Hmeltha vs Hmelchhia?

                                               

Mihring taksa chhip/lu lama ruh hlang awm chu tisa in a rawn luah a,chu ruh leh a pang vela tisa bet te chu vunin a rawn khuh ve leh a,chu chu a pawnlamah chuan ‘hmel’ a lo ni ta a ni;a ho angreng khawp mai!Mahse chu ruh, vun leh tisa tangkhawmtena an siam ‘hmel’ chu, a siamchhuaktute chu a hrang te te-a han dah hran chuan hlutna leh mawina em em an nei pawhin a lang hran lo.Mahse an inbelhbawma an thil rawn phochhuah erawh chu he khawvela chhungkua min siam a,hriat pawh inhre ngai hauh lo pumkhata min siamtu leh min suihzawmtu hmangaihna,pawnlama hmuh theiha a intarlanna pawimawh tak a ni thung lawi si!Ruh leh tisa mai vunin a khuh theuh theuhah pawh hian hmeltha leh hmelchhia kan awm tlat mai zuk nia!

Khawvel nghawrnghing leh thangchhuak hat khawpa hmeltha-a an sawi Marilyn Monroe te, Elvis Presley te leh kan zohnahthlak nula Lianchhiari ngeite pawh kha han ngaihtuah teh,i hmel ang,ka hmel ang tho an nei a.An hmelthat avangin an hnar a phir chuang lova, mit an nei tam bik chuang bawk hek lo.Mahse an hmeltha tlat thung si!

            Vawi khat chu thingpui dawr pakhata ka thianpa nen thingpui kan indun laiin dawr kawtah chuan nula pakhat hi a lo kal a.Ka thianpa hnenah chuan,’A hmel a va tha em,’ ka’n ti thla rawk a.Ni e, ka hmuh danah chuan a hmeltha thlawt alawm!Mahse ka thianpa chuan ka rilru ang a lo pu hauh lo mai.Ani ve thung chuan hmeltha a tih loh piahlama a hmaitlanga sawiselna tur a neih zawng zawng nen lam a rawn phawrh ta teuh mai a! Ka thianpa sawiselna kha dawt muhlum a ni hauh lo.A hmel(hmai?)a ka thianpain a duhthu a samlohna lai a sawite pawh chu ka hmu lo a ni bik lo.Ka hmu vek, mahse chungte hlei hlei chu ka mita tihmeltha zualtu an la ni ta deuh deuh nia mawle!

Ka’n ti teh duah a!Ni e, tleirawl/rawlthar chhuah tirha a hmei apa-a kan chak leh thlakhlelh ber thin chu ‘hmelthat’ a ni thin a ni lawm ni kha?! Hei hi chu thangthar leh hranghlui lampang pawh a ni lo.Kan nu leh pate chu sawiloh, kan pi leh pute pi leh pu lehchhawngte pawh kha han zawh leh theih chu nise chuan, tunlai rawlthar/tleirawlte rilru put ang tho hi an pu ve in a nia ka rin ni! Hmaia arngeng awm duh hunlai a lo ni nen, arngeng lama hausa deuh leh malsawmna dawng hnem deuhte phei kha chu darthlalang nen kan inmelhrum nitin chu a ni thin anih kha tiraw?! ‘Hmel’ hi mihringten kan mihringpuite hnena kan thilpek hlu ber pawl chu a ni reng a ni.

            Tichuan, hmeltha leh hmelchhia chu kan lo awm ta chu a ni a. Mahse a khawilai berah nge kan ‘hmeltha’ chu a awm a, khawilai atangin nge kan ‘hmelchhia’ chu a lo inpholan thin ni ta ang le? Tlangvalin ngaihzawng a nei a, a hnuah phei chuan nupuiah a nei ta hial a.Chu tlangval chuan chu a nupui chu engtia ngaizawng ringawt nge maw a nih a, nupui hiala a neih tak mai chu le? A hmangaih vang chu a ni tehmeuh mai.Mahse chu hmangaihna tifamkimtute zingah chuan ‘hmel’ chu a pawimawh ber pawl a la ni ta fan a!Tunge hmel neilo hmangaih  ngawt duh ang i?! Han sawi lehzel teh ang.Chu tlangval leh a nupui chuan hmeltha an inti tawn ngei mai.An thenawma tlangval chuan nupui a nei ve ta a.Mahse, nula dang a rawn hruailut ve thung a!An nupuite ve ve chu chung tlangval pahnihte chuan hmeltha an tih ber,an hmangaih ber ve ve an ni bawk si! Hei hian alawm khawilaiah nge kan hmelthatna leh hmelchhiatna awmna lai tak min tihrelo lehzualtu chu!I ngaihdan chu i ngaihdan nise, ka ngaihdan ka’n sawi ve reng reng ang e.

