Cyber Addiction leh Tleirawl te

The Teenage Brain

Pic 1: Mihring Thluak

            Mihring thluak hi then hrang (Compartment) pali-ah mithiam te chuan an then a (Pic 1) - Occipital lobe, parietal lobe, temporal lobe leh frontal lobe.  Occipital lobah chuan kan khaw hmuh dan (vision), ziak leh chhiar thiamna (reading and writing skills), taksa peng hrang hrang thawhhona (patterning and coordination) te a awm a, mihring thluaka inseam pum/puitling hmasa ber a ni. Temporal lobe-ah chuan tawng (language) te, hlim leh tahna (emotion), mipa leh hmeichhe ze hranna (sexuality) te awmin, occipital lobe zawha thluak insiampum hmasa ber a ni. Parietal lobe-ah chuan kal velna (movement) leh thil hriathranna/hriatna (Sense/sensation) te a awm a, occipital lobe leh temporal lobe zawha thluak insiampum pathumna a ni. A tawp ber, kan lu hma lam/chal lama awm frontal lobe ah hian thutlukna siam (judgement), ngaihtuahna hman thiamna (insight), rilru let but, thin thawk thut etc thununna (impulse control) a awm a, mihring thluak thenhrana insiampum hnuhnung ber a ni. A tawi zawngin, frontal lobe hi mihring thluaka a pawimawh lai ber leh naupang/tleirawl atanga puitling kan lo nih thinna lai tak a ni.

            Mahse, thil buaithlak deuh mai chu frontal lobe hi kan thluak insiampum zinga a hnuhnung bera insiampum hnuhnung ber a ni tlat hi a ni. Mihring thluak hi mithiam te chuan kum 25 kan nih thleng hian a la thang a, kum 25 kan pelh chhoh tawh hnu erawh chuan a than tawp a thleng tawh an ti a, puitling kan lo ni ta thin a ni. Occipital lobe, temporal lobe leh parietal lobe te hi chu tleirawl (adolescent) kan nih chuan a thang puitling hman vek a, an nih tur ang an ni zo tawh thin a. Mahse, frontal lobe erawh chu a la thang puitling ve hman lova, tleirawl hun (adolescence) ah pawh thang mek/insiam mek zel a la nih avangin, a nih tur ang a la ni ve hman thin lo. Chu tak chu naupang leh puitling aia tleirawl te kan danglam bik thinna chhan hi a ni ta a ni.

            Tleirawl te chu an hormone than vanglai a nih avangin an thin a chhia a, an rilru pawh a na hma...tleirawl luhlul rual an ni...tleirawl sual a nei, tleirawl an ni tawh a, an ler tan...adt. Heng zawng zawng hi thian kawm dik loh vang te, an sual vang leh awmherh vang hrim hrimah nu leh pate hian kan puh leh ringawt thin a, a dik lo! Sawi tak ang khian thluak thang lai mek an nih avang zawk hian tleirawl te hi naupan kal pel tawh, puitlin la thleng si lo te an ni zawk. Chuvangin, kaihhruai an mamawh hunlai tak zawk a ni.

            Tin tleirawl lai hi Child Study Movement bultantu Granville Stanley Hall chuan ‘Suangtuahna khawvela chen tam hun’ tiin a sawi. Tleirawl tawngkam takin kan duh zawng leh nih chak zawng, hmeltha kan tih leh ngaihzawng te leh thil reng reng ‘dream’ nasat hunlai a ni. Mahse, chu tak chu, tleirawl te tana hun hlauhawm lai ber hun a ni thung si. An ‘dream’ ang lova thil a lo thlenin, puitling te anga rilru puitling taka dawnsawn an thiam lova, ruihtheih thil, depression, thinchhiat, rilru inthlak thut thut (mood swings) adt an neih nasat phah thin. Tin, tleirawl hun hi engkim tem chin chak hun a nih avangin a tha lam leh a tha lo lam zawng pawhin, a hnu leh lam nghawng tur an la ngaihtuah thlen phak miau loh (thluak thanglai mek an ni kan tih tawh kha) avangin, tleirawl te hi an kut a hleiin, an tuan a rang em em a. Chu vang chuan kawng hrang hrang-zuk leh hmuam, damdawi, internet, mobile phone etc ngawl an vei (addict) hma bik em em reng a ni. Tin, thil reng reng an thiamine, an man chak em em a, an theihngilh leh zung zuung bawk a! Mihring kum hrang hrang zingah tleirawl lai hun hi miithiam te chuan kan thluak chak lai ber a ni an ti reng a ni.

