Tlawmngaihna leh Tunlai Mizo Nun

Hmasang kan pi pu te atanga kan hnam nunzia vawiin thlenga ral lo leh a taka kan la nunpui tak zel te zinga a langsar ber hi thlang dawn ta ila ‘tlawmngaihna’ hi kan thlan chhuah hmasak pawl a ni ngei ang. Chu tih rual chiah chuan ‘hmanlaina’ leh ‘tunlaina’ (tradition vs modernity) chungchanga inhnialna hmun apianga lang tel ve ziah chu he ‘tlawmngaihna’ bawk hi a ni ang. Hei hian kan hnam nuna tlawmngaihna beh ngheh zia a tilang chiang hle awm e.

Tlawmngaihna hian awmze ril leh thuk tak a nei a, a huam pawh a zau thei viau awm e. Thu leh hla lama kan mi chhuanvawr te zinga mi, Pu James Dokhuma (L) chuan, “Tlawmngaihna chu chawimawi phut lo chawimawi tlaka nun tumna, chawimawi dawna chawimawi nih chak anga lan tum si lo chunga a ruka chawimawi duh si chunga tlawmngaihna,” tiin a hrilhfiah a (Hmanlai Mizo Kalphung.p.199). Kan ziak mi chhuanvawr Zikpuii pa pawhin, “Tlawmngaihna chu mihring rilru chhungril thatna, pawn lam nun dan kawng chitin renga lo lang chhuak hi a ni,” tiin a hrilhfiah bawk (Zikpuii Pa Kutchhuak.p.53). Thil lang chiang tak pakhat chu tlawmngaihna hi pawnlam lang theia tha tho taka chet ringawt a ni lova, chhungril lam atanga intan leh innghat, chumi in a thunun ang zia zela pawn lam leh lang theia chet chhuahna hi a ni. Chhungrila dikna, rinawmna, taihmakna, zaidamna, dawhtheihna, tawrhchhelna leh a dang te nei hawt lo hian midang te mithmuhah tlawmngaihna leh a ken tel zia dik tak pho chhuah a har khawp mai. Chuvangin tlawmngaihna dik tak chu chhungril atanga intan leh chumi ang zia zela pawnlama chet chhuah pui hi a ni a. Tin, keimahni in bel/in pek chawp ni lovin kan bul vela miten min hlan (award) tur a ni bawk a ni.

Hmasang Mizo nuna tlawmngaihna in hmun pawimawh a chan zia leh a chan dan lam sawi chiam ka tum lova. Chutiang bawkin mi thenkhat anga tunlai thangthar te nuna tlawmngaihna tlak hniam tawh zia sawi chunga chhuan thar te hauh chiam lah ka tum hek lo. Ka chhui tum ber zawk chu engtin nge kan hnam nun ze mawi ber te zinga mi ‘tlawmngaihna’ hi a nihna ang taka tunlai kan nuna par kan chhuan tir leh theih ang? tih lai hi a ni.

Mi inchhiar zau peih chuan tlawmngaihna hi Mizo ten kan hmuh chhuah leh khawvel hnam dang ten an neih ve hauh loh, kan hnam bil ta bik liau liau a lo ni lem lo tih hi kan hre ve turah ngai ila. Chutih rualin, kan hnam nun ze milin he tlawmngaihna ze mawi tak hi kan chher chhuak tih erawh chu thudik a ni ngei ang. Mizo khawtlang nuna tlawmngaihna lo irhchhuah dan hi hmasanga kan pipu te khawtlang inawp dan khan kawng ro a su thui hle in a rin theih. Sa leh ral hlau reng renga hun hmang an nihna te, huai chi hrang hrang thawi lungawi tur an ngah zia te, mimal aia khawtlang an dah pawimawh zia atang te khan he tlawmngaihna ze hlu hi awm ta lo se pasaltha an chhuak thei lovang a, mi taima leh rinawm ten chawimawi an hlawh hek lovang. Sa leh ral laka khawtlang chhanhim nana nunna thapa che chhuak thei tura huaisenna pe tu chu he tlawmngaihna hi a ni a. Chutih rual chiah chuan Lal leh Upa te rorelna leh val upa leh upa zawk te thu zawm tir a, thuawihna leh aia upa zahna nuna hruai lut tu pawh he tlawmngaihna tho hi a ni. A pawimawh berah chuan sa leh ral laka an himna atan te, khawtlang inawp na leh rem taka an khawsak ho theihna tur leh khawtlangin kawng engkima a muan pui tur mi chher chhuah kha kan pi pu te khawtlang nunah khan an mamawh tawpkhawk a ni. Chuvangin, chutiang mi, mi huaisen, inpe zo, tuarchhel, dawhthei, zaidam leh rinawm an thlanchhuahna kawnga an lawmman dawn ropui ber leh ngaihhlut ber chu ‘mi tlawmngai’ nihna (title) an pek te chu an ni.

