Beiseina

            Vun ngo hovin an sawi lar em em ‘Pandora’s Box’ hi a chanchin i lo hre ve tawh ngai em? Hmasang Greek thawnthu pakhatah chuan hmeichhe pakhat Pandora-i a awm a. Pandora-i hnenah chuan Pathian ten bawm pakhat an pe a. Chu bawm chhungah chuan khawvela sual (evil) zawng zawng te chu khung khawm niin, Pandora-i chu chu bawm chhin chu hawng miah lo tura hrilh leh khap tlat a ni. Mahse, Pandora-i chuan Pathian te thupek chu ngai pawimawh duh lovin chu bawm chhin chu a hawng lui ta a. Chu velah bawm chhunga sual chi hrang hrang te chu lo chhuakin khawvel an ti buai zo ta a. Pandora-i chuan rang takin bawm chhin chu chhin leh mahse, a chhunga sual awm zawng zawng te chu an lo chhuak zo hman tawh a, thil pakhat chiah bawm chhungah chuan a la awm a. Chu chu ‘hope (beiseina)’ a ni. Vawiin thleng hian ‘to open pandora’s box (Pandora-i bawm hawn)’ tih tawngkam chu sap ho chuan thil te tham tak nia ngaih, mahse nghawng nasa tak nei si, hriat lawk lem loh leh hre lawk chung pawha tih/tihsual sawina tawngkam lar takah an hmang ta nghe nghe a ni.

            Hringnunah hian Pandora-i anga dai pelh rem rum chang te, kan tih sual leh tih loh sual avang te, kan duh leh tum reng vang leh duh leh tum reng vang pawh ni lem lova thil kan tihsual thin avanga harsatna leh buaina hi mihring hian kan va tawk hnem tawh tak em! Hringnun hi leihlawn ang a ni a, a chho (hmasawn) zawnga kan kal a nih loh chuan a chhuk (hnungtawlh) zawngin kan kal thin tih a ni. A bikin Mizo te hian ‘ngai awh’ tih tawngkam hi kan chelek viau mai a. Kei mihring ngai awh hi a awm thei dawn em ni aw tiin ka ngaihtuah thin a. Dinna/awmna ngaia ding/awm reng chu hmasawn lo tihna a ni a. A hranpa in hnungtawlh/tlahniam zawngin kal lem lo mahse, hma a sawn miau loh chuan a hnungtawlh tihna ni maiah ka ngai. Engpawh chu nise, hringnun hi leihlawn anga han tehkhinin, hmasawn kan tum luat avang emaw, chak tak leh sang taka hmasawn tum luattukna lama rahbi rap pelh a, hringnun leihlawn rahbi hnuaihnung ber atanga lawn that leh ngaia mawng sawh dawta tlak chang hi vawi engzat nge i hringnun hian a lo tawn ve tawh le? Tin, mite anga chakna leh theihnaa san ve loh, a tawi zawngin midang te tluk phak ngang loh avanga hringnun leihlawn rahbi khatna rap rual reng, mahse, mihringpui ten rahbi sang tak an lawn thlen hnu pawha leihlawn chanve hnuai lama harsa taka la pen ve hram hram te kan awm em?  Chumi piahah, chakna leh theihna in a tlin ngang loh avanga hringnun leihlawn rahbi sang lam pan chak em em, mahse pan thei ta ngang lo te, fimkhur loh avanga a mawng lama tawlh thla leh ta emaw, suahsual tukkhum pawn vang hrim hrima rahbi sang kai thei lo kan awm em? Shakespeare-a’n vanneihna hi a mal te te in a lo thleng thin a, vanduaina erawh a hlawmin a lo thleng thin tia a sawi hringnuna a dik zia lo tem tawh i ni em? A khaikhawmnaah chuan hringnun leihlawna kan lawnna kawngah leh, rahbi sang thleng tura kan beihna kawngah hian beidawnna, harsatna, lungngaihna, retheihna leh kan kawng min ti thuanawpa, min tichhe vek thei khawpa lung bang sang hmachhawn lo mihring hi kan awm awm love. Chutiang hunah tak chuan sum leh paiin hlutna a nei tawh lova, then leh rual, chhung leh khat te fuihna leh thlamuanna in awmzia a nei tawh thin lo. Mihringin khawvela a awm chhunga a neih chhun leh a tana hlu ber ‘nunna’ meuh pawhin awmzia a neih tawh lohna ruam atanga hringnun leihlawna rawn lawn tha leh a, a hmaa a phak loh te lehpel leh rahbi sanga hlangkai fo thintu chu he ‘beiseina’ hi a ni fo thin. A tawngkam hrim hrim ‘beiseina’ tih hian ken tel a ngah hle mai. He thumal rawn siamchhuaktu phenah hian chhelna, huaisenna, tumruhna, rualelna,taihmakna te a awm a. Heng a phena rawn siamchhuaktu leh dotu ban pawimawh tak tak te tel lo hian a thumal  mawina ringawt hian amahin awmzia a nei lova, mawina leh hlutna a nei hek lo. Mahse, he beiseina dotu ban nghet leh rinawm tak te tanchhan leh nghenchhana ‘beiseina’ nei chuan he beiseina hlutzia leh pawimawhzia hi a hmu fiah thin a, a nih phak loh tur leh ban phak loh pel rawk khawpa sangah a chuangkai ta thin a lo ni. Chuvang te pawh chu a ni ang e, mihring te ah chuan beiseina nei tawh lo, mi beidawng te tluka hlauhawm an awm lo an lo tih thin ni.