Puitling ten kan hriat reng tur chu tleirawl laia dai sual palh, che phelh leh che pelh rem rum te hi an tladah vang emaw, sual bik vang hrim hrim emaw a chutianga khawsa chu an ni lo tih kan hriat a pawimawh hle. A theih chin chinah kutthlak/vuak/tharum hmanga thununna lekkawh loh hram tum tur a ni. An thluak a than phah thut dawn chuan loh avangin a sawngsawhlawt lo. Chu ai chuan titipui a, fuih a, tanpui kan tum zawk fo tur a ni.

Addiction

            A hmasa lama sawi tawh ang khan tleirawl te hi an thluaka frontal lobe a la than puitlin loh avangin thil reng reng an addict hma kan tih tawh a. Eng vangin nge ngawl kan lo vei (addict) ringawt thinna chhan hi han sawizau leh teh ang. Eng emaw kan han tih a, nuam kan tih a, kan phur te, kan hlim te hian kan thluaka ti mur (cell) te hian chemical chi khat, dopamine an tih an pe chhuak thin a. Thil chak em em kan neih te, nghahhlelh em em kan neih te, phur tak leh nuam ti taka min siam a, min awmtir thin tu chu he chemical, dopamine hi a ni.  Kan thluak cells ten dopamine an chhuah tam poh leh nuam kan ti a, nuam kan tih poh leh tih leh kan chak a, kan tih zin poh leh kan thluakin dopamine a lo siam chhuak tam a, a hma aiin kan lo chak lehzual ta thin a ni. Kan thluak hian zu leh drugs a hre hrang lova, thlarau hnathawh leh sual hnathawh pawh a thliar hrang chuang lo! Nuam kan tih leh kan chak zawng te hi kan thluak khawl ten an hna an lo thawh vang a ni a. Nuam kan tih zel theihna atan dopamine an lo siamchhuak zel a, kan tih zin poh leh kan thluak cells ten dopamine an chhuah tam telh telh a, nuam ti tura kan mamawh zat (dose) a tam telh telh a, a tawpah chuan ti lo thei lo (addict) kan lo nit a thin a ni.

Cyber Addiction

            ‘Cyber’ chuan electronic thil zawng zawng, calculator atanga mobile phone, computer, ipod, iphone etc a huam vek a. Chutih rual chuan, tunlai hun bika a ngawl kan vei nasat em em, smart phone/mobile phone leh social media chungchang kan thlur bing dawn a. Chutiang ngawl vei chungchang chu tuna kan sawi tur hi a ni.

            Zu ngawl veiin zu an chakin engtin nge an awm thin? Drugs ngawl vei te hian damdawi an chakin engtin nge an awm thin? Zu ngawl veil eh drugs ngawl vei i hmu tawh em? A nih leh cyber addict i hmu tawh em? Engtin nge cyber addict te chu an awm thin? Cyber addict hi ngawl vei zingah chuan tunlaia ngawlvei/addict tam ber an ni! In tin deuhthaw hian cyber addict kan kawl deuh vek a, mahse, addict an ni tih leh a ngawl a vei theih ti kan hriat loh vang hian kan hre lo mai mai zawk a ni! Heng zawhna te hi han inzawt chhin teh. I chhan dan azirin cyber addict emaw, addict tan emaw i nih leh nih loh thui tak chu i inhre thei ang:

1.      Smart phone/mobile phone tel lovin/nei lovin i awm thei ang em?

2.      I mobile phone kha a hma aiin i khawihin, i bih ngun telh telhin i hria em?

3.      Eng emawa i buai vang emaw, rokhawlhna/remchan lohna avangin i mobile phone hun eng emaw chhung i khawih hman loh/theih loh hnua i khawih dawnin khawih thuai thuai chakna/phurna nasa tak i nei thin em?

4.      I mobile phone buaipui lutuk avangin in chhungkua in inhauh phahin, hna i thawhpuite nen in inhmuhthiam loh phah thin em?

5.      I mobile phone i ah loh emaw, i hmuh mail oh changing i chiaiin, i phili buai ngai em?

6.      Mobile phone/social media (whatsapp. Instagram, youtube, facebook etc) khawih tlem i tum fova, mahse, i hlawhchham fo ngai em?