Kan tunlai hun, sa leh ral laka min venghim tura sawrkar rawih sipai leh ralvengtu te kan neih tawhna khawvel, zawlbuka tlangval riak khawm hlutna leh tangkaina awm tawh lohna hunah hian he ‘tlawmngaihna’ hian a hlut na a hloh zo ta em ni le? Ka chhanna chu, hmasang pi pu te hunlai tlawmngaihna kha chuan a hloh va, mahse, tunlai mil tlawmngaihna zik no rawn chawr thar mek hian a rawn thlak chho mek a ni tih hi a ni. He tlawmngaihna chi thar rawn tiak chho mek hi kan enkawl dan azirin par a chhuang thei a, a zung nen lam thi thei a ni bawk tih hi ka sawi tum ber chu a ni.

Zikpuii pa’n, “Kan hmanlai pi pu te tlawmngaihna mual liam tur auh let tum aiin tunlai thangthar te mil tlawmngaihna thar kan chher chhuah a hun,” a lo tih angin tunlai nuna tlawmngaihna kan pawm dan leh ngaih dan hi keimahni theuh kan in zawh nawn a, tunlai hun mil zela kan her rem a ngai a ni. Sawi tawh ang khan tlawmngaihna hi kan Mizo pi pu te khan an mamawhna avanga kan hnam ze mil tura an chher chhuah a ni a. A nihna takah chuan kha tlawmngaihna ze hlu an lo chher chhuah avanga vawiin thlenga Mizo hnam hi la dam kan ni pawh kan ti thei ang. Chutih rual chuan, kan pi pu ten an hunlai mila an mamawhna anga an lo chher tlawmngaihna kha a ngai ngaia tunlai hun, kan rilru put hmang leh khawsak phung danglam nasa tawh taka hman zel kan tum a nih dawn chuan kan la buai telh telh dawn. Hemi ti fiah tur hian Mizo khawtlang nuna tlawmngaihna kan lantir na kawng langsar tak pakhat, chhiatni chingchang hi i han chhui zau dawn teh ang.

