Mizo Tlawmngaihna hi Ennawn a hun tawh em?

Kan thianpa pakhat chu covid 19 avangin kar khat chuang zet damdawiinah enkawl ngaiin a awm a, a nupui fanau te pawhin hri an kai bawk a. An kaina âwm nia an hriat ka zawh chuan an thenawma chhiat tâwk an awm avanga an chét velna atanga a nih a rin thu a sawi a. Hetiang nikhuaah hian 'A chét loh theih si loh va,' chét a tul thin hi a buaithlak lai tak leh kan tlawmngaihna hi ennawn a tul tawh em tih ka rilrua a lo lan chhan lian tak pawh a ni.

Mizo tlawmngaihna hi 'loh theih loh' avanga tlawmngaihna ni lovin, tlawmngaihna avanga loh theih loh va chét chhuahna tur ni âwm zawk tak a nih laiin, tunlaia tlawmngaihna kan lan chhuah tir dan hi chu kalphung, nih phung leh tih phunga kan lo neih laklawh tawh avanga kan la tih hram hram ni ber hian a lang a, helai tak hi ennawn a tul hle in a lang. Tin, tlawmngaihna hi hun bik neia lan tir emaw, phawrh chhuah chi, hun bik neia hman chi pawh a ni lova, nun phung a ni zawk tih hi hriat a pawimawh hle mai.

Mak ve angreng tak chu, Mizo ten tlawmngaihna kan lan chhuah tirna hun hi hun bik nei ang deuh hian kan kalpui ni hian a lang a, chu chu chhiat ni leh that ni hi a ni. That ni-ah hi chuan láwm ni a nih vang nge, lan loh pawh hi kan inthlahrung lem lo deuh ni hian a lang a, chhiatni ah erawh chuan dem kai a awl bik riau zel! 

Ka sawi tum ber erawh chu...tlawmngaihna kan lan chhuah tir dan hrang hrang, a bikin chhiat tawh chungchangah, heng khawhar in lenpui (a lenpui ngawr ngawr lam aiin a hun chhung rei hi), khawhar in riahpui, ruang kan tlaivarpui dan kalphung, kan invui dan, a tâwi zawngin, chhiat tawha kan intuamhlawm dan leh in sawngbawl dan, engkim 'khawtlang huap' veka kan kalpui, khawtlang tana phurrit, lusun chhungte tan lah rit bawk si-a kan kalpui hi ennawn a, siam that a tul tawh em tih hi a ni. Kan pi pute hun laia a chunga kan sawi zawng zawng te khawtlang nuna a pawimawhna leh tangkaina ang kha vawiinah hian a la ngai reng em tih te, chu mi kaihhnawih zelah chuan tlawmngaihna kan lan chhuah tir dan leh lan chhuah tirna hmun pawh hi her rem a tul tawh em tih hi ngun taka ngaihtuah nawn a tul tawh em? 

Hemi kawnga hma la thei ber tur chu Central YMA hi a ni âwm e. Heng chungchang hi chu chipchiar zawkin Ruatfela Nu lehkhabu ziah, 'Mitthi Privatize' tihah leh tun hnaia lehkhabu lâr ber pawl, Rev. Lalhmingchhuanga Zongte (fam) lehkhabu ziah 'Mizo Buanpui te' tih lehkhabuah khan kimchang takin a inziak a, sawi lang vek lo mai ang.

A tlângkawmnaah chuan, hmanlaia kan zângkhaipui, vawiina phurrit lo ni ta, chhiat tawh chungchanga kan tlawmngaih dan tam tak hi covid 19 hri pui lêng karah hian kalpui remchang lo a awm ta nual mai a. He hun hi hnam anga insiamremna atana hman tangkai chi tak a ni lo maw? A thu hrimin, lusun chhung te tawrhpuina thûk tak avanga kan chêt chhuah pawh ni lo, hnam tih phung a nih avang chauh a tih ve hram hram hian kan in hnem tawn viau hian kei ka ring tehchiam tlat lo! A nihna takah te chuan chhung tin hian kan chhiat leh harsat mangan lai bera kan rilrua lo lang hmasa ber kan nei vek a, chung mite chu lan pawh an rawn lang hmasa ber tlangpui bawk. Chung mite chu a ni min thlamuan a, min hnemtu dik tak zawk te chu, mipui vantlang in chîm luai luai ai chuan.

Ngaihdan, pawm dan leh duh dan erawh a inrual vek dawn lo. Mahse, ngaihdan insual atang hian alawm ngaihdan thar tha zawk a lo chhuah thin le!