Kum 2016 a Chicago-a software company in an zirchiannaah chuan mi pangngai hian ni khatah kan mobile phone hi vawi 2,617 kan khawih thin a, a khawih nasa top10 te chuan ni khatah vawi 5427 an khawih tih an hmuchhuak! Tin, Apple company-in an handset siamchhuah hmangtute an zirchiannaah chuan mi pangngai hian (cyber addict ni lo) hian nitinin minute 11 leh second 15 dan zelah an mobile phone an khawih thin tih an hmuchhuak a. Chutianga chhut/belhkhawm chuan mobile phone ngawl vei pawh ni lem lo te hian kan damchhung zawng zawng zinga kum sarih hi mobile phone khawihna atan hunk an hmang tihna a ni! A ngawl vei te phei chuan kum engzat tak hmang ang maw?! Engvangin nge chute taka mobile phone chu kan atchilh tak tlat mai le?

Hei hi i ngaihtuah tawh ngai em? Eng vangin nge social media (whatsapp, instagram, youtube, facebook etc) te hi man chawi ngai miah lo, a thlawna download theiha an siam? A chhan chu a hmangtu-nangmah kha company tan an sumdawnna bungrua i ni tlat alawm! Social media sites reng rengah i inziahluh dawn chuan i bio-data kimchang ziahluh hmasak a ngai thin. Kan bio-data kan pek te hi profile name atan chauh hian a tangkai lo. Company-a mithiam ten i profile/bio-data khan gun takin an lo zir chiang a, chumi piahlamah i thu post te, i thlalak upload leh status update, a tawi zawngin digital khawvela i khawsak phung kha ngun takin an lo thlithlai reng che a (chutiang atan chuan computer algorithm hrang hrang an siam thin), i mizia, i duh zawng, tui zawng leh chak zawng hriat tumin ngun takin an lo zir thin che a ni. Chumi hnuah advertising company hnenah an thilsiam chhuah, i awh zawng leh duh zawng tak siamchhuaktute chu an site-a an thil rawn zawrh tur che in an sawm ta thin a, hlawkna tam tak an lo tel ta thin a ni. Heti hian youtube-a video i en lai emaw, online games i khelh laia advertisement lo awm chhenna chhan chu i hre tawh mai em? Instagram leh facebook i khawiha friend/follower suggestion-a mi chi hrang hrang lo lang thin te hi han bel chiang chhin mah teh. I mize milpui, i tha tih zawng tak an ni fur zel ang! Online-a thil chahna site hrang hrang-Amazon, flipkart, myntra, jabong etc ah te hian i duh zawng lei tur vawi khat zawng la, a hnu lehah chuan i thil zawn thin le hi duhzawng tura an rin chu ‘recommended for you (hei hi i duhzawng a nih kan ring) tiin an rawn hlui nghal teuh zel mai ang che.

