Dinhmun

A saptawnga ‘status’ tia an sawi, keini Mizo ten ‘dinhmun’ tia kan sawi hi tunlai khawvel, a bikin kum zabi 21 na khawvelah hian mihring hian a va han ngai pawimawh tawh tehlul em! Kan mihringpui te kan thlir dan leh teh dan pawh an dinhmun atangin a ni fo mai. Nupui pasal zawnna atan, hna diltu lakna tehfung atan, pastor atan, a tawi zawngin kan nun kawng zawng zawng tih theih deuhthaw hi chu ‘dinhmun’ in a hril ang anga her vel thin hi a ni ber maiin ka hria. Midang te kan teh dan emaw, an dinhmun kan hmuh dan leh teh dan lam sawi ka tum lo. Ka sawi tum zawk erawh chu ‘dinhmun’ kan teh dan leh hrilhfiah dan zawk hi a ni.

Dinhmun kan tehna hmanrua leh kan hrilhfiahna tawngkam, kan hriatthiamna rilru leh kan pawmna thinlung azir hian dinhmun hian hmai hnih a lo neih phah ta ni berin a lang. Chung a hmai hnih te chu dinhmun sang leh dinhmun hniam te an ni. Amaherawhchu, tehfung hrang hranga mi hrang hrang ten he dinhmun hi kan teh a, kan pawh sawih-fan kual vel chiam theih vek miau avangin thenkhat ten dinhmun sang taka dinga an inngaih lai emaw, dinhmun sang taka dinga tuemaw an hriat laiin, thenkhat tehna atang chuan an lo sang viau lo ve thei tho mai. Motor hi entirnaa hmangin chiang zawka sawifiah leh sawi zau han tum leh tam ila. Motor hi miin dinhmun tehna atan ni lo, hmun pakhat atanga hmun danga kalna hmanraw tangkai tak pakhat ve maia a ngaih a, ei in tha leh tui hi a taksa hriselna atan leh midang te ei phak loh tha tha ei thei dinhmuna ding, a dinhmun ti sangtu, a saptawng takin a class ti sang tu nia a hriat miau chuan motor chhuak thar ber ber leia neih del dul ai chuan ei in tui leh hrisel tha tha, man to tak taka lei pawh  a duh zawk ngei ang le! Eng vangin nge mobile handset chhuak thar apiang te, incheina chhuak thar apiang te, lirthei chhuak thar apiang te neih kan duh a, kan neih zung zung thin? Kan awhna chu mamawhna vang nge kan dinhmun (status) tarlangtu-a kan ngaih vang le? Eng vangin nge kan inchhung bungbel bal te ngaithei viau si a, kan thawmhnaw hak chhuah tur kan duh tui leh viau lawi thung si thin?