            Mihringah hian  pawnlama hmeltha tumah kan lo awm lova,hmelchhia pawh hi kan lo awm reng reng lo nia mawle! I awihloh ka ring sa reng a!Mahse han ngaihtuah teh. Hmeltha ka tih em em, zanah pawha ka muthilh theihloh phahna leh ka chhin sek lai pawha ka mangah nen lama ka hmuh kha kawmchhak nula leh thenawm tlangval te chu an thinphu a tirang eih lo tlat!Chutiang bawkin midangin hahipa an sawi, vengchhung leh khaw khata an sawi laih laih khawpa hmeltha pawh kha ka tan chuan ka mitsir luah tlak pawha ka ngaihloh a ni ve leh tlat thei. Chuvang chuan alawm kan hmelthatna leh hmelchhiatna hi keimahniah a lo awm reng lo ka tih tak nachhan chu.Zing chawei khama chhhuah hmaa darthlalang hmaa tha inti tak leh hmaihnawih chitin hmaia vawmbeia rawn lengchhuak kha thenkhatin hmeltha an  lo ti a, thenkhat chuan a inngaihdan ang em emin an lo hmu hmeltha hlei lova!Chutih lain Siamtu’n a siam dan ang anga rawn huan ar tlat chhuah ve naw naw, hmai pawh a nihna ang ngau ngau rawn phochhuak pawh hmeltha titu leh hmelchhe titu an lo awm tho.Chu chu a ni.Hmeltha kan intih leh hmelchhia kan intih chu kan ngaihdan a ni;mahse hmeltha inti em em siin hmeltha titu hmu ta lo ila?!Hmelchhia inti ngawih ngawih chu mahni tawkah kan awm lovah ngai ila, mahni hmel darthlalanga inena induhkhawp chiah lo leh insit rilru tak pawh kha a lo thlirtu mithmuha a hmel a that miau chuan hmeltha inti vawr ai chuan a la chhawrnahawm deuh zawk lo maw?!

            Chuvang chuan nang pawh ka thutlukna hi lo ngaihtuah ve mai mai chhin teh. ‘Hmelthatna’ hi hmaitlang fai vawr ringawt hi a ni lo ania.Mi nungchang tha,zaidam leh mi nun ngil tak hi a nungchang thatna leh a  duhawmna han en ngawih ngawih tur leh thlir vawng vawng tur a awm hranpa lo.Chutiang bawkin mi leplerh leh thinchhia, chapo leh awmherh pawh hi ‘helai hi  a chapona, a bula awm a hrehawmna,’ tia kawh sawk sawk tur a awm chuang miah lo.Heng zawng zawng-thatna leh sualna, felna leh fellohna zawng zawng kan mihringpuiten an rawn hmuhna tur chu kan malpui leh sam karah ni lovin, he kan ‘hmel’ah ngei hian a lo ni. Chuvangin, hmaihnawih chitin leh uluk elkhena enkawlna nena hmaitlang fai vawr hi ‘hmeltha’ an ni ber lova, chutiang hmang ngai lo, zing hmai phih baka hmai enkawl hran chuang lem lo pawh ‘hmelchhia’ an ni kher chuang hek lo.Vantlang hmeltha tih pawhin tha ti tawk lotu  a nei a,khaw khat hmelchhiaa sawi pawhin kawppui tur a vai chuang hek lo.Kan hmelthatna leh hmelchhiatna chu kan pawnlam lan dan mai piahlamah hian kan chhunglam hmelthatna leh hmelchhiatnain a rawn kah en leh tihthim dan azir hi a lo ni zawk ka ti ta a ni!