            Hei hi kan hriat reng a pawimawh. Heng online retail company te, social media company te leh mobile phone company te hian kan hriat loh hian kan rilru puthmang, kan duh zawng leh it zawng te hi ngun takin an zir reng a, an thil siamchhuah te chu a ngawl min vei tir a, min atchilhtir a, um min hman tir a, a hlawkna a tam thei ang ber tel an tum ran ani tih hi. Chu vang chuan alawm whatsapp, instagram etc te hian kumtin an app an update, emoticons thar, page thar etc an siamchhuah reng thin ni! Mobile phone pawh a thar tha zawk a chhuak kum tin a, chutianga hman theih tur hmeichhe tan beauty applications beauty plus, facetune, Perfect 365, Modiface etc bakah a dawt leha kan sawi tur ‘selfie’ thlenga an rawn thuam that chamchi thin hi! Mipa tan lah online games nuam tak tak lah a tam...kan mobile phone/nu leh pa te mobile phone kan hum chawt reng hi. Hei tak hi thluak thankin tawh, puitling te chuan kan manthiam a, a nghawng tur kan dawn thiam a, insum nachang leh tuipui lutuk loh nachang kan hria a. Mahse, tleirawl te chu thluak la puitling famkim lo an nih avang tak khan heng company a an mithiam thluak tha te ngaihtuahna fim atanga lo chhuak, thil tha leh itawm tak tak te chu an lo atchilhin, a ngawl an lo vei ta thin a ni. I fanu/fapa kha pawn chhuak tam lovin inah a awm chet chet a, a pindanah mobile phone khawihin a hun tam zawk a hmang a, thian te leh chhung te pawh kawm em em chuang lovin a awm a. Eng thil sual mah a ti lo tiin, i lo tha enliam satliah ngawt em? Cyber addiction hi zuk leh hmuam, zu leh drugs ngawlvei nen hian a zun ngaih nat dan a inang reng a nia! Chu chu hria in, ram thenkhat, China leh Taiwan-ah te chuan heng digital/cyber addict te enkawlna tur camp sawrkarin a din hial tawh a ni. Thil dang ngawl vei te ang chiah hian cyber ngawl veina (cyber addiction) hi thihpui tam tak an awm tawh. Game khelh nasat luattuk avanga taksa che lo, chumi avanga thisen zam hnawh thihpui (gamer’s thrombosis tiin an sawi) te, computer keyboard hman nasat lutuk avanga kut zungtang leh banrek natna (carpal tunnel syndrome) te, mobile phone leh social media khawih nasat avanga depression nei te, mahni intihlum te, lo thih phah ta te chanchin hi chhiar leh hriat tur a awm teuh a ni. Tin, a hmaa sawi tawh angin, kan thluakin ruihtheih thil leh cyber addiction a thliar hran ve si loh avangin, a ngawl kan vei tawh chuan rilru leh taksaa a thawh dan a inang vek a ni.

            Cyber addict te awmdan tlangpui:

1.      Mi bula awm an peih lo ngawih ngawih (An mobile phone leh social media sites etc vel an tleipui zawk)

2.      An mobile phone leh online thil bak eng dang mah an ngaihtuah thei lo.

3.      Mobile phone khawih thei lo/online thei lo (handset tih bo/internet signal chhia etc) a an awmin, awm ngaihna an hre lo.

4.      Mobile phone/computer tel lovin an awm thei lo.

5.      Chaw  ei nachang hre lo, thinchhia, mut nachang hre lo, zan mu thei lo, ei leh in tui lo, an nungchang inthlak, an khawsak phung mumal lo etc (heng te hi thil dang vang pawha a awm theih rualin, cyber addiction lan chhuahna langsar zinga mi an ni)

Selfie, Online Dating leh a Kaihhnawih

            Thil pawi em em pakhat chu, cyber khawvelah chuan vawi khat tihsual zeuh hi tunhma ai khan a pawi tawh zawk. Internet-a thil kan post tawh chu mi pakhatin a lo hmuh a, a lo download zeuh hman chuan paih leh pawh ni ila, a bo thei tawh lo. Tun hma chuan eng emaw thil mualphothlak leh zahpuiawm tak pawh lo ti ila, tunlai anga IT a la that miau loh avangin reilote-ah a reh leh mai thin. Tunah erawh chuan vawi khat tihsual zeuh pawhin a darh nghal hluai zel tawh mai si a. Chu vang tak chuan internet kaltlanga kan thiltih-tawngkam, thlalak post etc te hi kan fimkhur a ngai takzet. Tleirawl te bawk hi a mualpho thin te an ni leh fo! A chhan chu a hmalama kan sawi tawh kha.

            Tunlai tleirawl leh thalai te buaipui em em, mobile phone an hum fer fur tak nachhan leh camera resolution tha kher an duhna chhan chu ‘selfie,’ a zotawngin, midang tibuai lova mahni-a thla inlak theihna hi a ni awm e. ‘Selfie’ hian ken tel pathum a nei:

1.      Mahni thla duh thala lak

2.      Social media-a post/upload

3.      Mi min hmuh dan leh ngaihdan (comments/like) ngaihven

Selfie in a ken tel pathum te ngun taka kan en chuan selfie-ah chuan a hming ang tak hian ‘mahni,’ ‘keimah’ hi a pawimawh ber a, midang chu a pahnihna an ni. He selfie culture hian tleirawl leh thalaite-ah mahni indahsanna, midang te chungtlakna leh midang te thu ngaihtheih lohna rilru a hring chhuak tlat zu nia! Chu lam chu article hran ziah tham a nih avangin, kan sawi thui lovang.