Mizo te hi chhiatni thatni sawngbawl hautak ber hnam te zinga mi kan ni ngei ang. Tin, tlawmngaihna kan lanchhuah tir tamna ber hun chu a bikin chhiat tawh chungchangah a ni lehzual awm e. Chhiat tawk chhung te kan in len pui dan leh in sawngbawl dan hi a hautak lutuk ta deuh em tih hi zawhna pawimawh tak, mahse, khawtlang pawi sawi hlauh vanga chhiat tawk chhungkua leh helam vei mi te pawhin an sawi lan ngam si loh a ni ngei ang. Ruang awm laia kan in lenpui leh sawngbawl dan hi chu lo dah tha ta rih ila. Ruang awm tawh loh hnua vantlangin kan sawngbawl zui dan hi ennawn ngai lai tak chu niin a lang. Mizo te hian thihna chungchang hi mimal/chhungkaw thil (private/family affair) a kan hrual zim deuh hi a hun tawh lo maw? Khawtlangin a chhawmdawl an ngaihna chin leh vantlang chetna awm hi chu a awm ngei e. Mahse, thihna/chhiatna kan ti khawtlang huap leh lutuk hi chuan thihna tawk chhungkua te ah an lusun hnem aiin phurrit a siam tam ta zawk niin a lang. Chhiat kan tawh atanga kar khat vel (a aia rei deuh pawh) chhung hi chu tlawmngaihna puan zar zar chung hian mahni duh hun leh remchan hun hunah, khawhar chhung te remchan hun leh hun lo pawh ngaihtuah lo leh an mi ngaih ber leh awm ngei se min duh vang pawh ni lem lo, ‘tlawmngai lo bik’ nih hlauh vang ringawt hian chhun zan zawmin kan in chim ta reng thin hi enge a hlawk viauna ni ang aw ka ti thin. Chhiat kan tawh loh lai pawha kan in rawn chuang kai ngai hlei lo te phei chu chhiat kan tawh avanga nilenga an rawn len ringawt hian kan khawhar a hnem meuh ang maw? Tin, thlan laih leh thlan siam chungchang pawh hi ngaihtuah nawn a tul ta deuh em? Hmanlai pi pu nunah chuan eizawnna kawng inang an nih avangin kawng engkimah phawkhai a rual a, tun lai kan eizawn dan hrang niai nuai ang hi an ni ve lo. Tuna kan kal dan anga thlan a nawlpuiin a laih hut hut hi nge tha a, mi tlem te rawiha laih mai hi? Hetah pawh tlawmngaihna puanzar hnuaiah kan thawkchhuak thin, a tha e. Mahse, chu puanzar hnuaia thawk ve lem lo kan dem tlat zel mai hi a Mizo lova, tlawmngaihna zia pawh a ni hek lo. Chutiang bawkin, hetianga tel nachang hriat loh hi a Mizo lo viau bawk! Pastor Challiana chuan, “Hmanlai chuan mitthi thlai chhiah nan sial emaw an talh a. A sa ei tur hian tlangval thlan lai te kha an ko ngei ang a. Nimahsela, tlangval tan zahthlak angah an ngai a, ei loh kha tlawmngaihna zawk a ni. Tunlaiah chuan thlan lai te hraina an ti ta zawk mah a, tlangval te pawhin an ei hreh ta vak lo.” tiin a sawi (Hmasang Mizo Nun.p.16). Heng kan hmasang pi pute nun zia hi kan hriat loh vang ni maw, thlan laih nikhuaa thingpui kan beisei tak tlat chhan leh, thingpui sem nula te an tlai deuha kan thinrim zawmah tak chhan te hi?!! Thlan siam ni-ah ei siam ngei turah kan ngai ta deuh tlat bawk a! Hmanlai pi pu te tlawmngaihna zia dik tak hre ziktluak lo hian tunlai mil tlawmngaihna hi kan lo hnualsuat ve chiam ringawt palh ang tih te pawh a hlauhawm e!

Khawhar in riah mawlh mai hi!! Kan pipu te hunlaia tlangval te khawhar in an riah chhan zinga pawimawh tak pakhat chu lusun chhung ten an hna thawh ai (lo lam hna, tui chawi, thing eh, ei rawng bawl thlengin) thawh sak a, chhawk zangkhai turin a ni. Tunlaia tlawmngaihna chang chawia kan la tih hram hram khawhar in riah hian a chunga kan sawi khawhar in riahin a tum leh lusun chhungte a chhawk zangkhai dan khi a la phawk pha meuh em le? Chhiat tawh vuakveta chhiat tawk chhungkaw inchhung bungrua eng eng emaw bo leh thin te hi tunlai kan nun danglam tawha kan chhiat tawh kan tih vantlang huap rei lutuk tawh/siam rem duh loh tlat vang a ni mai lovang maw? Tin, mitthi buhfai leh thing khawn chungchang pawh hi ngaihtuah chian deuh a hun ta  niin a lang. Tunlai khawvelah kan pi pu te anga lo lama buh bal thar ring ringawt kan ni tawh lem lova. Buhfai tam fe lusun te ina va nghah hnawk zel ringawt thin mai hi kan tangkaipui meuh em le? Chhungkua a zir leh a tul dan azira uluk zawka kalpui theih niin a lang.  

Chutih rualin, a chunga kan sawi zawng zawng te khi kan tlawmngaih leh tlawmngaih loh avanga kan tih tur leh tih loh tur ni lovin, Mizo kan nih avang zawka ti tur kan nih erawh hre tel ta ila. Kan sawi tum tak zawk erawh chu tlawmngaihna kan ngaihdan leh pawm dan hi ennawn a hun tawh lo maw tih hi a ni. Helaia ka han sawi uar duh lai tak chu tlawmngaihna hi mimal chanvo (personal privilege) a ni tih hi a ni a. Tlawmngaihna hi vantlang huapa haw haw a nawr chhuah emaw, a huhova dawn huk chi niin a lang lo. Kan pi pu te khawtlang nunah kha chuan mimal tinin ‘tlawmngai’ nih kha naupan lai atanga an in zirtir leh an tum a ni a, chu chu a huhova neih theih a nih loh avangin mimal tinin tlawmngai nih dan kawng mahni phak tawkah an zawng ru theuh a, an inel ru tham thin. Chu an nih tum tak an nih theihna leh a lan chhuah theihna chu a chunga kan sawi tak chhiatni leh thatni-ah te, sa leh ral lakah te, rethei leh chhumchhia te lakah leh, a tawi zawngin, an mihringpui te lakah a ni. Chu tlawmngaihna zia chu an hunlai khawtlang kalphung leh khawsak phung milin an lan chhuah tir ta mai thin zawk a, chu chu tlawmngaihna kan hnam rohlu tak a lo nihna chhan chu a ni.