            Hringnun hi tehkhin a rem teh chek a ni ang chu, tehkhinna thu tha tak tak a tam em mai. Chung hringnun tehkhin thu hrang hrang zinga ka duh em em pakhat  chu hringnun leh chess board tehkhin thu hi a ni. Sap ho bawkin ‘Life is like a game of chess (Hringnun hi chess khelh ang a ni)’ an lo ti leh dim diam hman pek a! Chess game-ah hian kan hriat angin sa chi hnih- a sipai lumum (pawn) leh officer te an awm a. Chung sa chi hnih ten an tum ber leh a game laimu ber chu an lal (King) venhim chu a ni a, chuta a khaipa ber leh thiltithei ber, a ho khawmtu chu lalnu (queen) a ni. Chu mai chu ni lovin, an lal an venhimna kawngah chuan mahni lo inven (defend) satliah ringawt a tawk lova, hmelma sipai leh officer te beih let (offense) a tul tel bawk a. Chutiang tur chuan Chess khelmual (chessboard) ah pawl hnih te chu an inkhuainuai ta thin a ni. A chang chuan hmalama thui tak kal/chet dawrh a ngaih chang te a awm a, a chang chuan a hnung zawnga tawlh let hrawt hrawt a ngaih chang te a awm bawk. A sir zawnga chet a tul chang te a awm a, tin, a pawimawh berah chuan lal himna tur a nih dawn phawt chuan sa huai leh thiltithei (officer) te loh theih lova hmelma kuta ser an ngaih chang te a awm thin. Mahse, lal ber venhim a nih tlat chuan hnehna an chang ngei dawn a, officer te chu hmelma lamin lo ei zo deuhthaw pawh nise, hnehna chan kha a pawimawh lai tak zawk chu a ni.

            Kan hringnunah pawh hian a chang chuan thinlung na vawng vawnga kan hnungtawlh a ngaih chang te, ke chheh sual avanga dinhmun tleu chang te, vanneihna leh hmasawnna avanga hlim chang te thlengin kan tawng thin. Chung hun hrehawm leh hun harsa leh hlimawm leh hriat reng tlak te chuan chatuan a daih ngai si lova. Chuvangin, hlimna piah lawkah kan tap leh a, tahna piah lawkah kan hlim leh thin bawk. Chess game ang hian kan tum ram thleng tur leh hnehna kan chan zel hi a pawimawh lai tak a ni tih kan hriat fo loh chuan rawng huai ser a tul hunah te ser phal lovin kan ui bet ang a, kan thlen tur kan thlen loh phah fo thin ang a, pen hnih khat leka hnungtawlh emaw, pen za tam taka hnungtawlh kan tan a that zawk hunah pawh hmu thiam lovin kan chapona leh tawrhchhel lohna avang te in kan hnungtawlh mai tak lohna aia hnung fe ah kan awm phah fo thin bawk ang.Chutih rual chuan, ke chheh dik vek theih a ni lova, thil engkim rin lawk dik thlap thlap theih a ni hek lo. Duhthlanna siam sual chang a awm lo thei lova, thutlukna a dik vek seng ngai dawn hek lo. Hlimna sirah lungngaihna, tahna piahah malsawmna, chutiang anga chingchivet leh hriat lawk loh chu kan khawvel kalphung a ni miau si. Chuvangin, eng anga thiltithei leh ropui pawh ni mah la, hringnun khelmualah hian i khelh fuh reng dawn loh avang leh tihchhiata i awm fo thin dawn avangin a tawp a tawpa i innghahna tur leh i tana hlu ber tur chu Pandora-i bawm chhung hnuaihnung ber luahtu leh bawm chhunga awm ve dang langsar tak tak ten an hliahkhuhna phena awm, nang pawhin i hriat chhuah fo ngai loh leh a awm ve tih pawh i hriat mang loh, he ‘beiseina’ tho hi a ni fo reng thin dawn a ni.

            Kan thu tlangkawmna atan chuan, ‘Hringnun hian a vaw chau der thei che a, a ti chhe thei che a, a phuar bet tlat thei che tih hi theihnghilh suh. Mahse, hei hi hre reng rawh. I tlawm (surrender) a nih ngawt loh chuan hringnun hian a hneh thei lo che’ tih hi. Hnehtu an tlawm ngai lo, tlu mahse beiseina ralthuam hmangin an ding leh thin.