Tuna kan examination kalphung ang hi chuan zir miah lo pawhin division tha taka pass a awl nasa mai si a. Heng zirlai te hian online examination kaltlanga an hlawh chhuah, an marksheet hi an dam chhunga an rin tawh tur, hna zawnna ilo zawng zawnga an phawrh tur te an ni tawh si. Mark sâng tak leh division tha takah an pass a ni thei e. Mahse, an degree mil thiamna leh hriatna an pass chhuahpui tel ang em tih hi ngaihtuah tham tak niin ka hria.

Tin, thil dik lo leh fel lo a ni tih hre chiang em em chunga inziak pass zirlai te (tumahin an hmuh loh pawha dik leh fel taka examination hmachhawn te pawh an awm tho tih hria ila) hi nakin lawkah chuan kan ram chhunga hna leh kawng hrang hranga dinhmun pawimawh la rawn chelh tur te an ni dawn si a, dik leh fel takin, hlemhlêtna leh dik lo hnàwl ngam, mi dik leh rinawm an rawn ni ang em?

Chung zawng zawng aia zawhna pawimawh leh veiawm zawk ni-a ka hriat chu he online examination zirlai tam zawk ten kan hmachhawn danah hian, kan thalai/zirlai, kan hmachhuan leh kan hmakhua (future) tur te hian ngaihsân tur dik, ngaihhlut tur dik leh an ngaih pawimawh hmasak ber tur hi an thlang dik em? A táwi zawngin, an moral/value system hian kawng dik a hawi em? A hawi lo a nih vaih zawngin kan ram hmabak chu a ropui viau hian kei ka ring thei tlat lo!