Selfie in a ken tel thil pathum te khi han chhuizau lehzual dawn teh ang. Selfie-ah chuan mahni thla lak/inlak a nih angin lang tha kan intih dan ber leh miten tha/hmeltha min tih tur ber nia kan hriat angin kan thla kan la thin. Tumahin kan hmai mawm lai emaw, kan tawphnawk lai emaw, a tawi zawngin miin kan hmel an nuihzatna tura kan ngaih angin kan in selfie ngai lo. Chu chu thil dik lo pawh a ni hran lova, thil tih awm tak pawh a ni zawk ang. Helaiah hian sawilan ka duh chu tleirawl te hian an nihna tak (identity) an la hre fuh lova, engnge nih an tum pawh an la chiang lo. Tleirawl laia an nungchang, inchei duh dan, ngaihsan/ngaihven zawng etc te hian an mizia leh nihphung thuitak a hril a. Chulam kawnga an rilru kaihruaitu lian ber pawl chu an rualpui leh thiante ngaihdan leh hmuh dan (peer pressure) hi a ni. Hei vang hian alawm tleirawl te hi an ngaihven leh ngaihsan zawng, vei zawng a inang deuh thup zel. Entir nan, Korean film an atchilh lai a awm a, Korean pop artistes te an ngaihven leh em em a. Incheina kawngah pawh an nalh tih zawng a inang deuh put thin. Puitlingah chuan mahni duh dan bik kan lo nei tawh a, miten an tuipui avang ngawtin kan va tuipuiin emaw, kan va ngaihven ve  huam lem lo tlangpui. A chhan chu keimahni theuhah, ngaihdan ngelnghet kan lo neih fel tawh vang leh kan nihna/nih tur (identity) kan chian tawh vang a ni. Tleirawl te chu an nihna ber tur zawng lai mek an nih avangin leh an la inhriatchian miau loh avangin rilru mumal an la nei thei thin lo. Chu an nihna chu tun hma chuan thiante nen inkawmna atang te, nu leh pa leh unaute nena chenhona atang te, a tawi zawngin, an mihringpuite nen an inkawmna (interaction) atangin an chher chhuak thin. Cyber khawvelah erawh chuan online-a inkawm kan lo uar tak avangin a dan a lo dang ta. Tleirawl ten an nihna (identity) hmuhchhuah an tumna kawnga pawimawh tak pakhat chu selfie hi a ni.

Selfie hi a tha lo em em a, tleirawl te nun tichhe vek theitu a nih avangin tih tawh loh/tih loh tawp tur a ni tih chi a ni lova, chutiang khawpa thil tha lo lah a ni hek lo. Amaherawhchu, kan sawi tawh angin a ngawl vei theih tho a ni. Selfie-ah chuan kan thian te nen pawh lang ho vek mah ila, a pawimawh ber leh a latu in a ngaih pawimawh lai ber chu amah (self) kha a ni. Selfie thla kan lak hian midang aia mahni ngaih pawimawhna, indah pawimawhna a keng tel nghal a, midang te chu lo lang chhe deuh pawh nise, keimah ber ka lan that a, fakna ka dawn that chuan a tawk! Chumiin a rawn hrin chhuah theih chu selfie atchilh leh buaipui bera neih chuan amah bak ngaih pawimawh a nei lova, midang te rilru hriatthiampuina (empathy) a tlachham thin. Tunlaiah phei chuan thlalak sawngbawlna app tha lutuk a chhuak hnem tawh bawk nen (photowonder,creamapp,skinny camera etc), thlalak aiin a takah a chhia kan inti leh fo thin! Tin, selfie chu darthlalanga inen a, mahni taksa leh hmel kan inhmu ang thova, mahni hmel leh landan kan inhmuhchianna a nih avangin, selfie atchilh reng reng chuan anmahni an inhmu zing ber a, an hmuh zin ber chu anhmanhi a nih tlat avangin an nunah midang te an leng ve meuh thin lo. Chu chu a saptawng chuan narcissism tih a ni a, mahni inngaihhlutna, mahni lan dan ngaihhlutna tihna a ni ber. He thumal hi Greek tawng atanga lak a ni a. Greek thawnthu pakhatah chuan tlangval pakhat, hmeltha leh piannalh zet mai Narcisus-a hi a awm a. Tum khat chu a ramvahnaah dil pakhat hi a va hmu a. Dila a zu kun hniam chuan, dil tuiah chuan amah leh amah chu a zu inhmu ta a. A hmel tha tak leh a pian nalh tak, dil tuia a thla lo lang chu hmu in, amah leh amah chu a ingaizawngin, a vei ta tlat mai a. Mahse, a takah a nei thei dawn lo tih a hriat si avangin lungngaiin a thi ta a ni. He thawnthu hian  selfie addiction nghawng a tarlang chiang hle.