Chu chu a ni. Dinhmun hi engin nge siam tih zawhna kan chhan dan hian kan dinhmun teh dan kawng a ti inang lo nuai thei tlat a ni. Kei ka chhanna ve ah chuan dinhmun siamtu chu kan pawn lam incheina emaw, kan pawnlam ‘class’ tarlang thei inchei mawina lam ni lovin, kan chhungril lam ‘quality’ zawk hi niin ka hre ve tlat mai. Sum leh pai ngah avanga hausa te, thiam thil neih that avanga khawvel hriat hlawh te, mahni eizawnna kawng theuha mi hlawhtling te hi an dinhmun innghahna zawk chu an sum ngah emaw, an lar ah emaw, an inchei thiam emawah a innghatin ka hre lo. A chhan chu an hausakna te, an incheina leh pawnlama an dinhmun tarlangtu zawng zawng chu zan khat thil thu leh mit khap kar leka boral vek thei an ni tlat. Engvangin maw? An dinhmun dik tak ni lovin, an dinhmun lantirtu (avatar) mai an ni tlat alawm. An dinhmun dik tak zawk chu an chhungril lama an tumruhna te, an tawrhchhelna te, an taimakna leh teirei peihna adt kha a ni zawk. Chung te chu meiin a kangchhe thei lova, sum leh pai tlakchhiatin a ngawhng ve lova, rukru ten a ru ve thei hek lo. Professor Randy Pauscha’n rilpui cancer avanga thla tlem te chauh dam tawh tur a nih thu doctor ten an hrilh hnua a lehkhabu ziah The Last Lecture, international bestseller tling pha hial kha lo chhiar ve ngei rawh! A dinhmun chu Professor Pausch hian a hre fiahin a hmu chiang nangiang mai! Mihring hian pawn lam leh midang te mithmuha kan dinhmun tarlangtu leh thehlartu te hi kan dinhmun tak tak emaw kan ti fo. Chu chuan chutianga min tilartu sum leh paia kan tlakchhiat hun a lo thlen te, diriamna leh mite hmuhsit hlawha kan han awm te hian kan dinhmun (status) a ni ta emaw tiin mahni nunna hial te kan lo chhat ta thin zu nia le!A pawi hle mai. Mahni nihna (identity) lo anga lang kan tih te, dinhmun phu lova khawsa/nung nia kan hriat fo te hi chuan an nihna leh dinhmun tak tak an hai chiang hle a, khawngaih hle zawk tur an ni. Mahni dinhmun dik tak hretu chuan a theihnaah a chiang a, hlawhchhamin lungngai  thin mahse, chu hlawhchhamna leh lungngaihna ruam chu a dinhmun pheh tuma beitu mai an nihzia hria in huaisen takin a dinhmun nei let leh turin a bei let thin a, a chapo ngai lova, a tlawm ngai hek lo. Kan dinhmun hriltu chu kan chhungril paukhauhna leh rilru puthmang zawk hi a ni tih hre lo hringnun chu awhna leh thikna in a khat a, harsatna leh beidawnna a hmachhawn ni a lo thlenin chu chu a dinhmun tarlangtu ah a pawm hmiah a, beih let emaw, harh chhuah nachang reng reng a hre tawh thin lo.

Chhiartu duhtak, hei hi ngaihtuah ve teh. Dinhmun sang nia i hriat te emaw, dinhmun sanga ding nia i inhriatna kha nangmah leh i theihnaa innghat nge thil dang-sum leh pai, hausakna, hna, incheina, larna etc ah? TV a fakna (advertisement) lo lang thin hi i hmu ngei ang a. Heng fakna te hi second reilo te chhung awh lek an ni thin. Heng fakna te hian an thil fak thatzia rawn tarlan chu an tum ber a ni a, mipui awh tir leh hip chu an tum ber a ni. Mahse, chu an thil siam, faknaa i hmuh chu i hman phawt loh chuan a that leh that loh, a ‘dinhmun’ i hre thei tlat lo. I belhchian a, i hman a, i hriatchian hnua a lo that loh hlauh phei chuan eng ang pawhin rawn fak mawi leh mahse i ngaihsak tawh lo tawp ang. Chutiang chu a ni. Hausakna, hna sang, hlawhtlinna, hlawhchhamna, incheina adt hi chhungrila kan dinhmun dik tak midang ten an lo hmuh a, an lo entawn theihna tura tilangtu, fakna (advertisement) lek an ni. Heng fakna leh tilartu phenah hian mihring dinhmun leh nihna dik tak chu a lo inphum ru zawk thin a lo ni. Belhchian id awl em le? Mi tam tak chuan chu chu hre lovin, fakna chu dinhmun tak tak emaw tiin tlawm leh zah pawh dawn lovin an um ruak ruak a, hlemhletna leh sual pawisak lohnaah te an lut a, an dinhmun leh nihna dik tak, mi rinawm leh taima an nihna zawk chu mi pamham leh rukruah te an chhuah ta daih thin a ni. Chuvangin, kan dinhmun lan chhuah tir tu te hi kan dinhmun tak tak an nih loh avangin eng hun pawha bo leh mai thei, thamral mai thei an ni a. Kan dinhmun dik tak chu kan chhungril nunze tha (inner quality/inner self) in a rawn siam chhuah zawk a ni tih hi i theihngilh lo ang u.