Tunlai huna tlawmngaihna kan ngaihdan hi chu mimal chanvo lam aiin vantlang chanvo a ang mah zawkin a lang. Kan pipu ten an ngaih hlut chu engtin nge tlawmngaihna chu an lan chhuah tir-eng kawngah nge? engtin nge? eng thilah nge? tih lam ai chuan, a tawi zawngin a lanchhuahna hmanrua (means) lam ai chuan tlawmngaihna in a tum tak (end), mi huaisen, taima, rinawm, chhel, zaidam leh khawtlang muan tu an chher chhuak em tih zawk kha a ni a. Tunlaiah thung chuan tlawmngaihna in a tum tak (end) lam ai hian a lan chhuah tir dan kawng lam- thlan a lai tam em? a tlaivar tam em? hnatlang a chhuak tam em? tih te hi tlawmngai leh tlawmngai lo tehfung atana kan hman te a ni ta mah mahin a lang a. Chutiang a lo nih hlauh chuan tlawmngaihna nihphung leh awmzia hi kan zir nawn leh a tul hle in a lang. Tlawmngaihna dik tak chu vantlang phutna phurrit in a phut chhuah ni lovin, mahni/mimal atanga intan a ni zawk tur a ni. Mimala tlawmngaihna in a ken tel ze hrang hrang kan hlen chhuah theih ngat chuan khawtlang huapah pawh nise, a hranpaa ‘tlawmngaih’ tum a ngai hranpa tawh lo. Heti zawng hian i chhut ngai em? Thlan laihnaa lang zat zat, chhungkaw thawhchhuahah erawh thawh mumal nei lo, vantlang huap thiltih-hnatlan, programme adt ngai pawimawh em em, vantlang thil tih piahlama tih/thawh mumal nei lo, ruihhlo ngawlvei, mahse khawhar in riah peih em em leh a dang te.....vantlang mit hmuha chet chhuah dan atanga tlawmngaihna hi kan teh a nih chuan ‘mi tlawmngai ruihhlo ngawlvei, mi tlawmngai zawmthaw, mi tlawmngai daw heh, mi tlawmngai chhungkaw phurrit leh a dang te’ khawtlang hian kan ngah viau mai ang tih a hlauhawm. Kan pi pu ten ‘tlawmngai’ an tih te tlawmngaihna chu ‘mimal-chhungkua-khawtlang,’ hetianga inchher chhuak chho thin te zawk hi an ni. An mimal nunin belhchian a dawl a, chhungkaw nghahfak an ni a, khawtlang khaidingtu an ni thin. Kan vengchhunga ‘mi tlawmngai’ a kan chhiar tam tak te hi tlawmngaihna dik tak nunpuitu te an ni takzet em? (Tlawmngaihna hi lan chhuah tir tur ni lovin nunpui tur zawk a ni. Kan nunzia chu a hranpaa lan chhuah tir a ngai lo angin tlawmngaihna kan nunpui chuan midang te hmuhah a lang mai. Thup leh hliah bo theih a ni lo). Chhiatni chungchang kher lovah pawh, nitin nunkawng hrim hrimah pawh tlawmngaihna dik sawifiahna hmuh tur a tam, kan sawi seng lo. Chik takin ngaihtuah ta ila, ‘tlawmngai’ nihna (title) kan pek thin te hian a chunga kan sawi tak tlawmngaihna dik tak khi an hlen chhuakin an ‘pass’ chiang meuh em le? Kan pipu te nunze mil tlawmngaihna rem leh rem lova ‘kan hnam dan alawm’ tih changchawia vawiina chhunzawm/chawilar kan tum talh hian midang phutna rilru hrisel lo hring chhuakin, tlawmngaihna fir tha tak thin pawh a ti dazat zovin, ngaihsan a hlawh loh phah ta hial zawk a ni mai lo maw? Damdawi lam thiam, zan khaw tai rek pawh sawi lova damlo mangang ten an koh phar chung pawha thatho taka kal zel thin, sawrkar hnathawk, rethei leh hnuaihnung zawk te tanpui an ngaihnaah chuan tlanchhe ngai lo leh theihtawp chhuahpui thin, mi beidawng leh lungngai te thu hla ngaithlaa fuih a, harsatna ruam atanga dawhthei taka khaichhuak tu, dawr nghaktu biak nuam leh mi tanpui peih reng mai....Aaa, mistiri, kut hnathawk, lirthei khalhtu, pheikhawk siam atanga sawrkar hotu lu....sawi tur a va tam em!!!! Heng mi hrang hrang, eizawnna leh hawi lam hrang thiau te hi kan pipu te hunlai khan an awm ve lo. Mi tam zawk chu eizawnna kawng khata eizawng an ni tlangpui (thirdeng, bawlpu adt te chu awm bawk mahse). Kohhran, YMA leh vantlang thiltih sawi hniamna ni lo se, tlawmngaihna kan tehna hi kan pipu te hunlai anga puipunna hmun leh hun/vantlang huap thiltih ah te chauh a nih chuan mi tlawmngai hmaih kan va ngah dawn em!! Hman leh tun a inang thei miau si lo! Chuvang chuan alawm ‘Mizo pipu te tlawmngaihna’ ni lo ‘Mizo thangthar te tlawmngaihna’ kan chher chhuah a tul em em na chhan chu! Hmasang atangin khawvel ram ropui berah a ni emaw, hnam changkang leh chak berah a ni emaw, hmanlai thil (tradition) leh tunlaina (modernity) te hi an indo reng a. Chu indonaah chuan ‘tunlaina’ hian a ni hnehna a chang zawk zel. Chu ‘tunlaina’ mil zela hmanlai thil an her rem leh chhawm chhoh te chu a ni vawiin thlenga hnam rohlu tia lungsi taka hnam tin ten kan roh tak em em thin ni.    