Selfie in a ken tel pahnihna chu sawi angin social media-a post/upload a ni. Tumah hian midang te hmuh ve loh turin thla kan la ngai lo ti ila kan sawi sual vakin a rinawm loh. Selfie thlalak reng reng hi a latu hian ama thla la mah nise, a lak chhan hi chu midang te hmuh atan phochhuah a duh vang a ni tlangpui. Thlalak dan chi hrang hrang-chhungkaw thlalak, inneih thlalak, thian ho thlalak etc pholan aia selfie thlalak pholan danglamna chu midang te kan inhmuhtir chakna rilru avanga mahni thlalak pholanna a nihna hi a ni. Tleirawl te hian midang zawng (naupang leh puitling tawh te) aiin mite ngaihven, ngaihsan leh chung en nih hi an chak zual a. Chu chu an nihna zawnna leh chherna (identity formation) atan thil pawimawh tak pawh a ni reng a. Selfie thla la hnem ber leh social media-a phochhuak tam ber pawh an ni reng a ni. Sawi tawh ang khan mahni thla inlak chu thil tha lo a niha a awm hran lova, midang te hmuh tura phochhuah pawh hi a that loh viauna a awm hran lo. Mahse, thil reng reng, a lutuk chin a awm a. Chaw pawh pumpuiin a pai tawih zawh loh khawpa tam kan ei nghek chuan pumpui chak lo. Pumpui na kan nei thuai thin ang hian, selfie pawh hi kan tih leh lutuk chuan midang te aia mahni indahsanna leh inngaihhlutna, a tawi zawngin chapona rilru tlang sang tak min siam theitu a ni. Chu tak chu tleirawl te hian an la man fuh thiam ve lo. Chuvangin, chumi kawnga kaihhruai theitu chu an u te leh puitling zawk te hi kan ni.

A pathumnaah chuan selfie chuan phut let ngei ngei thil pakhat a nei a, chu chu chhanna (feedback) a ni. Selfie thlalak kan post hian social media-a lo hmutute chu nalh min ti em? Heti hian chhe lo min ti em? Eng nge min hmuh dan? tih zawhna hi kan zawt tel nghal a ni. Chu zawhna chu likes leh comments hmangin mi chi hrang hrang, kan hmelhriat leh hmelhriat loh chenin an rawn chhang ta sup sup thin. Mihring hi kan mawl tawh lem lova, hmeltha leh nalh lutuk lem lote selfie thlalak pawh a tha zawngin kan comment/like sak hram hram thin. Chu chu tleirawl tam tak (puitlingah pawh a ni tho) te chuan mite hmuh dan dik take maw tiin, an nihna tak tak emaw an inti fo. A tak ram (reality) a online-a an nihna/ni emaw an tih (online self/identity) an lo nih leh si loh hian tleirawl tam tak chu an nun leh rilru-ah a tha lo zawnga nghawng a nei thei thin. Entirna pakhat han siam teh ang. Tleirawl pakhat chuan, beauty apps hrang hrang hmanga a khawih nalh fe tawh a selfie thlalak eng emaw zat social media sites-ah a post a, likes leh comments pawh a hmu tha hle. Chung likers leh comment tu tam tak zinga rawlthar pakhat nen chuan inchhar chho in, a taka inhmu hauh si lovin, online in an inngaizawng a, a lo rei deuh hnu phei chuan an lo induh ta hle a. A tak ram ni lo (virtual world)ah ringawt chuan engkim tih theih vek hek loh le...hmaichhana inhmuh an tum ta. An han inhmu ta a, rawlthar chuan phone call-a a aw nalh tak a biak kham theih loh leh a thlalak-a tleirawl duhawm leh hmeltha tak kha a taka a’n hmuh chuan online-a a hmuh ang kha a lo ni ta lo tawp mai! Hei hi entirna pakhat mai a ni. Tleirawl khawvelah hian cyber/internet addict te zingah, online-a inchhar a, a taka an rin ang nil eh ta si lo, chumi nghawng (zahna, mualphona etc) avanga ruihhlo-a tlan ta leh mahni nunna hial la ta hi an awm nual asin.

Chu chuan tun tuma kan thu hlawm hnuhnung ber, online dating chungchangah min hruai lut ta. Tun hma chuan inah lengin kan inrim a, hmaichhana inhmu fo ta na na na chu mizia kan inthup fe chung pawhin, lang lo thei lo chin leh hmuh loh theih loh chin a lo awm thin. Khatiang anga nula leh tlangval inrim a, inngaihzawn kha tunlaiah chuan kan lo kalsan ta a, a thlaktu chu online-a inchhar leh inngaihzawnna (online dating) hi a lo ni ta. Hei pawh hi a hmaa kan sawi tawh te ang bawk a thil tangkai tak, mahse, hmansual leh hriatsual awl tak leh, tihsual chuan nghawng thui tak nei thei bawk a ni. Online dating atanga ngaihzawng leh nupui pasal inzawn kal sual/tihsual theih dan leh a nghawng chhuah theih chu tawi te in a chungah khian kan sawi tawh a, kan sawi nawn tawh lovang. Online dating chungchanga ka sawi uar duh erawh chu mahni nihna ni miah lo leh dawt muhlum hmang pawhin a inbum kual thak theih tih hi a ni. Hmaichhana inhmu a, inrim hun lai kha chuan tlangval/nula ler chu an lang thuai mai a, zep hlen theih a ni meuh lo. Tin, ngaihzawngte ina mahni va inlan chat chat zel kha a ngaih miau avangin, ngaihzawngte bum tur pawhin ruahman fe a ngai thin! Online dating-ah erawh chuan a rualin duh zat zat a biak (text) pah theih a, mipa/hmeichhe dang nen fawr reng chung pawhin khuma rizaia inlukhup chunga bia angin a insawi fel zung zung theih tlat! Min rawn hmu thei miau tawh hek lo le! Online dating hmaa kan inrim dan thinah chuan a takin kan inhmu a, mizia leh nungchang thui tak a tak ngeiin kan inzirchiang tawn thei thin. Online-a inrimnaah erawh chuan chung zawng zawng tehna atana kan hmanraw neih chhun chu kan hawrawp chhut (text message) leh online-a kan intarlan dan, kan thlalak zawng chu a ni. Chuvangin, online-a kan inhmelhriatna leh inhriat dan hi chu ‘a then pawh kan hre thei lo, he lui kam atang hian’ tih ang chauh a ni. Chuvangin, tleirawl te u, fimkhur rawh u. Online-a inngaihzawn hi tunlaiah chuan kan tihdan phung a nih deuh tawh avang hian ngaihzawng zawnna hmanraw tangkaiah in la hmang zelin ka ring. Mahse, online-a i chhar lakah hian i thuruk zawng zawng hrilh faiin, i chhungril ber ber thlengin inphawrh fai kelh ngai suh (a bikin hmeichhiaah, ngaihzawng ten thlalak ‘sexy’ tak thawn tura an tih tlat avanga thawn a, an inthen hnua thehdarhsak leh si an awm fo). Online-a i hriat a mizia leh nungchang te kha chu a mizia leh nungchang tak tak, hmun thuma thena hmun khat pawh a nip ha lo tih hre reng rawh. Online dating sites chungchang pawh sawi tur tam taka wm mahse, Mizo te chuan kan la ngaihven loh lam a la nih avangin tun tumah chuan sawi tel lo mai ang.

Kan thu khaikhawmnaah chuan, online-a kan nihna tarlangtu tam tak zinga tlem te, social media, selfie leh online dating hmangin cyber ngawl vei (cyber addiction) in kan nun a nghawng nasat theih dan chungchang kan sawi mai chauh a ni a. A pawimawh berah chuan cyber khawvela kan nihna hi a tak rama kan nihna nen a inang diak diak thei lo a nih pawhin, a inzul thei ang berin kan siam tur a ni tih hi a ni. Tin, a tawpkhawkah chuan mihring kan ni a, kan intehna leh inhriatchianna tlo ber chu mihring leh mihring, hmaichhana kan indawr tawnna bawk hi technology san tawhna khawvelah hian a la ni fan reng tih hi hre reng ila, kan nun innghahna atan cyber khawvel hi a rintlak lova, a ngawl veil eh hnapui bera neih phei chu a hlauhawm lehzual tih i hria ang u.