Mizo ‘mizo na’ tak hi enge a nih i ngaihtuah ve tawh ngai em? Tawngkauchheha sap tawng telh lova tawng thiam mang tawh lo leh hnam changkang nun zia la chhawng char char (incheina, nun phung adt) te hian an Mizo na an hloh then ta bik in i  hre thin em? In la changkang ngai thei lo em em, sap hla pawh ngaithla duh lo, Mizo hla ah pawh hranghlui zaithiam te ngat lo chu ngaithla duh lova, tunlai Mizo zaithiam chhuak thar te hmu dahlau tlat, ‘rilru hmanlai’ put tum tlat te hi an Mizo bik riau in i hre ve em? Kei ka ngaihdan chuan an Mizo dan leh Mizo loh dan a inang reng!! In lak hman lai viau ringawt hi Mizona a ni ber lova, in lak tunlai viau hi Mizo lohna a ni hek lo. Sap tawng leh hindi thiam loh hi Mizo dik tak nihna a ni lo ang chiahin, vun ngo tih dan leh nungchang entawn reng renga nun leh ‘I am no longer a Mizo’ lo tih ve satliah ringawt hi sap dik tak nihna a ni bawk hek lo. Sap hian ‘Mizo ka ni lo, sap ka ni’ ti a midang a hnial a hnial a tul lo. Chutiang bawkin, ‘Mizo ka ni lo, sap ka ni.’ tia tan er teh hian sap min nih tir ta chuang hek lo. Engvang maw? I nihna (identity) kha incheina hmanga thlak chi a ni lova, sam rawng thlak ruala danglam ve chi emaw, Mizo tawng i theihnghilh ruala bo ve nghal chi a ni lo. Tunge mahni nihna ti bova hloh ngai? I damchhungin i ram mi nihna chu khawi ram pawh ni rawh se, i zia leh rilru, i chhungril nunzia tak tak, Mizo ti Mizo tu che kha i paih bovin i bosal tak tak thei ngai dawn chuang lo. Chutiang chiah chu tlawmngaihna pawh hi  a ni. Hmanlai pipute hunlaia an tih dan thin a nih vang ngawta tlawmngaihna lo ni ta a ni lova, tunlai mila her rem a nih tak avanga tlawmngaihna bo ta/tlahniam ta a ni hek lo. Tlawmngaihna chu tlawmngaihna a la ni reng, hmasang atanga tun thlengin. Mizo in tunlai mil zela her rem a, kan chhawm nun zel chu Mizo tlawmngaihna dik tak chu a ni zel mai a ni tih hi i pawm tlang ang u.